പച്ചത്തേങ്ങ വിലവര്‍ധനവിനൊപ്പം വെളിച്ചെണ്ണ വില കുതിക്കുന്നു. കേര കര്‍ഷകര്‍ക്ക് സമീപകാലത്തെങ്ങും ലഭിക്കാത്ത വിലയാണ് പച്ച തേങ്ങക്ക് ലഭിക്കുന്നത്. ആഭ്യന്തര വിപണിയില്‍ പച്ചത്തേങ്ങ വില ക്വിന്റലിന് 4650 രൂപ വരെ എത്തി. ഇതോടെ കൊപ്രക്കും വെളിച്ചെണ്ണക്കും വില ഇരട്ടിയായി.

വെളിച്ചെണ്ണ ലിറ്ററിന് 220 രൂപയാണ് മൊത്തവില്‍പ്പനവില. എന്നാല്‍ ചില്ലറ വില്‍പ്പന വില 280 വരെ ആയി. 25 ഓളം ബ്രാന്‍ഡുകളിലാണ് വെളിച്ചണ്ണ വിപണിയിലെത്തുന്നത്. അയല്‍ സംസ്ഥാനമായ തമിഴ്നാട്ടില്‍ നിന്നാണ് കേരളത്തിലേക്ക് ഇപ്പോള്‍ ഭൂരിഭാഗവും വെളിച്ചണ്ണ എത്തുന്നത്. ഇവയിലേറെയും തമിഴ്നാട്ടിലെ പൊള്ളാച്ചിയില്‍ നിന്നാണ് എത്തുന്നത്. കേരളത്തിന് പുറത്ത് താരതമ്യേന വില കുറഞ്ഞ കൊപ്ര ലഭ്യമാണെങ്കിലും കേരളത്തിലെ പച്ചത്തേങ്ങയുടേയും കൊപ്രയുടേയും വിലയുടെ അടിസ്ഥാനത്തിലാണ് ഇവിടെ വെളിച്ചെണ്ണയ്ക്ക് വില വര്‍ധിക്കുന്നത്. 

മലബാര്‍ മേഖലയില്‍ നാളികേര കര്‍ഷകര്‍ക്ക് ഇത്രവലിയ വില ലഭിക്കുന്നത് ഇതാദ്യമാണ്. പച്ചത്തേങ്ങ ഉല്‍പാദനം കുറഞ്ഞതും ആവശ്യം വര്‍ധിച്ചതുമാണ് വില കൂടാന്‍ കാരണമെന്നാണ് കച്ചവടക്കാര്‍ പറയുന്നത്. ശബരിമല സീസണ്‍ കൂടി തുടങ്ങിയതോടെയാണ് പച്ചത്തേങ്ങ വില ഇത്രയും വര്‍ധിച്ചത്. 

5 വര്‍ഷത്തിലേറെയായി കിലോയ്ക്ക് 23 രൂപ മുതല്‍ 26 വരെയായിരുന്നു പച്ചതേങ്ങ വില ഉണ്ടായിരുന്നത്. കഴിഞ്ഞ ഓണത്തിന് മുമ്പ് അത് 39ല്‍ എത്തി. അത് കഴിഞ്ഞ് വില 47ലേക്ക് കുതിച്ചു. എന്നാല്‍ അതിന് പിന്നാലെ വില 40 ലേക്ക് താഴ്ന്നു. പിന്നാലെ തേങ്ങ കിട്ടാനില്ലാത്ത അവസ്ഥ വന്നതോടെ ഇപ്പോള്‍ വില സര്‍വ്വകാല റെക്കോഡിലേക്ക് കുതിച്ചുയരുകയായിരുന്നു. 

കൊപ്രയുടെ വില ക്വിന്റലിന് ഇരട്ടിയായാണ് വര്‍ധിച്ചത്. അതേസമയം, മകരം, കുംഭം മാസങ്ങളിലാണ് വിളവെടുപ്പ് കൂടുതലുണ്ടാവുകയെന്ന് നാളികേര കര്‍ഷകര്‍ പറയുന്നു. ആ സമയത്ത് ഇപ്പോള്‍ കിട്ടിക്കൊണ്ടിരിക്കുന്ന വിലകിട്ടിയാല്‍ നാളികേര കര്‍ഷകര്‍ക്ക് ഏറെ പ്രയോജനം ചെയ്യും. 

പച്ചത്തേങ്ങ വില ക്വിന്റലില്‍

2024 

ജനുവരി- 2900
ഫെബ്രുവരി-3200
മാര്‍ച്ച്-2750
ഏപ്രില്‍-3005
മെയ്-3200
ജൂണ്‍-2850
ജൂലൈ-2900
ആഗസ്റ്റ്-3000
സെപ്തംബര്‍-3200
ഒക്ടോബര്‍-3800
നവംബര്‍-5100
ഡിസംബര്‍-4650

വെളിച്ചെണ്ണ വില- 10 കിലോ

2024

ജനുവരി- 1530
ഫെബ്രുവരി-1540
മാര്‍ച്ച്-1520
ഏപ്രില്‍-1600
മെയ്-1600
ജൂണ്‍-1550
ജൂലൈ-1560
ആഗസ്റ്റ്-1560
സെപ്തംബര്‍-1670
ഒക്ടോബര്‍-2030
നവംബര്‍-2000
ഡിസംബര്‍-2200