ഒലിവ് മരത്തില്‍ തീര്‍ത്ത ഉണ്ണിയേശു..പൊതിഞ്ഞിരിക്കുന്നത് കഫിയയില്‍. ഫലസ്തീനിലെ വംശഹത്യാ ഇരകളോട് ഐക്യദാര്‍ഢ്യപ്പെട്ടും അവര്‍ക്കായി സംസാരിച്ചും ഫ്രാന്‍സിസ് മാര്‍പ്പാപ്പ. 'നേറ്റിവിറ്റി ഓഫ് ബെത്‌ലഹേം 2024'ന്റെ ഉദ്ഘാടന ചടങ്ങില്‍ കഫിയയില്‍ പൊതിഞ്ഞാണ് ഉണ്ണിയേശുവിനെ കിടത്തിയത്. ഫലസ്തീന്റെ ഹൃദയമായ ഒലിവ് മരത്തില്‍ തീര്‍ത്ത ആ ഉണ്ണിയേശുവിനെ അനാച്ഛാദനം ചെയ്ത് അദ്ദേഹം അവരുടെ സമാധാനത്തിനായി സംസാരിച്ചു. 

'യുദ്ധങ്ങളും ആക്രമണവും മതി. എല്ലാം അവസാനിപ്പിക്കണം' സെന്റ് പീറ്റേഴ്‌സ് സ്‌ക്വയറില്‍ ഈ വര്‍ഷത്തെ നേറ്റിവിറ്റി സീനും ക്രിസ്മസ് ട്രീയും സമ്മാനിച്ച പ്രതിനിധി സംഘത്തെ സ്വീകരിക്കവെ പോപ്പ് ആഹ്വാനം ചെയ്തു.  'നേറ്റിവിറ്റി ഓഫ് ബെത്‌ലഹേം 2024'ന്റെ ഉദ്ഘാടന ചടങ്ങില്‍ ഫലസ്തീനില്‍ നിന്നുള്ള പ്രതിനിധികളും പങ്കെടുത്തിരുന്നു.

ഇസ്‌റാഈല്‍ അധിനിവേശത്തിനെതിരായ ഫലസ്തീന്‍ ഐക്യദാര്‍ഢ്യത്തിന്റെ പ്രതീകമാണ് കഫിയ. ക്രിസ്മസിന് മുമ്പ് യുദ്ധം മൂലം ദുരിതമനുഭവിക്കുന്ന രാജ്യങ്ങളില്‍ വെടിനിര്‍ത്തല്‍ ഉറപ്പാക്കണമെന്നും മാര്‍പ്പാപ്പ ലോകനേതാക്കളോടും അന്താരാഷ്ട്ര സമൂഹത്തോടും അഭ്യര്‍ത്ഥിച്ചു.

'ഉക്രൈനിലും, പശ്ചിമേഷ്യയിലും ഫലസ്തീനിലും, ഇസ്‌റാഈലിലും, ലെബനാനിലും, ഇപ്പോള്‍ സിറിയയിലും മ്യാന്‍മറിലും, സുഡാനിലും കൂടാതെ എവിടെയൊക്കെ ആളുകള്‍ യുദ്ധവും അക്രമവും മൂലം പീഡിതരാകുന്നോ അവിടെയെല്ലാം നമുക്ക് സമാധാനത്തിനായി പ്രാര്‍ത്ഥിക്കാം,' മാര്‍പാപ്പ പറഞ്ഞു.

ഒക്‌ടോബര്‍ ഏഴിലെ ആക്രമണത്തില്‍ ബന്ദികളാക്കിയവരെ സുരക്ഷിതമായി മോചിപ്പിക്കുന്നതിനും ഫലസ്തീനും ഇസ്‌റാഈലും തമ്മിലുള്ള വെടിനിര്‍ത്തലിനും പിന്തുണ നല്‍കണമെന്ന് ഫ്രാന്‍സിസ് മാര്‍പാപ്പ നേരത്തെ ആഹ്വാനം ചെയ്തിരുന്നു.

Pope Francis, while unveiling a statue of the Crucified Christ wrapped in a kaffiyeh at the Vatican, made a heartfelt appeal for peace in Palestine.