ഗസ സിറ്റി:  ഗസയില്‍ കൊടുംതണുപ്പില്‍ നവജാതശിശുക്കള്‍ തണുത്തു മരിച്ചു. തെക്കന്‍ ഗസയിലെ അല്‍-മവാസിയിലെ അഭയാര്‍ഥി ക്യാംപില്‍ 48 മണിക്കൂറിനിടെ മൂന്നുകുട്ടികളാണ് കൊടുംതണുപ്പില്‍ മരവിച്ച് മരിച്ചത്. മൂന്നു ദിവസം മാത്രം പ്രായമായ കുഞ്ഞും മരിച്ചവരിലുണ്ടെന്ന് ഗസയിലെ ആരോഗ്യമന്ത്രാലയം ഡയറക്ടര്‍ ജനറല്‍ ഡോ. മുനീര്‍ അല്‍ ബുര്‍ഷ് വ്യക്തമാക്കി. 

ഗസയിലെ കുറഞ്ഞ താപനിലയും ക്യാംപിലെ വീടുകളില്‍ താപനില ക്രമീകരിക്കാനുള്ള സൗകര്യമില്ലായ്മയുമാണ് കുഞ്ഞുങ്ങളെ മരണത്തിലേക്ക്് നയിച്ചതെന്ന് അധികൃതര്‍ വ്യക്തമാക്കി. റഫയുടെ പടിഞ്ഞാറ് തീരപ്രദേശമായ അല്‍ മവാസിയില്‍ കുടിയിറക്കപ്പെട്ട ആയിരക്കണക്കിന് ഫലസ്തീനികളാണ് അഭയം തേടിയിരിക്കുന്നത്. തുണിയും നൈലോണും കൊണ്ട് നിര്‍മിച്ച താല്‍ക്കാലിക ടെന്റുകളിലാണ് ഇവരുടെ താമസം. ശൈത്യകാല  കൊടുംതണുപ്പാണ് ഇപ്പോഴത്തെ വെല്ലുവിളി.

കുഞ്ഞുങ്ങളെ തുണികളില്‍ പൊതിഞ്ഞ് ശരീരത്തിന്റെ താപനില ക്രമീകരിക്കാനാണ് മാതാപിതാക്കള്‍ ശ്രമിക്കുന്നത്. എന്നാല്‍ വസ്ത്രങ്ങള്‍ കുറവയാതിനാല്‍ ഇത് അധികനേരം തുടരാനും കഴിയുന്നില്ല. തണുപ്പു കൂടുമ്പോള്‍ കുഞ്ഞുങ്ങളുടെ കളര്‍ നീലനിറമാകുന്നുണ്ടെന്നും ബന്ധുക്കള്‍ പറയുന്നു. അവശ്യ ചികിത്സയോ ഭക്ഷണമോ ഇല്ലാതെയാണ് ജനങ്ങള്‍ ജീവിക്കുന്നതെന്നും ശൈത്യകാലത്തോടെ ഇവരുടെ ജീവിതം ദുരിതവുമാവുകയാണ്. 2023 ഒക്ടോബര്‍ ഏഴു മതുല്‍ മേഖലയില്‍ ഇസ്രായേല്‍ നടത്തിയ അക്രമങ്ങളില്‍ ഗസ ജനവാസയോഗ്യമല്ലാതായി മാറിയെന്ന് അന്താരാഷ്ട്ര മാധ്യമങ്ങള്‍ റിപോര്‍ട്ട് ചെയ്തിരുന്നു.