ബെയ്ജിങ്: ഇന്ത്യയിലെയും ബംഗ്ലാദേശിലെയും ദശലക്ഷക്കണക്കിന് ആളുകളെ ബാധിച്ചേക്കാവുന്ന ജലവൈദ്യുത അണക്കെട്ട് നിര്‍മ്മിക്കാനുള്ള പദ്ധതിക്ക് ചൈന അംഗീകാരം നല്‍കി. 2020ല്‍ ചൈനയിലെ പവര്‍ കണ്‍സ്ട്രക്ഷന്‍ കോര്‍പ്പറേഷന്‍ നല്‍കിയ കണക്കനുസരിച്ച് യാര്‍ലുങ് സാങ്‌ബോ നദിയുടെ താഴ്‌വരയില്‍ നിര്‍മിക്കാന്‍ പോകുന്ന അണക്കെട്ടിന് പ്രതിവര്‍ഷം 300 ബില്യണ്‍ കിലോവാട്ട് വൈദ്യുതി ഉത്പാദിപ്പിക്കാന്‍ കഴിയുമെന്നാണ് പ്രതീക്ഷിക്കപ്പെടുന്നത്.

പദ്ധതി നിലവില്‍ വരികയാണെങ്കില്‍ നിരവധി തൊഴിലവസരങ്ങള്‍ ഉണ്ടാകുമെന്ന് ഔദ്യോഗിക വാര്‍ത്താ ഏജന്‍സിയായ സിന്‍ഹുവ അറിയിച്ചു. 34.83 ബില്യണ്‍ ഡോളര്‍ ചെലവ് കണക്കാക്കപ്പെടുന്ന പദ്ധതി നടപ്പിലായാല്‍ ചൈനീസ് കാര്‍ഷിക മേഖലയ്ക്കത് ഉത്തേജനമാകും. പദ്ധതിക്കു വേണ്ടി നിരവധി പേരെ ടിബറ്റില്‍ നിന്ന് മാറ്റിപ്പാര്‍പ്പിക്കേണ്ടി വരും. ടിബറ്റന്‍ പീഠഭൂമിയിലെ സമ്പന്നവും വൈവിധ്യമാര്‍ന്നതുമായ പ്രാദേശിക ആവാസവ്യവസ്ഥയെ പദ്ധതി പ്രതികൂലമായി ബാധിക്കാന്‍ സാധ്യതയുള്ളതിനാല്‍ രാജ്യത്തിനു പുറത്തുനിന്നും വ്യാപക എതിര്‍പ്പുയരുന്നുണ്ട്.