ആലപ്പുഴ: ലോക്‌സഭാ തെരഞ്ഞെടുപ്പില്‍ തപാല്‍ വോട്ടുകളില്‍ തിരിമറി നടത്തിയതായി വെളിപ്പെടുത്തി സിപിഎം നേതാവ് ജി സുധാകരന്‍. 1989ലെ തെരഞ്ഞെടുപ്പിനിടെ സിപിഎം സ്ഥാനാര്‍ഥിക്ക് വേണ്ടി പോസ്റ്റല്‍ വോട്ടുകള്‍ തിരിത്തിയെന്നാണ് സുധാകരന്റെ ഞെട്ടിക്കുന്ന വെളിപ്പെടുത്തല്‍. ഇതിന്റെ പേരില്‍ തെരഞ്ഞെടുപ്പ് കമ്മീഷന്‍ കേസെടുത്താല്‍ പ്രശ്‌നമില്ലെന്നും സുധാകരന്‍ പറഞ്ഞു. 

ആലപ്പുഴയില്‍ എന്‍ജിഒ യൂണിയന്‍ നടത്തിയ പരിപാടിയിലാണ് വിവാദ പരാമര്‍ശം. 1989ല്‍ ലോക്‌സഭാ തെരഞ്ഞെടുപ്പ് നടക്കുന്നതിനിടെ, എല്‍ഡിഎഫ് സ്ഥാനാര്‍ഥി കെവി ദേവദാസിന് വേണ്ടിയാണ് തിരിമറി നടത്തിയത്. പോസ്റ്റല്‍ ബാലറ്റ് സിപിഎം ഓഫീസില്‍ വെച്ച് പൊട്ടിച്ച് തിരുത്തിയെന്നാണ് സുധാകരന്‍ പറഞ്ഞത്. 

'' 1989ല്‍ കെവി ദേവദാസ് ആലപ്പുഴയില്‍ എല്‍ഡിഎഫ് സ്ഥാനാര്‍ഥിയായി മത്സരിച്ചപ്പോള്‍ അന്നത്തെ ഇലക്ഷന്‍ കമ്മിറ്റി സെക്രട്ടറിയായിരുന്നു ഞാന്‍. പോസ്റ്റല്‍ ബാലറ്റ് ശേഖരിച്ച് സിപിഎം ജില്ല കമ്മിറ്റി ഓഫീസില്‍ കൊണ്ടുവന്നു. അവിടെ വെച്ച് ഞാനുള്‍പ്പെടെയുള്ളവര്‍ പോസ്റ്റല്‍ വോട്ടുകള്‍ പൊട്ടിച്ച് തിരുത്തിയിട്ടുണ്ട്. അന്ന് സിപിഎം സര്‍വീസ് സംഘടനകളിലെ അംഗങ്ങളുടെ വോട്ടില്‍ 15 ശതമാനം ദേവദാസിന് എതിരായിരുന്നു. അംഗങ്ങളുടെ പോസ്റ്റല്‍ ബാലറ്റുകളില്‍ 15 ശതമാനം മറിച്ച് ചെയ്തു.,' സുധാകരന്‍ പറഞ്ഞു.