ഊട്ടി: ഊട്ടി ഫ്ളവർ ഷോ ഗവ.ബോട്ടാണിക്കൽ ഗാർഡനിൽ ഇന്നാരംഭിക്കും. 127ാമത് ഫ്ളവർ ഷോ തമിഴ്‌നാട് മുഖ്യമന്ത്രി എം.കെ സ്റ്റാലിൻ ഉദ്ഘാടനം ചെയ്യും. അഞ്ച് ദിവസത്തിൽ നിന്ന് ഇത്തവണ പത്ത് ദിവസമായി ഉയർത്തി. വിദേശ ഇനങ്ങൾ ഉൾപ്പെടെ ലക്ഷക്കണക്കിന് പൂക്കളാണ് പ്രദർശനത്തിൽ ഒരുക്കിയിട്ടുള്ളത്. തമിഴ്‌നാട് ഹോർട്ടി കൾച്ചർ ഡിപ്പാർട്ട്‌മെന്റും നീലഗിരി ജില്ലാ ഭരണകൂടവും സംയുക്തമായി നടത്തുന്ന ഫ്ളവർ ഷോയോടനുബന്ധിച്ച് ഇന്ന് നീലഗിരിയിൽ ജില്ലാ കലക്ടർ പ്രാദേശിക അവധി പ്രഖ്യാപിച്ചു. 

ഊട്ടിയിൽ പൊലിസ് സുരക്ഷ ശക്തമാക്കിയിട്ടുണ്ട്. 500റോളം പൊലിസ് ഉദ്യോഗസ്ഥരെയാണ് അധികം വിന്യസിച്ചത്. അതേസമയം ഹൈക്കോടതി നിർദേശ പ്രകാരം ഊട്ടിയിലേക്ക് വാഹനങ്ങൾക്ക് ഏർപ്പെടുത്തിയ നിയന്ത്രണം തുടരും. തിങ്കൾ മുതൽ വെള്ളി വരെ 6000 വാഹനങ്ങൾക്കും ശനി, ഞായർ ദിവസങ്ങളിൽ 8000 വാഹനങ്ങൾക്കുമാണ് പ്രവേശിക്കാനാകുക. ഇതിനായി ഇ പാസ് എടുക്കണം. 12 മീറ്ററിൽ കൂടുതൽ നീളമുള്ള വാഹനങ്ങൾക്ക് പ്രവേശന വിലക്കുമുണ്ട്.