ഖാര്‍ത്തൂം: സുഡാന്‍ തലസ്ഥാനമായ ഖാര്‍ത്തൂമിലും പടിഞ്ഞാറന്‍ സുഡാനിലെ നോര്‍ത്ത് ഡാര്‍ഫര്‍ സ്‌റ്റേറ്റിലെ എല്‍ ഫാഷര്‍ നഗരത്തിലും അര്‍ദ്ധസൈനിക റാപ്പിഡ് സപ്പോര്‍ട്ട് ഫോഴ്‌സ് (ആര്‍എസ്എഫ്) നടത്തിയ ഷെല്ലാക്രമണത്തില്‍ എട്ട് സിവിലിയന്മാര്‍ കൊല്ലപ്പെടുകയും 53 പേര്‍ക്ക് പരുക്കേല്‍ക്കുകയും ചെയ്തു.

ഖാര്‍ത്തൂമിന് വടക്ക്, ഒംദുര്‍മാന്‍ നഗരത്തിലെ കരാരി പ്രദേശത്തും, കിഴക്ക് ഖാര്‍ത്തൂമിന് കിഴക്കുള്ള ഷാര്‍ഖ് അല്‍നീല്‍ (ഈസ്റ്റ് നൈല്‍) പ്രദേശത്തും സിവിലിയന്മാര്‍ക്കെതിരെ ആര്‍എസ്എഫ് സൈന്യം ശനിയാഴ്ചയും ഷെല്ലാക്രമണം തുടര്‍ന്നു. ഇതില്‍ 4 സിവിലിയന്മാര്‍ കൊല്ലപ്പെടുകയും 43 പേര്‍ക്ക് പരുക്കേല്‍ക്കുകയും ചെയ്തു. ഖാര്‍ത്തൂം ആരോഗ്യ മന്ത്രാലയം ഒരു പ്രസ്താവനയില്‍ അറിയിച്ചു.

പരുക്കേറ്റവരെ ഒംദുര്‍മാനിലെ അല്‍നോ, അബു സൈദ് ആശുപത്രികളിലും ഷാര്‍ഖ് അല്‍നീല്‍ പ്രദേശത്തെ എല്‍ ബാന്‍ ജാദിദ് ആശുപത്രിയിലും ചികിത്സയ്ക്കായി മാറ്റിയതായി സിന്‍ഹുവ വാര്‍ത്താ ഏജന്‍സി റിപ്പോര്‍ട്ട് ചെയ്തു.

വെള്ളിയാഴ്ച എല്‍ ഫാഷറിലെ പാര്‍പ്പിട പരിസരങ്ങളില്‍ ആര്‍എസ്എഫ് നടത്തിയ ഷെല്ലാക്രമണത്തില്‍ നാല് സിവിലിയന്മാര്‍ കൊല്ലപ്പെടുകയും 10 പേര്‍ക്ക് പരുക്കേല്‍ക്കുകയും ചെയ്തിരുന്നു.