പെസോവ: പോർച്ചുഗീസ് ലീഗ് കപ്പ് സ്വന്തമാക്കി ബെനിഫിക്ക. ഫൈനലിൽ സ്പോർട്ടിങ് ലിസ്ബണിനെ പെനാൽറ്റിയിൽ വീഴ്ത്തിയാണ് ബെനിഫിക്ക ചാമ്പ്യന്മാരായത്. പെനാൽറ്റിയിൽ 7-6 എന്ന സ്കോറിന് മറികടന്നാണ് ബെനിഫിക്ക കിരീടം ചൂടിയത്. നിശ്ചിത സമയത്തിൽ ഇരുടീമുകളും ഓരോ ഗോൾ വീതം നേടി തുല്യത പാലിക്കുകയായിരുന്നു. ബെനിഫിക്കക്കായി ആൻഡ്രിയാസ് ഷ്ജെൽഡെറപ്പ് ആണ് ഗോൾ നേടിയത്. എന്നാൽ വിക്ടർ ഗ്യോക്കറസിലൂടെ സ്പോർട്ടിങ് തിരിച്ചടിക്കുകയായിരുന്നു. 

ബെനിഫിക്കയുടെ ഈ കിരീടനേട്ടത്തിന് പിന്നാലെ സൂപ്പർതാരം എയ്ഞ്ചൽ ഡി മരിയ തന്റെ കരിയറിലെ മറ്റൊരു കിരീടം കൂടിയാണ് നേടിയെടുത്തത്. തന്റെ ഫുട്ബോൾ കരിയറിലെ 36-ാമത് കിരീടമായിരുന്നു ഡി മരിയ സ്വന്തമാക്കിയത്. ഇതോടെ ഫുട്ബോൾ ചരിത്രത്തിൽ ഏറ്റവും കൂടുതൽ കിരീടം നേടിയ താരങ്ങളുടെ പട്ടികയിൽ ക്രിസ്റ്റ്യാനോ റൊണാൾഡോയെ മറികടന്ന് മുന്നേറാനും ഡി മരിയക്ക് സാധിച്ചു. 35 കിരീടങ്ങളായിരുന്നു റൊണാൾഡോ ഇതുവരെ നേടിയിട്ടുള്ളത്. 

ഈ കിരീടനേട്ടത്തോടെ 36 കിരീടങ്ങൾ സ്വന്തമാക്കിയ സെർജിയോ ബുസ്‌ക്വെറ്റ്‌സ്, റയാൻ ഗിഗ്‌സ് എന്നിവർക്കൊപ്പമെത്താനും ഡി മരിയക്ക് സാധിച്ചു. ഫുട്ബോൾ ചരിത്രത്തിൽ ഏറ്റവും കൂടുതൽ കിരീടങ്ങൾ നേടിയ താരങ്ങളുടെ പട്ടികയിൽ ലയണൽ മെസി (46), ഡാനി ആൽവസ് (43), ആന്ദ്രേസ് ഇനിയേസ്റ്റ (38), ജെറാർഡ് പിക്വെ (38), മാക്‌സ്‌വെൽ (37) എന്നിവരാണ് ഡി മരിയയുടെ മുന്നിൽ ഉള്ളത്.

ടൂർണമെന്റിന്റെ സെമി ഫൈനലിൽ തകർപ്പൻ പ്രകടനമായിരുന്നു ഡി മരിയ നടത്തിയിരുന്നത്. ബ്രാഗയെ എതിരില്ലാത്ത മൂന്ന് ഗോളുകൾക്ക് വീഴ്ത്തിയാണ് ബെനിഫിക്ക ഫൈനലിലേക്ക് മുന്നേറിയത്. മത്സരത്തിൽ ഇരട്ടഗോൾ നേടിയായിരുന്നു ഡി മരിയ തിളങ്ങിയത്.