അബൂദബി: അബൂദബിയിലെ അൽ അലിയ ദ്വീപിൽ പുതിയ ഫെറി ടെർമിനൽ തുടങ്ങി. താമസക്കാർക്കും സന്ദർശകർക്കും യാത്ര സംവിധാനം മെച്ചപ്പെടുത്തുന്നതിന്റെ ഭാ​ഗമായാണ് ഈ പുതിയ പദ്ധതി. ഇന്റ​ഗ്രേറ്റഡ് ട്രാൻസ്പോർട്ട് സെന്ററും (അബൂദബി മൊബിലിറ്റി) അബൂദബി മാരിടൈമും സഹകരിച്ചാണ് പുതിയ ടെർമിനൽ ആരംഭിക്കുന്നത്. അൽ അലിയ ദ്വീപിനെ അബൂദബിയുടെ മറ്റ് ഭാ​ഗങ്ങളുമായി പുതിയ ടെർമിനൽ ബന്ധിപ്പിക്കും. കൂടാതെ, അതിവേ​ഗം ചരക്കുകൾ എത്തിക്കാനും താമസക്കാർക്കും, സന്ദർശകർക്കും, തൊഴിലാളികൾക്കും അവരുടെ യാത്ര എളുപ്പമാക്കാനും പുതിയ ടെർമിനൽ സഹായിക്കും. 

3,900 ചതുരശ്ര മീറ്ററാണ് അത്യാധുനിക സൗകര്യങ്ങളോടെ നിർമിച്ചിരിക്കുന്ന പുതിയ ടെർമിനലിന്റെ ആകെ വിസ്തീർണ്ണം. പുതിയ ടെർമിനലിൽ അറുപതോളം യാത്രക്കാർക്കുള്ള ഇരിപ്പിടം ഒരുക്കിയിട്ടുണ്ട്. റോറോ കപ്പലുകൾ ഇറക്കുന്നതിനും കയറ്റുന്നതിനുമുള്ള 15 മീറ്റർ, 12.5 മീറ്റർ ബർത്തുകൾ, ഓഫീസ് കെട്ടിടം, ഏഴ് പാർക്കിങ് സ്ഥലങ്ങളും, ആറ് ട്രക്ക് പാർക്കിങ് കേന്ദ്രങ്ങളും, ക്രൂ താമസ സൗകര്യം എന്നിവയെല്ലാം പുതിയ ടെർമിനലിൽ ഉൾപ്പെടുന്നു.

സമുദ്ര മേഖല കൂടുതൽ മെച്ചപ്പെടുത്തുന്നതിന്റെയും, സമുദ്ര ​ഗതാ​ഗതത്തെ പിന്തുണക്കുന്നതിന് ആവശ്യമായ സുസ്ഥിര പരിഹാരങ്ങൾ കണ്ടെത്തുന്നതിന്റെയും ഭാ​ഗമായാണ് പുതിയ ടെർമിനൽ ആരംഭിച്ചതെന്ന് ഇന്റഗ്രേറ്റഡ് ട്രാന്‍സ്‌പോര്‍ട്ട് സെന്ററിന്റെ ആക്ടിംഗ് ഡയറക്ടര്‍ ജനറല്‍ ഡോ. അബ്ദുള്ള ഹമദ് അല്‍ ഗ്ഫെലി വ്യക്തമാക്കി.

Abu Dhabi has inaugurated a new ferry terminal on Al Alia Island, enhancing travel convenience for residents and visitors while connecting the island to other parts of the city.