കൊച്ചി: സംസ്ഥാനത്ത് കഞ്ചാവും മയക്കുമരുന്നുമടക്കമുള്ള ലഹരി കടത്തിനെതിരെ എക്സൈസ് വകുപ്പിന്റെ ശക്തമായ പരിശോധന തുടരുന്നു. അടിമാലിയിലും ചങ്ങനാശ്ശേരിയിലും നടന്ന റെയ്ഡുകളിൽ 3.5 കിലോഗ്രാം കഞ്ചാവും കുട്ടനാട്ടിൽ 11 ലിറ്റർ ചാരായവുമടക്കം പിടികൂടി.

അടിമാലിയിൽ 19 കാരൻ പിടിയിൽ
അടിമാലിയിൽ 2 കിലോയിലധികം കഞ്ചാവുമായി രാജാക്കാട് സ്വദേശി അഭിനന്ദ് എസ് (19) എക്സൈസ് സംഘത്തിന്റെ പിടിയിലായി. നർക്കോട്ടിക് എക്സൈസ് സ്ക്വാഡ് സർക്കിൾ ഇൻസ്പെക്ടർ മനൂപ് വി.പി.യുടെ നേതൃത്വത്തിലുള്ള സംഘമാണ് പ്രതിയെ പിടികൂടിയത്. അസിസ്റ്റന്റ് എക്സൈസ് ഇൻസ്പെക്ടർ (ഗ്രേഡ്) കെ.എം. അഷ്റഫ്, ദിലീപ് എൻ.കെ., പ്രിവന്റീവ് ഓഫീസർ ബിജു മാത്യു, സിവിൽ എക്സൈസ് ഓഫീസർമാരായ അബ്ദുൽ ലത്തീഫ് സി.എം., മുഹമ്മദ് ഷാൻ കെ.എസ്., ബിബിൻ ജെയിംസ്, സുബിൻ പി. വർഗീസ്, സിവിൽ എക്സൈസ് ഓഫീസർ ഡ്രൈവർ നിതിൻ ജോണി എന്നിവരും റെയ്ഡിൽ പങ്കെടുത്തു.

ചങ്ങനാശ്ശേരിയിൽ അസം സ്വദേശിയിൽ നിന്ന് 1.5 കിലോ കഞ്ചാവ് പിടിച്ചു
ചങ്ങനാശ്ശേരിയിൽ 1.5 കിലോഗ്രാം കഞ്ചാവുമായി അസം സ്വദേശി അസിം ചങ്ങ് മയ് (35) പിടിയിലായി. എക്സൈസ് സ്പെഷ്യൽ സ്ക്വാഡാണ് പ്രതിയെ അറസ്റ്റ് ചെയ്തത്. ഇൻസ്പെക്ടർ രാജേഷ് പി.ജി., അസിസ്റ്റന്റ് എക്സൈസ് ഇൻസ്പെക്ടർ അരുൺ സി. ദാസ്, സിവിൽ എക്സൈസ് ഓഫീസർമാരായ അരുൺ ലാൽ, ദീപക് സോമൻ, സിവിൽ എക്സൈസ് ഡ്രൈവർ ബിബിൻ റോയ് എന്നിവരാണ് റെയ്ഡിൽ പങ്കെടുത്തത്.

കുട്ടനാട്ടിൽ 11 ലിറ്റർ ചാരായവുമായി ഒരാൾ പിടിയിൽ
കുട്ടനാട്ടിൽ വീട്ടിൽ സൂക്ഷിച്ച 11 ലിറ്റർ ചാരായവുമായി കാവാലം സ്വദേശി ഷാജി കെ.ബി. (58) പിടിയിലായി. കുട്ടനാട് എക്സൈസ് റേഞ്ച് ഇൻസ്പെക്ടർ കെ.ആർ. അനിൽ കുമാറിന്റെ നേതൃത്വത്തിലാണ് റെയ്ഡ് നടന്നത്. അസിസ്റ്റന്റ് എക്സൈസ് ഇൻസ്പെക്ടർ (ഗ്രേഡ്) സതീഷ് കുമാർ എസ്., പ്രിവന്റീവ് ഓഫീസർ (ഗ്രേഡ്) ശ്രീജിത്ത് എസ്., സിവിൽ എക്സൈസ് ഓഫീസർമാരായ ഷെഫീഖ്, അരുൺ പി.ജി., വനിതാ സിവിൽ എക്സൈസ് ഓഫീസർ ധനലക്ഷ്മി എന്നിവരും പരിശോധനയിൽ പങ്കെടുത്തു.

മയക്കുമരുന്ന് വിരുദ്ധ പ്രവർത്തനങ്ങൾ കൂടുതൽ ശക്തമാക്കുമെന്ന് എക്സൈസ് വകുപ്പ് വ്യക്തമാക്കി.