ചെന്നൈ: ഐപിഎല്ലിൽ ചെന്നൈ സൂപ്പർ കിങ്സിനെതിരെ തകർപ്പൻ ബൗളിംഗ് പ്രകടനവുമായി മലയാളി താരം വിഘ്നേഷ് പുത്തൂർ. ചെന്നൈയ്ക്കെതിരെ രോഹിത് ശർമ്മയ്ക്ക് പകരം ഇമ്പാക്ട് പ്ലെയർ ആയാണ് വിഘ്‌നേശ് കളത്തിലിറങ്ങിയത്. മത്സരത്തിൽ മൂന്ന് വിക്കറ്റുകളാണ് താരം നേടിയത്. തന്റെ ആദ്യ ഓവറിൽ തന്നെ ചെന്നൈ നായകൻ ഋതുരാജ് ഗെയ്ക്വാദിനെ പുറത്താക്കിയാണ് കേരള താരം തന്റെ വിക്കറ്റ് വേട്ടക്ക് തുടക്കം കുറിച്ചത്.  പിന്നീട് ശിവം ദുബെ,  ദീപക് ഹൂഡ എന്നിവരെയും വീഴ്ത്തി വിഘ്‌നേഷ് തിളങ്ങി. 

വിഗ്നേഷ്  തന്റെ ആദ്യ ഐപിഎൽ മത്സരത്തിൽ തന്നെ മിന്നും പ്രകടനം കൊണ്ട് ശ്രദ്ധ പിടിച്ചു പറ്റിയിരിക്കുകയാണ്. മലപ്പുറം ജില്ലയിലെ പെരിന്തൽമണ്ണ സ്വദേശിയാണ് വിഗ്നേഷ്. മെഗാ ലേലത്തിൽ ലയത്തിൽ 30 ലക്ഷം രൂപയ്ക്ക് ആയിരുന്നു ഈ 23കാരനെ മുംബൈ ഇന്ത്യൻസ് സ്വന്തമാക്കിയത്. അണ്ടർ 14, അണ്ടർ 19 വിഭാഗത്തിൽ കേരള ടീമിന് വേണ്ടി താരം കളിച്ചിട്ടുണ്ട്. കേരള ക്രിക്കറ്റ് ലീഗിലെ ആദ്യ സീസണിൽ ആലപ്പിൾസിന് വേണ്ടിയായിരുന്നു വിഘ്‌നേഷ് കളിച്ചിരുന്നത്. ജോളി റോവേഴ്സ് ക്രിക്കറ്റ് ക്ലബ്ബിനു വേണ്ടി നടത്തിയ തകർപ്പൻ പ്രകടനങ്ങൾ ആയിരുന്നു താരത്തെ കേരള ക്രിക്കറ്റിൽ ലീഗിൽ എത്തിച്ചത്.

അതേസമയം ചെന്നൈയുടെ തട്ടകമായ എംഎ ചിദംബരം സ്റ്റേഡിയത്തിൽ നടക്കുന്ന മത്സരത്തിൽ ടോസ് നേടിയ ചെന്നൈ നായകൻ ഋതുരാജ് ഗെയ്ക്‌വാദ് ബൗളിംഗ് തെരഞ്ഞെടുക്കുകയായിരുന്നു. ആദ്യം ബാറ്റ് ചെയ്ത മുംബൈ ഒമ്പത് വിക്കറ്റ് നഷ്ടത്തിൽ 155 റൺസാണ് നേടിയത്. 25 പന്തിൽ 31 റൺസ് നേടിയ തിലക് വർമ്മയാണ് മുംബൈ നിരയിലെ ടോപ്പ് സ്കോറർ. രണ്ടു വീതം ഫോറുകളും സിക്സുകളും ആണ് തിലക് നേടിയത്. സൂര്യകുമാർ യാദവ് 26 പന്തിൽ 29 റൺസും ദീപക് ചഹർ 15 പന്തിൽ പുറത്താവാതെ 28 റൺസ് നേടി  മുംബൈയെ മാന്യമായ സ്കോറിലേക്ക് നയിക്കുന്നതിൽ നിർണായക പങ്കുവഹിച്ചു. 

ചെന്നൈയുടെ ബൗളിംഗ് നിരയിൽ നൂർ അഹമ്മദ് നാല് വിക്കറ്റുകൾ നേടി തകർപ്പൻ പ്രകടനമാണ് നടത്തിയത്. നാല് ഓവറിൽ വെറും 18 റൺസ് മാത്രം വിട്ടുനൽകിയാണ് താരം നാല് വിക്കറ്റുകൾ സ്വന്തമാക്കിയത്.  ഖലീൽ അഹമ്മദ് മൂന്ന് വിക്കറ്റുകളും നേടി തിളങ്ങി. ആർ അശ്വിൻ, നഥാൻ എലിയാസ് എന്നിവർ ഓരോ വിക്കറ്റ് വീതവും നേടി.

Vignesh Puthur great performance in first match ipl 2025 Mumbai Indians vs Chennai Super Kings