സ്വര്‍ണവില ദിനംപ്രതി കുതിച്ചുയരുകയാണല്ലോ. ഓരോ ദിവസവും വന്‍ കുതിപ്പാണ് സ്വര്‍ണ വിലയിലുണ്ടാവുന്നത്.കഴിഞ്ഞയാഴ്ച പ്രതീക്ഷയുണര്‍ത്തി നേരിയ വിലക്കുറവുണ്ടായെങ്കിലും തൊട്ടടുത്തയാഴ്ച വന്‍കുതിപ്പിനാണ് കേരളത്തിലെ സ്വര്‍ണ വിപണി സാക്ഷ്യം വഹിച്ചത്. ഒരു മാസത്തിനിടെ 6.70 ശതമാനം വര്‍ധനയാണുണ്ടായതെന്ന് നിരീക്ഷകര്‍ ചൂണ്ടിക്കാട്ടുന്നു. 

ആഗോളതലത്തിലെ വില തന്നെയാണ് സ്വാഭാവികമായും കേരളത്തിലും പ്രതിഫലിക്കുന്നത്. കൂടാതെ ട്രംപിന്റെ തീരുവ പ്രഖ്യാപനങ്ങളും സ്വര്‍ണ വിപണിയെ ബാധിക്കുന്നു. വ്യാപാര യുദ്ധത്തിന്റെ ഭീതിയിലാണ് ലോകം. കഴിഞ്ഞ ദിവസമാണ് യു.എസില്‍ ഇറക്കുമതി ചെയ്യുന്ന എല്ലാ വാഹനങ്ങള്‍ക്കും ട്രംപ് തീരുവ ഏര്‍പെടുത്തിയത്. ഇതോടെ സ്വര്‍ണ വില എക്കാലത്തേയും റെക്കോര്‍ഡിലേക്ക് കുതിച്ചു. സര്‍വ്വകാല റെക്കോര്‍ഡായിരുന്നു കഴിഞ്ഞ ദിവസം സ്വര്‍ണ വിലയില്‍. ഇന്നും വില ഉയര്‍ന്ന പുതിയ റെക്കോര്‍ഡില്‍ നില്‍ക്കുകയാണ് സ്വര്‍ണം.  2025 ല്‍ മാത്രം കുറഞ്ഞത് 15 തവണ വിലയിലെ റെക്കോഡ് സ്വര്‍ണം തകര്‍ത്തിട്ടുണ്ട്.

ഇന്നത്തെ വില അറിയാം

22കാരറ്റ്
ഒരു ഗ്രാം വര്‍ധന 20 രൂപ, ഗ്രാം വില 8,360
പവന്‍ വര്‍ധന 160 രൂപ, പവന്‍ വില 66,880

24 കാരറ്റ്
ഒരു ഗ്രാം വര്‍ധന 22 രൂപ, ഗ്രാം വില 9,120
പവന്‍ വര്‍ധന 176 രൂപ, പവന്‍ വില 72,960

18 കാരറ്റ്
ഒരു ഗ്രാം വര്‍ധന 16 രൂപ, ഗ്രാം വില 6,840
പവന്‍ വര്‍ധന 128 രൂപ, പവന്‍ വില 54,720

എട്ട് ഗ്രാം ആണ് ഒരു പവന്‍ ആയി കണക്കാക്കുന്നത്. പവന്‍ സ്വര്‍ണം വാങ്ങാനാണ് ഈ വില. വിവാഹാവശ്യത്തിനും മറ്റും ഉപയോഗിക്കാന്‍ സ്വര്‍ണം ആഭരണമായാണ് സാധാരണ വാങ്ങിക്കുന്നത്. സ്വര്‍ണം ആഭരണമായി വാങ്ങുമ്പോള്‍ ഈ വില മതിയാവില്ല.

ജിഎസ്ടി, ഹാള്‍മാര്‍ക്കിംഗ് നിരക്കുകള്‍ ഒപ്പം പണിക്കൂലിയും ഒരു ആഭരണത്തിന് മേല്‍ അധികം വരും. പണിക്കൂലിയിലും വ്യത്യാസമുണ്ട്. ഡിസൈന്‍ അനുസരിച്ചാണ് പണിക്കൂലി വരിക. ഡിസൈന്‍ കൂടുന്നതനുസരിച്ച് പണിക്കൂലിയും കൂടും. ഇതനുസരിച്ച് പവന്‍ സ്വര്‍ണാഭരണം വാങ്ങണമെങ്കില്‍ 70,000 രൂപ മതിയാവില്ലെന്നും വ്യാപാരികള്‍ അറിയിക്കുന്നു.

ജനുവരി ഒന്നിന് പവന് 57,200 രൂപയുള്ളിടത്ത് നിന്നാണ് മാര്‍ച്ച് 28 ആയപ്പോഴേക്കും 66,720 ലെത്തി നില്‍ക്കുന്നത്.

അതേ സമയം, സ്വര്‍ണത്തിന് മാത്രമല്ല വില വര്‍ധിക്കുന്നത്. പാവങ്ങളുടെ ഡയമണ്ട് എന്നറിയപ്പെടുന്ന വെള്ളിയും വന്‍കുതിപ്പാണ് വിലയില്‍ നടത്തുന്നത്. കഴിഞ്ഞ കുറച്ച് ദിവങ്ങളിലെ വില നിലവാരം നോക്കിയാല്‍ മനസ്സിലാവും വെള്ളിയുടെ കുതിപ്പ്. അതനുസരിച്ച് ഇന്ന് വെള്ളി വാങ്ങി സൂക്ഷിച്ചാല്‍ വര്‍ഷങ്ങള്‍ക്കുള്ളില്‍ ലാഭം കൊയ്യാന്‍ കഴിയുമെന്നാണ് കണക്കുകൂട്ടല്‍.  ഇപ്പോള്‍ തന്നെ പാവപ്പെട്ടവരുടെ ഡയമണ്ട് എന്നതില്‍ നിന്നും വെള്ളിയെ മാറ്റേണ്ടി വരുമോ എന്ന ചോദ്യമുയര്‍ത്തുന്ന വിധത്തിലാണ് കുതിപ്പ്. 2014ല്‍ സ്വര്‍ണ വില 26 ശതമാനമാണ് ഉയര്‍ന്നതെങ്കില്‍ വെള്ളിയില്‍ 37 ശതമാനത്തിന്റെ വിലക്കൂടുതലാണ് വെള്ളിക്കുണ്ടായിട്ടുള്ളത്. ആഗോള വിപണിയിലും സ്വര്‍ണവിലയും രെക്കോര്‍ഡികളാണ് സൃഷ്ടിക്കുന്നത്. 

കഴിഞ്ഞ വര്‍ഷം ആദ്യത്തില്‍ ഔണ്‍സ് വെള്ളിക്ക് 30 ഡോളര്‍ ആയിരുന്നു വിലയെങ്കില്‍ മെയ് മാസത്തോടെ അത് 32 ഡോളറായി. ഒക്ടോബര്‍ ആയപ്പോഴേക്കും 34 ഡോളറിലേക്ക് ഉയര്‍ന്നു. ഡിസംബറില്‍ ചെറിയ ഒരു വിലക്കുറവ് വെള്ളി രേഖപ്പെടുത്തിയിരുന്നു. 

ട്രംപിന്റെ താരിഫ് ഭീഷമി ഉള്‍പെടെ സ്വര്‍ണവില വര്‍ധിക്കാന്‍ കാരണമായ ഘടകങ്ങള്‍ തന്നെയാണ് വെള്ളിയേയും സ്വാധീനിക്കുന്നത്. സ്വര്‍ണം പോലെ വെള്ളിയും ആളുകള്‍ വാങ്ങിക്കൂട്ടുകയാണ്. വെള്ളിക്ക് വന്‍തോതില്‍ ആവശ്യമുരുന്നതും വില കൂടാന്‍ കാരണമാണ്. ഇലക്ട്രോണിക് വെഹിക്കിള്‍, സോളാര്‍ എനര്‍ജി തുടങ്ങിയ വ്യവസായ മേഖലകളിലും വെള്ളി ആവശ്യമാണ്. വെള്ളി ആഭരണങ്ങള്‍ക്കും പ്രിയം ഏറി വരികയാണ്.