ദുബൈ: ദെയ്‌റയും ബര്‍ദുബായിയെയും തമ്മില്‍ ബന്ധിപ്പിക്കുന്നതിനായി ദുബൈ ക്രീക്കിന് മുകളിലൂടെ എട്ടുവരി പാലം നിര്‍മിക്കുന്നു. മേഖലയിലെ ഗതാഗത കുരുക്ക് കുറയ്ക്കുന്നതിനും സൗകര്യം വര്‍ദ്ധിപ്പിക്കുന്നതിനും ഈ പാലം സഹായിക്കും. റോഡ് ആന്‍ഡ് ട്രാന്‍സ്‌പോര്‍ട്ട് അതോറിറ്റി (ആര്‍ടിഎ) പറയുന്നത് പ്രകാരം, 78.6 കോടി ദിര്‍ഹം ചെലവിലാണ് ഈ പാലം നിര്‍മിക്കുന്നത്. 1,425 മീറ്റര്‍ നീളമുള്ള ഈ പാലത്തില്‍ ഓരോ ദിശയിലും നാല് വരി പാതകള്‍ ഉണ്ടാകും.

ഇന്‍ഫിനിറ്റി ബ്രിഡ്ജിനെയും പോര്‍ട്ട് റാഷിദ് ഡവലപ്‌മെന്റ് ഏരിയയെയും ബന്ധിപ്പിക്കുന്നതായിരിക്കുെം ഈ പുതിയ പാലം. മണിക്കൂറില്‍ 16,000 വാഹനങ്ങള്‍ക്ക് കടന്നു പോകാനാവുന്ന തരത്തിലായിരിക്കും പാലത്തിന്റെ നിര്‍മ്മിതി. ദുബൈ ക്രീക്കിന്റെ ഉപരിതലത്തില്‍ നിന്ന് 18.5 മീറ്റര്‍ ഉയരത്തിലാണ് പാലം നിര്‍മിക്കപ്പെടുന്നത്. കപ്പലുകള്‍ക്ക് എളുപ്പത്തില്‍ കടന്നുപോകാന്‍ വേണ്ടി 75 മീറ്റര്‍ വീതിയുള്ള നാവിഗേഷന്‍ ചാനലും ഇതില്‍ ഉള്‍പ്പെടുത്തിയിട്ടുണ്ട്. കൂടാതെ, കാല്‍നടയാത്രക്കാര്‍ക്കും സൈക്കിള്‍ യാത്രക്കാര്‍ക്കും വേണ്ടി എലിവേറ്റര്‍ സൗകര്യങ്ങളും ഉള്‍പ്പെടുത്തിയിട്ടുണ്ട്.  

ദുബൈ ദ്വീപുകളുടെ ഇരുവശത്തെയും റോഡുകളുമായി പുതിയ പാലത്തെ ബന്ധിപ്പിക്കുന്നതിനായി രണ്ട് കിലോമീറ്റര്‍ നീളത്തിലുള്ള അപ്രോച്ച് റോഡുകള്‍ നിര്‍മിക്കും. ജനസംഖ്യയിലെ വര്‍ധനവിനനുസരിച്ച് ദുബൈയിലെ അടിസ്ഥാന സൗകര്യങ്ങള്‍ വികസിപ്പിക്കുന്നതിന്റെ ഭാഗമായാണ് ഈ പദ്ധതി. 2022ല്‍ ദുബൈയിലെ ജനസംഖ്യ 35 ലക്ഷമായിരുന്നു, 2040 ആകുമ്പോഴേക്ക് ഇത് 58 ലക്ഷമായി ഉയരുമെന്നാണ് കണക്കാക്കുന്നത്. 

കഴിഞ്ഞ ഒക്ടോബറില്‍ പ്രഖ്യാപിച്ച ബജറ്റില്‍ 46% തുക അടിസ്ഥാന സൗകര്യ വികസനത്തിനായി നീക്കിവച്ചിട്ടുണ്ട്. റോഡുകള്‍, പാലങ്ങള്‍, ഗതാഗത സംവിധാനങ്ങള്‍, പുനരുപയോഗ ഊര്‍ജ്ജ പദ്ധതികള്‍, അല്‍ മക്തൂം ഇന്റര്‍നാഷണല്‍ എയര്‍പോര്‍ട്ട് വികസനം തുടങ്ങിയവയെല്ലാം ഇതില്‍ ഉള്‍പ്പെടുന്നു.

Dubai is building a new 8-lane bridge over Dubai Creek to improve connectivity between Deira and Bur Dubai. This infrastructure project aims to ease traffic congestion and enhance transportation efficiency in the area. The bridge will serve as a vital link, supporting Dubai's growing urban mobility needs.