മനാമ: പ്രവാസികള്‍ക്ക് സന്തോഷവാര്‍ത്തയുമായി ഇന്‍ഡിഗോ എയര്‍ലൈന്‍സ്. ബഹ്‌റൈനില്‍ നിന്നും കൊച്ചിയിലേക്ക് ആരംഭിക്കുന്ന ഇന്‍ഡിഗോയുടെ സര്‍വീസ് മലയാളി പ്രവാസികള്‍ക്ക് ആശ്വാസമാകും. മറ്റു വിമാനക്കമ്പനികള്‍ സര്‍വീസുകള്‍ വെട്ടിച്ചുരുക്കിയ സാഹചര്യത്തില്‍ ഇന്‍ഡിഗോയുടെ നടപടിയെ ഏറെ പ്രതീക്ഷയോടെയാണ് പ്രവാസി മലയാളികള്‍ നോക്കിക്കാണുന്നത്.

ജൂണ്‍ 15ന് ആരംഭിക്കുന്ന സര്‍വീസ് സെപ്റ്റംബര്‍ 20 വരെ ദിവസവും രാത്രി 10:20ന് ബഹ്‌റൈന്‍ കൊച്ചി റൂട്ടിലും വൈകീട്ട് 7:30ന് കൊച്ചി ബഹ്‌റൈന്‍ റൂട്ടിലും സര്‍വീസ് ഉണ്ടായിരിക്കും. 

ജൂലൈ, ആഗസ്റ്റ് മാസങ്ങളിലെ സ്‌കൂള്‍ അഴധിക്കാലത്തും വലിയപെരുന്നാള്‍ സീസണിലെയും യാത്രാസമയങ്ങളില്‍ ഇന്‍ഡിഗോയുടെ സര്‍വീസ് ഏറെ സഹായകരമാകുമെന്നാണ് കരുതുന്നത്. കണക്ഷന്‍ സര്‍വീസിനെ ആശ്രയിക്കേണ്ട ബുദ്ധിമുട്ടിന് ഇതോടെ വലിയ തോതില്‍ അറുതിവരുമന്നാണ് ബഹറൈനിലെ പ്രവാസി മലയാളികള്‍ കരുതുന്നത്. 

ഗള്‍ഫ് എയര്‍ കോഴിക്കോട്ടേക്കുള്ള സര്‍വീസ് പൂര്‍ണമായും നിര്‍ത്തലാക്കിയതോടെ പ്രവാസികള്‍ ബുദ്ധിമുട്ടിലായിരുന്നു. ഈ മാസം ഒന്നു മുതല്‍ 2026 മാര്‍ച്ച് വരെ കൊച്ചിയിലേക്കും തിരിച്ചുമുള്ള ബുധന്‍, ചൊവ്വ ദിവസങ്ങളിലെ സര്‍വീസുകള്‍ എയര്‍ ഇന്ത്യയും വെട്ടിച്ചുരുക്കിയിരുന്നു.

എയര്‍ ഇന്ത്യയുടെ നടപടി മധ്യകേരളത്തിലെയും തെക്കന്‍ കേരളത്തിലെയും പ്രവാസികള്‍ക്ക് തിരിച്ചടിയാകുമ്പോള്‍ എയര്‍ ഗള്‍ഫിന്റെ നടപടി പ്രതികൂലമായി ബാധിക്കുക മലബാര്‍ മേഖലയിലെ പ്രവാസികളെയാണ്.

IndiGo Airlines has launched a direct flight service between Bahrain and Kochi, bringing great relief to Malayali expatriates. The new route enhances travel convenience, reduces transit time, and strengthens connectivity between the Gulf and Kerala. The move is expected to benefit thousands of Keralites living and working in Bahrain.