കോഴിക്കോട്: അടുത്തടുത്ത ദിവസങ്ങളില്‍ മെഡിക്കല്‍ കോളജിലെ അത്യാഹിത വിഭാഗം കെട്ടിടത്തില്‍ തീയും പുകയും ഉണ്ടായതോടെ എല്ലാ നിലയിലേയും യു.പി.എസ് ബാറ്ററികള്‍ മാറ്റാന്‍ തീരുമാനം. ഇതിന്റെ ഭാഗമായി ഒന്നാം നിലയിലെ എം.ആര്‍.ഐ യൂനിറ്റിലെ 120 ബാറ്ററികള്‍ മാറ്റി സ്ഥാപിച്ചു. കഴിഞ്ഞ ദിവസം പുക ഉയര്‍ന്ന ഓപ്പറേഷന്‍ തിയറ്ററിനകത്തെ ബാറ്ററികള്‍ മാറ്റുന്ന പ്രവൃത്തി പുരോഗമിക്കുകയാണ്.    തിങ്കളാഴ്ചത്തെ സംഭവത്തിന് പിന്നാലെ അത്യാഹിത വിഭാഗത്തില്‍ ഫൊറന്‍സിക് വിദഗ്ധസംഘം വീണ്ടും പരിശോധന നടത്തി. കണ്ണൂര്‍ റീജ്യനല്‍ ഫൊറന്‍സിക് സയന്‍സ് ലാബിലെ സയിന്റിഫിക് ഓഫിസര്‍ ശ്രുതിലേഖയുടെ നേതൃത്വത്തിലായിരുന്നു പരിശോധന.  

നേരത്തെ ഇവിടെ പരിശോധന നടത്തിയ കോഴിക്കോട് നിന്നുള്ള സംഘവും ഒപ്പമുണ്ടായിരുന്നു. രാവിലെ 10.30 നാരംഭിച്ച പരിശോധന ഉച്ചയ്ക്ക് 2.30 വരെ നീണ്ടു. കഴിഞ്ഞ വെള്ളിയാഴ്ച തീപിടിത്തമുണ്ടായ എം.ആര്‍.ഐ സ്‌കാനിങ് മെഷിന്റെ യു.പി.എസ് മുറിയിലാണ് ആദ്യം പരിശോധന നടത്തിയത്.   എം.ആര്‍.ഐ യൂനിറ്റിന്റെ കത്തിയ യു.പി.എസ് ബാറ്ററികള്‍ ഉള്‍പ്പെടെ സംഘം പരിശോധിച്ചു.  തീപിടിത്തമുണ്ടായ രണ്ടിടത്തേയും സാമ്പിളുകള്‍ ശേഖരിച്ചിട്ടുണ്ട്. അപകടസമയത്ത് അത്യാഹിത വിഭാഗത്തിലുണ്ടായിരുന്ന ഡോക്ടര്‍മാര്‍, ജീവനക്കാര്‍, എം.ആര്‍.ഐ എടുക്കാന്‍ വന്ന രോഗികളുടെ ബന്ധുക്കള്‍ എന്നിവരില്‍ നിന്നും വിവരങ്ങള്‍ ശേഖരിച്ചു.

യു.പി.എസ് നിര്‍മാതാക്കളോടും ആന്വല്‍ മെയിന്റന്‍സ് കോണ്‍ട്രാക്ട് (എ.എം.സി) എടുത്ത കമ്പനിയോടും വിശദീകരണം തേടിയിട്ടുണ്ട്. തിങ്കളാഴ്ച പകല്‍ പുക ഉയര്‍ന്ന ആറാം നിലയിലും സംഘം പരിശോധന നടത്തി.  പി.ഡബ്ല്യു.ഡി ഇലക്ട്രിക്കല്‍ വിഭാഗവും ഇലക്ട്രിക്കല്‍ ഇന്‍സ്‌പെക്ടറേറ്റും കെട്ടിടത്തില്‍ പരിശോധ നടത്തിയിരുന്നു.