കുവൈത്ത് സിറ്റി: രാജ്യത്തെ നിയമങ്ങളും ചട്ടങ്ങളും കാറ്റില്‍പ്പറത്തി മുതലയെ വളര്‍ത്തിയ സ്വദേശി കുവൈത്തില്‍ പിടിയില്‍. ചെക്ക്‌പോസ്റ്റില്‍ സാധാരണയായി നടത്തുന്ന പരിശോധനയ്ക്കിടയിലാണ് മുതലയുമായി യുവാവിനെ പിടികൂടിയത്.

കുവൈത്ത് സിറ്റിയുടെ തെക്ക് ഭാഗത്തുള്ള ഫര്‍വാനിയ ഗവര്‍ണറേറ്റിലെ ഉദ്യോഗസ്ഥര്‍, അബ്ദുല്ല അല്‍ മുബാറക് പ്രദേശത്ത് നടത്തിയ പതിവ് പരിശോധനയ്ക്കിടെ വാഹനത്തിലെ ഒരു പെട്ടിയില്‍ മുതലയെ കണ്ടെത്തിയതിനെ തുടര്‍ന്ന്, മുപ്പത് വയസ്സ് തോന്നിക്കുന്ന വ്യക്തിയെ ജനറല്‍ ഡിപ്പാര്‍ട്ട്‌മെന്റ് ഓഫ് എന്‍വയോണ്‍മെന്റ് വിഭാഗത്തിലേക്ക് റഫര്‍ ചെയ്തതായി അല്‍ അന്‍ബ പത്രം റിപ്പോര്‍ട്ട് ചെയ്തു.

ചെക്ക്‌പോസ്റ്റിലൂടെ കടന്നുപോകുമ്പോള്‍ ഇയാള്‍ പരിഭ്രാന്തനായി കാണപ്പെട്ടതിനെ തുടര്‍ന്ന് പൊലിസ് ഇയാളുടെ വാഹനം പരിശോധിക്കുകയായിരുന്നു. ചോദ്യം ചെയ്യലില്‍ ഇത് തന്റെ വളര്‍ത്തു മുതലയെന്നാണ് യുവാവ് പറഞ്ഞത്. 

കുവൈത്തില്‍ വന്യമൃഗങ്ങളെ വേട്ടയാടുന്നതും മാരകമായ ആക്രമണങ്ങള്‍ നടത്തുന്നതും ഉള്‍പ്പെടെയുള്ള നിരവധി സംഭവങ്ങള്‍ക്ക് ശേഷം വന്യമൃഗങ്ങളെ വളര്‍ത്തുന്നത് കുറ്റകരമാക്കുന്ന നിയമം കൊണ്ടുവന്നിരുന്നു.

പബ്ലിക് അതോറിറ്റി ഫോര്‍ അഗ്രികള്‍ച്ചര്‍ ആന്‍ഡ് ഫിഷ് റിസോഴ്‌സസിന്റെ അനുമതിയില്ലാതെ, ഏകദേശം 4.9 ദശലക്ഷം ആളുകള്‍ താമസിക്കുന്ന കുവൈത്തിലേക്ക്  വന്യമൃഗങ്ങളെ കൊണ്ടുവരുന്നത് അധികൃതര്‍ കര്‍ശനമായി വിലക്കിയിട്ടുണ്ട്. വിഷമുള്ള ഉരഗങ്ങള്‍, കുരങ്ങുകള്‍ എന്നിവയെല്ലാം നിരോധിച്ചിരിക്കുന്നു.

A Kuwait citizen was arrested after a check-post inspection revealed he was transporting a crocodile in his vehicle. The man claimed the reptile was his pet, but authorities seized the animal. The incident has raised questions about wildlife transport regulations and the safety risks involved with keeping exotic pets.