ഇന്ത്യയിലെ ഭക്ഷണ വിഭവങ്ങളെ പ്രശംസിച്ച് വിദേശദമ്പതികള്‍. അടുത്തിടെ ഇന്ത്യയിലേക്ക് താമസം മാറിയവരാണ് ഈ ദമ്പതികള്‍. ഇന്ത്യയില്‍ ഒന്നും തന്നെ കഴിക്കാന്‍ പറ്റാത്തതായി ഇല്ല എന്നാണ് വിദേശ ദമ്പതികളായ ഗുരുവും ലിയയും തങ്ങളുടെ ഇന്‍സ്റ്റാഗ്രാം പേജില്‍ പറഞ്ഞത്. വിദേശരാജ്യങ്ങളില്‍ പഴുത്താല്‍ മാത്രം ഉപയോഗിക്കുന്ന ഭക്ഷ്യവിഭവങ്ങള്‍ പോലും ഇന്ത്യയില്‍ പച്ചയ്ക്ക് ഉപയോഗിച്ചാണ് അതിന്റെ സാധ്യത പ്രയോജനപ്പെടുത്തുന്നത് എന്നാണ് ഇവര്‍ പറയുന്നത്.

സര്‍ഗാത്മകമായ ഭക്ഷണരീതി എന്നാണ് ഇവര്‍ ഇന്ത്യന്‍ ഭക്ഷ്യവസ്തുക്കളെയും ഭക്ഷണങ്ങളെയും വിശേഷിപ്പിച്ചത്. പഴുക്കാത്തതും പുളിയുള്ളതുമായ പച്ചമാങ്ങ അച്ചാറായി കഴിക്കുന്നതും പാകമാകാത്ത ചക്ക കറി വയ്ക്കുന്നതും പൂക്കളെ പോലും രുചികരമായ പക്കോഡകളാക്കി മാറ്റുന്നതും ഇന്ത്യന്‍ പാചകത്തിലെ സര്‍ഗാത്മകത തന്നെയാണെന്നാണ് അദ്ദേഹം പറയുന്നത്.

ഇന്ത്യന്‍ ഫോളോവേഴ്‌സില്‍ നിന്ന് വലിയ സ്വീകാര്യതയാണ് ഈ പോസ്റ്റിന് ലഭിച്ചിരിക്കുന്നത്. ഒരാള്‍ കുറിച്ചത്, ഒരു ഇന്ത്യക്കാരന്‍ ആയിരുന്നിട്ടും ഇത്രയും സാധനങ്ങള്‍ ഒരു ദിവസം ഞാന്‍ പച്ചയ്ക്ക് ഉപയോഗിക്കുന്നുണ്ടെന്ന് മനസ്സിലായില്ലെന്നും അത് അറിയാതെ തന്നെ പതിവായി ചെയ്യുകയാണെന്നുമായിരുന്നു.

അതേസമയം തന്നെ മറ്റു ചിലര്‍ കുറിച്ചത് ഇന്ത്യന്‍ ഭക്ഷണരീതി എന്ന് പറഞ്ഞുകൊണ്ട് ഇത്തരം കാര്യങ്ങളെ സാമാന്യവല്‍ക്കരിക്കരുതെന്നും ഇന്ത്യയിലും ഓരോ നാട്ടിലും അവരവരുടേതായ ഭക്ഷണരീതികളും ഉണ്ടെന്നുമാണ്. 

ഇവരുടെ പോസ്റ്റ് നിരവധി ആളുകളുടെ ശ്രദ്ധയാകര്‍ഷിക്കുകയും ഇവരുടെ അഭിപ്രായത്തോട് യോജിക്കുകയും ചെയ്തു. ഇന്ത്യയുടെ സംസ്‌കാരത്തിന്റെ ഭാഗമാണ് ഭക്ഷണമെന്നും അത് കൂടുതല്‍ കാലം ഇന്ത്യയില്‍ നില്‍ക്കുമ്പോള്‍ മനസ്സിലാകുമെന്നും അഭിപ്രായപ്പെട്ടവര്‍ നിരവധിയാണ്. ഏതായാലും പോസ്റ്റ് വളരെ വേഗത്തില്‍ തന്നെ സോഷ്യല്‍ മീഡിയയില്‍ ശ്രദ്ധിക്കപ്പെട്ടു.