തലമുടിയുടെ ആരോഗ്യകാര്യത്തില്‍ വളരെയധികം ശ്രദ്ധിക്കേണ്ടതുണ്ട്. ചര്‍മത്തിനുകൊടുക്കുന്ന അതേ പ്രാധാന്യം തന്നെ തലമുടിക്കും നല്‍കേണ്ടതുണ്ട്. മുടികൊഴിച്ചില്‍, താരന്‍, അകാലനര എന്നിവയാണ് കൂടുതല്‍ ആളുകളെയും ബാധിക്കുന്ന പ്രശ്‌നങ്ങള്‍.

അമിതമായ വിയര്‍പ്പ്, പൊടികള്‍, രാസപദാര്‍ഥങ്ങളടങ്ങിയ ഉല്‍പന്നങ്ങളുടെ ഉപയോഗം ഇങ്ങനെ പല കാരണങ്ങളുമുണ്ട്.  ഇത് തുടക്കത്തില്‍ തന്നെ ശ്രദ്ധിക്കാതെ പോയാല്‍ പിന്നീട് പിടിച്ചാല്‍ കിട്ടാത്ത അവസ്ഥയിലേക്കു പോവാം. വെളിച്ചെണ്ണയ്ക്ക് ധാരാളം ആന്റി ഫംഗല്‍ ആന്റി ബാക്ടീരിയല്‍ ഗുണങ്ങളുണ്ട്.

ഇതില്‍ അടങ്ങിയിരിക്കുന്ന ല്യൂറിക് ആസിഡ് മുടിയിഴകള്‍ക്ക് കറുപ്പ് നിറം നല്‍കുകയും മുടി വരണ്ടു പോകുന്നതു തടയുകയും ചെയ്യും. വെളിച്ചെണ്ണ ശരിയായ രീതിയില്‍ ഉപയോഗപ്പെടുത്തിയാല്‍ കരുത്തുറ്റ, അഴകുള്ള തലമുടി വളര്‍ത്തിയെടുക്കാന്‍ സാധിക്കും. വെളിച്ചെണ്ണയോടൊപ്പം മറ്റു ചില ചേരുവകള്‍ കൂടി കലര്‍ത്തിയാല്‍ അതിന്റെ ഗുണം വര്‍ധിക്കും.

വെളിച്ചണ്ണയും ഉള്ളിനീരും

രണ്ട് ടേബിള്‍ സ്പൂണ്‍ ഉള്ളി നീരിലേക്ക് ഒന്നര ടേബിള്‍ സ്പൂണ്‍ അളവില്‍ വെളിച്ചെണ്ണ ചേര്‍ത്തിളക്കി യോജിപ്പിക്കാം. ഇത് തലയോട്ടിയില്‍ നന്നായി തേച്ചു പിടിപ്പിക്കുക. 20 മിനിറ്റിനു ശേഷം വീര്യം കുറഞ്ഞ ഷാമ്പൂ ഉപയോഗിച്ച് കഴുകിക്കളയാവുന്നതാണ്. 

വെളിച്ചെണ്ണയും ടീട്രീ ഓയിലും

വെളിച്ചെണ്ണയും ടീട്രീ ഓയിലും മുടിക്ക് മികച്ചതാണ്. ഇവ രണ്ടും തുല്യ അളവിലെടുത്ത് യോജിപ്പിക്കുക. ശേഷം ശിരോമ ചര്‍മത്തിലും മുടിയിലും പുരട്ടി 10 മിനിറ്റ് മസാജ് ചെയ്യുക. അരമണിക്കൂര്‍  കഴിഞ്ഞ് കുളിക്കുമ്പോള്‍ വീര്യംകുറഞ്ഞ ഷാമ്പൂ ഉപയോഗിച്ചു കഴികിക്കളയാം.

ഉലുവയും വെളിച്ചെണ്ണയും 

രണ്ട് ടേബിള്‍ സ്പൂണ്‍ ഉലുവയിലേക്ക് കുറച്ച് വെളിച്ചെണ്ണ ഒഴിക്കുക. ഈ എണ്ണ ചെറുതായി ചൂടാക്കിയെടുക്കാം. ഇത് ശിരോചര്‍മത്തിലും മുടിയിഴകളിലും പുരട്ടി മസാജ് ചെയ്യാവുന്നതാണ്. ശേഷം കഴുകിക്കളയാം. ആഴ്ചയില്‍ ഒരിക്കലെങ്കിലും ഇതുപയോഗിക്കാവുന്നതാണ്.

വെളിച്ചെണ്ണയും  റോസ് മേരി എണ്ണയും

വെളിച്ചെണ്ണയും റോസ്‌മേരി എണ്ണയും തുല്യ അളവിലെടുത്ത് മിക്‌സ് ചെയ്യുക. ഇത് തലയോട്ടിയിലും മുടിയിഴകളിലും പുരട്ടി നന്നായി മസാജ് ചെയ്യാം. 20 മിനിറ്റിനു ശേഷം വീര്യം കുറഞ്ഞ ഷാമ്പൂ ഉപയോഗിച്ചു കളയാം.