ന്യൂഡല്‍ഹി: ശക്തമായ കാരണമുണ്ടെങ്കില്‍ വിവാദമായ വഖ്ഫ് ഭേദഗതി നിയമം സ്റ്റേ ചെയ്യുമെന്ന് സൂചനനല്‍കി സുപ്രിംകോടതി. നിയമത്തിലെ വിവാദ വ്യവസ്ഥകള്‍ സ്‌റ്റേചെയ്യുന്ന വിഷയത്തില്‍ ഇന്ന് നടന്ന ഇടക്കാല വിധിക്കായുള്ള വാദത്തിനിടെ ചീഫ് ജസ്റ്റിസ് ബി.ആര്‍ ഗവായ് നേതൃത്വം നല്‍കുന്ന ബെഞ്ച് ആണ് ഇക്കാര്യം പറഞ്ഞത്. എല്ലാ നിയമത്തിനും അനുകൂലമായി ഭരണഘടനാ സാധുതയുണ്ടെന്ന അനുമാനമുണ്ട്. ഇടക്കാല ആശ്വാസം വേണ്ടതുണ്ടെങ്കില്‍ നിങ്ങള്‍ വളരെ ശക്തവും വ്യക്തവുമായ ഒരു കേസ് ഉന്നയിക്കേണ്ടതുണ്ട്. അല്ലെങ്കില്‍, ഇതിനും ഭരണഘടനാ സാധുതയുണ്ടെന്ന അനുമാനമുണ്ടാകുമെന്ന് ചീഫ് ജസ്റ്റിസ് പറഞ്ഞു.

പ്രഥമദൃഷ്ട്യാ തന്നെ ശക്തമാണ് കേസെന്നായിരുന്നു ഇതിന് മുസ്ലിംപക്ഷത്തിന്റെ വാദത്തിന് നേതൃത്വം നല്‍കിയ മുതിര്‍ന്ന അഭിഭാഷകന്‍ കപില്‍ സിബലിന്റെ മറുപടി. നിയമത്തിലെ വ്യവസ്ഥകള്‍ പ്രാബല്യത്തില്‍ വന്നാല്‍ പരിഹരിക്കാനാകാത്ത നഷ്ടമുണ്ടാകുമെന്നും സിബല്‍ അറിയിച്ചു. വഖ്ഫ് ഭേദഗതിക്കെതിരായ സമസ്ത കേരള ജംഇയ്യത്തുല്‍ ഉലമയടക്കമുള്ളവര്‍ നല്‍കിയ ഒരുകൂട്ടം ഹരജികളില്‍ കപില്‍ സിബലിനെക്കൂടാതെ സമസ്തയുടെ അഭിഭാഷകന്‍ അഭിഷേക് മനു സിങ് വി, പ്രമുഖ നിയമജ്ഞരായ രാജീവ് ധവാന്‍, സി.യു സിങ്, ഹുസേഫ അഹമ്മദി തുടങ്ങിയവര്‍ ശക്തമായ വാദമാണ് ഇന്ന് ഉന്നയിച്ചത്. 

കേസ് പരിഗണിക്കവെ, വാദം മുന്‍ ചീഫ് ജസ്റ്റിസ് സഞ്ജീവ് ഖന്നയുടെ ബെഞ്ച് നിശ്ചയിച്ച മൂന്ന് വിഷയങ്ങളില്‍ പരിമിതപ്പെടുത്തണമെന്ന് കേന്ദ്രത്തിന് വേണ്ടി ഹാജരായ സോളിസിറ്റര്‍ ജനറല്‍ തുഷാര്‍ മേത്ത ആവശ്യപ്പെട്ടു. കേന്ദ്രം നല്‍കിയ മറുപടി സത്യവാങ്മൂലം ഈ മുന്ന് വിഷയത്തെ അടിസ്ഥാനപ്പെടുത്തിയാണെന്നായിരുന്നു മേത്തയുടെ വാദം. എന്നാല്‍, ഇതിനെ കപില്‍ സിബലും അഭിഷേക് സിങ് വിയും ശക്തമായി എതിര്‍ത്തു. ഭാഗികമായി വാദം കേള്‍ക്കല്‍ പദ്ധതി പറ്റില്ലെന്ന് ഇരുവരും വ്യക്തമാക്കി. കേസില്‍ ഇന്ന് വാദം പൂര്‍ത്തിയാകാതിരുന്നതോടെ നാളെ വീണ്ടും വാദം തുടരാനും തീരുമാനിച്ചു. പ്രധാനമായും കേന്ദ്രസര്‍ക്കാരിന്റെ വാദമാകും നാളെ കോടതി കേള്‍ക്കുക.

The Supreme Court of India stated it may stay the controversial provisions of the Waqf Act if a strong reason is presented. Senior advocate Kapil Sibal, representing one of the petitioners, asserted that there is a “very strong reason” to challenge these provisions, indicating potential overreach and unconstitutionality in the current form of the Act.