തൃശൂര്‍: നഗരത്തെ ആവേശത്തിമിര്‍പ്പില്‍ ആറാടിച്ച് എന്റെ കേരളം മെഗാ പ്രദര്‍ശന വിപണന മേളയുടെ സാംസ്‌കാരിക ഘോഷയാത്ര. സംസ്ഥാന സര്‍ക്കാരിന്റെ നാലാം വാര്‍ഷികാഘോഷത്തിന്റെ ഭാഗമായി സംഘടിപ്പിക്കുന്ന മേളയുടെ പ്രചരണാര്‍ത്ഥം നടന്ന ഘോഷയാത്രയില്‍ 15,000 ത്തോളം പേര്‍ പങ്കെടുത്തു.

പഞ്ചവാദ്യത്തിന്റെ അകമ്പടിയോടെ ജില്ലയിലെ മുഴുവന്‍ ഗ്രാമപഞ്ചായത്തുകളും നഗരസഭകളും ബ്ലോക്കുകളും ഘോഷയാത്രയുടെ ഭാഗമായി. വിവിധ സര്‍ക്കാര്‍ വകുപ്പുകളില്‍ നിന്നുമുള്ള ജീവനക്കാര്‍ വിവിധ നിശ്ചല ദൃശ്യങ്ങളുടെ അകമ്പടിയോടെ ഘോഷയാത്രയില്‍ പങ്കെടുത്തു.

വൈകീട്ട് നാലരയോടെ നായ്ക്കനാലില്‍ നിന്നാരംഭിച്ച ഘോഷയാത്ര തേക്കിന്‍കാട് വിദ്യാര്‍ഥി കോര്‍ണറില്‍ ആണ് അവസാനിച്ചത്.

മന്ത്രിമാരായ കെ.രാജന്‍, ആര്‍.ബിന്ദു, എം.എല്‍.എമാരായ എ.സി മൊയ്തീന്‍, ഇ.ടി ടൈസണ്‍ , സേവ്യര്‍ ചിറ്റിലപ്പിള്ളി, മുരളി പെരുനെല്ലി, യു.ആര്‍ പ്രദീപ്, ജില്ലാ പഞ്ചായത്ത് പ്രസിഡന്റ് വി.എസ് പ്രിന്‍സ്, വൈസ് പ്രസിഡന്റ് ലതാ ചന്ദ്രന്‍ , കലക്ടര്‍ അര്‍ജുന്‍ പാണ്ഡ്യന്‍, സബ് കലക്ടര്‍ അഖില്‍ വി. മേനോന്‍ പങ്കെടുത്തു.

പ്രദര്‍ശന വിപണന മേള ഉദ്ഘാടനം

തൃശൂര്‍: കേരളം ഒന്നിന് മുന്നിലും തലകുനിക്കില്ലെന്നതിന്റെ ദൃശ്യ സാക്ഷാത്കാരമാണ് എന്റെ കേരളം പ്രദര്‍ശന മേളയെന്ന് മന്ത്രി കെ.രാജന്‍. സംസ്ഥാന സര്‍ക്കാരിന്റെ നാലാം വാര്‍ഷികത്തോടനുബന്ധിച്ച് 24 വരെ തേക്കിന്‍കാട് മൈതാനിയിലെ വിദ്യാര്‍ഥി കോര്‍ണറില്‍ നടക്കുന്ന എന്റെ കേരളം പ്രദര്‍ശന വിപണന മേള ഉദ്ഘാടനം ചെയ്തു സംസാരിക്കുകയായിരുന്നു മന്ത്രി.

എല്ലാവര്‍ക്കും ഭൂമി, എല്ലാവര്‍ക്കും വീട്, എല്ലാവര്‍ക്കും ആരോഗ്യം, എല്ലാവര്‍ക്കും വിദ്യാഭ്യാസം എന്ന വികസന കാഴ്ചപ്പാടോടുകൂടിയാണ് സര്‍ക്കാര്‍ മുന്നോട്ടുപോകുന്ന തെന്ന് മന്ത്രി ഡോ.ആര്‍.ബിന്ദു അധ്യക്ഷ പ്രസംഗത്തില്‍ പറഞ്ഞു.

രണ്ടാംപിണറായി സര്‍ക്കാരിന്റെ നാലാം വാര്‍ഷികം

തൃശൂര്‍ : സര്‍ക്കാരിന്റെ നാലാം വാര്‍ഷിക ആഘോഷങ്ങളുടെ ഭാഗമായി മുഖ്യമന്ത്രി പിണറായി വിജയന്‍ കേരളത്തിലെ സാംസ്‌കാരിക പ്രവര്‍ത്തകരും കലാകാരന്മാരുമായി സംവദിക്കുന്ന 'പരസ്പരം' പരിപാടി നാളെ രാവിലെ 9 മുതല്‍ പുഴയ്ക്കല്‍ ലുലു കണ്‍വന്‍ഷന്‍ സെന്ററില്‍ നടക്കും.

സാംസ്‌കാരിക വകുപ്പ് അഡീഷണല്‍ ചീഫ് സെക്രട്ടറി ഡോ. രാജന്‍ എന്‍. ഖൊബ്രഗഡെ സ്വാഗതം ആശംസിക്കും. മുഖ്യമന്ത്രി പിണറായി വിജയന്‍ ഉദ്ഘാടനം നിര്‍വഹിക്കും. മന്ത്രി സജി ചെറിയാന്‍ അധ്യക്ഷനായിരിക്കും.
മന്ത്രിമാരായ കെ. രാജന്‍, ഡോ. ആര്‍. ബിന്ദു, കേന്ദ്രസഹമന്ത്രി സുരേഷ് ഗോപി, കെ. രാധാകൃഷ്ണന്‍ എം.പി, പി. ബാലചന്ദ്രന്‍ എം.എല്‍.എ, തൃശൂര്‍ നഗരസഭ മേയര്‍ എം.കെ വര്‍ഗീസ്, തൃശൂര്‍ ജില്ലാ പഞ്ചായത്ത് പ്രസിഡന്റ് വി.എസ് പ്രിന്‍സ്, കലക്ടര്‍ അര്‍ജുന്‍ പാണ്ഡ്യന്‍ സംബന്ധിക്കും.

14 ജില്ലകളില്‍ നിന്നായി 2500 സാംസ്‌കാരിക പ്രവര്‍ത്തകര്‍ പങ്കെടുക്കും.