പത്തനംതിട്ട: വരാനിരിക്കുന്ന തെരഞ്ഞെടുപ്പുകൾ ലക്ഷ്യമിട്ട് ഇരട്ടവോട്ടുകൾ കണ്ടെത്തി നിയമപോരാട്ടത്തിന് യു.ഡി.എഫ്. ആറ്റിങ്ങല്‍ ലോക്സഭാ മണ്ഡലത്തിലെ വോട്ടര്‍പ്പട്ടികയിലെ വലിയൊരു വിഭാഗം  ഇരട്ട വോട്ടുകൾ നീക്കം ചെയ്യിച്ച് രണ്ടുതവണയും വിജയം കൊയ്യാൻ നിലവിലെ യു.ഡി.എഫ് കൺവീനർ അടൂർ പ്രകാശിന് സാധിച്ചിരുന്നു. 

സാധാരണ വോട്ടർപ്പട്ടികയിലെ ഇരട്ട വോട്ടുകളിൽ സ്ഥാനാർഥികൾ ആക്ഷേപം ഉന്നയിക്കാറുണ്ടെങ്കിലും തുടർനടപടികൾ കൈക്കൊള്ളാൻ പല കാരണങ്ങൾ കൊണ്ടും കഴിയാറില്ല. എന്നാൽ, അറ്റിങ്ങൽ മണ്ഡലത്തിൽ കഴിഞ്ഞ രണ്ട് തെരഞ്ഞെടുപ്പുകളിലും യു.ഡി.എഫ് സ്ഥാനാർഥിയായിരുന്ന അടൂർ പ്രകാശ് ഇരട്ട വോട്ടുകൾ കണ്ടെത്തി നിയമപോരാട്ടം നടത്തിയിരുന്നു. 2024ലെ ലോക്സഭാ തെരഞ്ഞെടുപ്പിൽ ആറ്റിങ്ങലിലെ ഓരോ നിയമസഭാ മണ്ഡലത്തിലും100 ഇരട്ടവോട്ട് വീതം കണ്ടെത്തിയിരുന്നു. അടൂര്‍ പ്രകാശ് നല്‍കിയ ഇരട്ട വോട്ട് പരാതി ആദ്യം കലക്ടര്‍ തള്ളിയിരുന്നു. തുടര്‍ന്ന് ചീഫ് ഇലക്ഷന്‍ ഏജന്റ് ഹൈക്കോടതിയെ സമീപിച്ചിക്കുകയായിരുന്നു. അന്തിമ വോട്ടര്‍പ്പട്ടികയില്‍ 1.61 ലക്ഷം ഇരട്ടവോട്ടുകളുണ്ടെന്നാണ് ഹരജിയില്‍ പറഞ്ഞത്. വോട്ടർപ്പട്ടിക തയാറാക്കുന്നതിന്റെയും അന്തിമമാക്കുന്നതിന്റെയും ചുമതല തെരഞ്ഞെടുപ്പ് കമ്മിഷനാണെങ്കിലും ഈ ജോലികള്‍ നിര്‍വഹിക്കുന്നത് സര്‍ക്കാര്‍ ഉദ്യോഗസ്ഥരാണ്. പട്ടിക തയാറാക്കുന്നതിന്റെ ഓരോ ഘട്ടത്തിലും അവരുടെ രാഷ്ട്രീയചായ് വ് അനുസരിച്ചാണ് പ്രവര്‍ത്തിക്കുന്നത്. 

ഒരു ബൂത്തിൽ തന്നെ നൂറുകണക്കിന് ഇരട്ടവോട്ടുകളായിരുന്നു ആറ്റിങ്ങൽ മണ്ഡലത്തിൽ കണ്ടെത്തിയിരുന്നത്. 2019ൽ സമാനമായ പരാതി ഉന്നയിച്ചെങ്കിലും നടപടിയെടുക്കുന്നതിൽ അലംഭാവമുണ്ടായി. 2019ൽ 1,12,000 ഇരട്ട വോട്ടുകളാണ് ഉണ്ടായിരുന്നതെങ്കിൽ 2024 ൽ 1,64,006 ആണെന്ന് യു.ഡി.എഫ് ചൂണ്ടിക്കാട്ടിയിരുന്നു. ആകെ വോട്ടർമാരുടെ 8.32 ശതമാനം വ്യാജ വോട്ടുകളാണെന്നായിരുന്നു അടൂർ പ്രകാശിന്റെ വാദം. ഇടതുമുന്നണി കുത്തകയാക്കി വച്ചിരുന്ന മണ്ഡലത്തിൽ  അട്ടിമറി വിജയങ്ങൾ നേടിയ അടൂർ പ്രകാശ് യു.ഡി.എഫ് കൺവീനറായപ്പോൾ കോൺഗ്രസ് നേതൃത്വം അദ്ദേഹത്തിൻ്റെ ആറ്റിങ്ങലിലെ പോരാട്ടവീര്യം എടുത്തുപറയുകയും ചെയ്തു. ഈ വർഷം ഒടുവിൽ നടക്കുന്ന തദ്ദേശ തെരഞ്ഞെടുപ്പിലും അടുത്തവർഷം ആദ്യം നടക്കാനിരിക്കുന്ന നിയമസഭാ തെരഞ്ഞെടുപ്പിലും വോട്ടർപ്പട്ടികയിലെ ഇരട്ട വോട്ടുകളിൽ നിയമപോരാട്ടത്തിന് കളമൊരുങ്ങും. താഴേത്തട്ടുമുതൽ വോട്ടർപ്പട്ടികകളിൽ ആഴത്തിലുള്ള പഠനത്തിനാണ് യു.ഡി.എഫ് ശ്രദ്ധചെലുത്തുക.

The UDF plans to legally challenge the presence of duplicate votes, referencing the "Attingal Model" amid upcoming elections. This move highlights concerns over electoral integrity and the party's efforts to ensure fair polls. The issue of double voting has sparked controversy, with the UDF vowing to take the matter to court to address potential irregularities.