റിയാദ്: സഊദി അറേബ്യയിലേക്കുള്ള സന്ദര്‍ശകരുടെ എണ്ണത്തില്‍ വന്‍ വര്‍ധനവ്. 2024ല്‍ സഊദി അറേബ്യയിലുടനീളമുള്ള വിമാനത്താവളങ്ങളിലൂടെ സഞ്ചരിച്ചവരുടെ ആകെ എണ്ണം 12.8 കോടി കവിഞ്ഞു. മുന്‍ വര്‍ഷത്തെ അപേക്ഷിച്ച് ഇത് 15 ശതമാനം വര്‍ധനവാണ്. ജനറല്‍ അതോറിറ്റി ഫോര്‍ സ്റ്റാറ്റിസ്റ്റിക്‌സ് (GASTAT) ഇന്നലെ പ്രസിദ്ധീകരിച്ച എയര്‍ ട്രാന്‍സ്‌പോര്‍ട്ട് സ്റ്റാറ്റിസ്റ്റിക്‌സ് പബ്ലിക്കേഷന്‍ റിപ്പോര്‍ട്ട് പ്രകാരം 2023നെ അപേക്ഷിച്ച് കഴിഞ്ഞ വര്‍ഷം രാജ്യത്തിന്റെ വിമാനത്താവളങ്ങളില്‍ യാത്രക്കാരുടെയും എയര്‍ കാര്‍ഗോ ഗതാഗതത്തിന്റെയും കാര്യത്തില്‍ ശ്രദ്ധേയമായ വര്‍ധനയുണ്ടായി.

സഊദി സന്ദര്‍ശിച്ചവരുടെ കണക്കുകള്‍ ഇങ്ങനെ

* അന്താരാഷ്ട്ര വിമാന യാത്രക്കാരുടെ എണ്ണം 6.9 കോടി കവിഞ്ഞു. ഇത് 2023നെ അപേക്ഷിച്ച് 14 ശതമാനം വര്‍ധനവാണ്.

* ആഭ്യന്തര വിമാന യാത്രക്കാരുടെ എണ്ണം 5.9 കോടിയും കവിഞ്ഞു. ഇത് മുന്‍ വര്‍ഷത്തെ അപേക്ഷിച്ച് 16 ശതമാനം വര്‍ധനവാണ്. 

* യാത്രക്കാരുടെ എണ്ണത്തില്‍ ജിദ്ദയിലെ കിങ് അബ്ദുല്‍ അസീസ് അന്താരാഷ്ട്ര വിമാനത്താവളം ആണ് ഒന്നാമത്. ഏകദേശം 4.9 കോടി യാത്രക്കാരെയാണ് കിങ് അബ്ദുല്‍ അസീസ് അന്താരാഷ്ട്ര വിമാനത്താവളം സ്വീകരിച്ചത്. തൊട്ട് മുന്‍വര്‍ഷത്തെ അപേക്ഷിച്ച് 14 ശതമാനം വളര്‍ച്ച രേഖപ്പെടുത്തി.

* തൊട്ടുപിന്നില്‍ 37.6 ദശലക്ഷം യാത്രക്കാരെ സ്വീകരിച്ച് റിയാദിലെ കിംഗ് ഖാലിദ് അന്താരാഷ്ട്ര വിമാനത്താവളമാണ്. തൊട്ട് മുന്‍വര്‍ഷത്തെ അപേക്ഷിച്ച് 18 ശതമാനം വര്‍ദ്ധനവുണ്ടായി.

* ദമ്മാമിലെ കിംഗ് ഫഹദ് അന്താരാഷ്ട്ര വിമാനത്താവളം മൂന്നാം സ്ഥാനത്തെത്തി. 15 ശതമാനം വര്‍ധനവോടെ 12.8 ദശലക്ഷം യാത്രക്കാര്‍ക്കാണ് ദമ്മാം കിംഗ് ഫഹദ് അന്താരാഷ്ട്ര വിമാനത്താവളം സേവനം നല്‍കിയത്.

* സഊദി വിമാനത്താവളങ്ങളിലെ ആഭ്യന്തര വിമാന യാത്രക്കാരുടെ ശരാശരി ദൈനംദിന എണ്ണം ഏകദേശം 162,000 ആയി. 

* എയര്‍ ഗാര്‍ഗോയുമായി ബന്ധപ്പെട്ട് 2024 ല്‍ മൊത്തം ചരക്ക് അളവ് 1.2 ദശലക്ഷം ടണ്ണിലെത്തി. ഇത് 2023 നെ അപേക്ഷിച്ച് 34 ശതമാനം അധികമാണ്. 

* സഊദിയിലെ വിമാനക്കമ്പനിയിലെ ആകെ വിമാനങ്ങളുടെ എണ്ണം 361 ആയി. 2023 നെ അപേക്ഷിച്ച് 11 ശതമാനം വര്‍ധനവാണിത്. 

Total number of people traveled through the airports across Saudi Arabia exceeded 128 million during the year 2024, and this figure marks a 15 percent increase compared to the previous year.