ഫ്രൈഡ്‌റൈസ് വീട്ടിലുണ്ടാക്കുമ്പോള്‍ കുറച്ചു കാര്യങ്ങളിലൊന്നു ശ്രദ്ധവച്ചാല്‍ മതി. ചോറ് ഉണ്ടാക്കുന്നതാണ് മിക്കവരുടെയും പ്രശ്‌നം. ഒന്നുകില്‍ ചോറ് വെന്തു പോവും. അല്ലെങ്കില്‍ തീരെ വേവാതെയുമിരിക്കും. ഫ്രൈഡ്‌റൈസ് നന്നാവണമെങ്കില്‍ ചോറ് നന്നായിരിക്കണം. എന്നാലെ കാണാനും കഴിക്കാനുമൊക്കെ തോന്നൂ. അതിനുവേണ്ടി ചോറ് കുഴയാതിരിക്കാന്‍ അരി അര മണിക്കൂര്‍ വെള്ളത്തില്‍ കുതിര്‍ത്തു വച്ചതിനു ശേഷം പാകം ചെയ്യുക. 

ഫ്രൈഡ് റൈസിന് രുചി കൂട്ടാന്‍ ഇഞ്ചിയും വെളുത്തുള്ളിയും ഇതിലേക്ക് അരച്ചു ചേര്‍ത്തുകൊടുക്കുക. അരിയില്‍ രണ്ടു ടീസ്പൂണ്‍ ഉപ്പു ചേര്‍ത്ത് ചോറുണ്ടാക്കിനോക്കിയേ. ചോറു പൊടിഞ്ഞു പോകില്ല. ചോറു കൂടുതല്‍ വെന്തുപോവുകയാണെങ്കില്‍ വാര്‍ക്കുമ്പോള്‍ പാത്രത്തിന്റെയും അടപ്പിന്റെയും ഇടയില്‍ ഒരു ചെറിയ ടവ്വല്‍ വച്ചാല്‍ മതിയാവും. അധികമുള്ള വെള്ളം ഈ ടവല്‍ വലിച്ചെടുക്കുകയും ചെയ്യും. 

അല്‍പം ഉപ്പുനീര് ചേര്‍ത്ത് അരി വാര്‍ത്താല്‍ ചോറിനു നല്ല ഉറപ്പും കിട്ടും. ഫ്രൈഡ് റൈസില്‍ ഉപയോഗിക്കുന്ന ഇറച്ചിയോ ചെമ്മീനോ ആണെങ്കില്‍ കുറച്ച് ചെറുനാരങ്ങാ നീരോ സോയാ സോസോ പുരട്ടി കുറച്ച് സമയം വച്ചാല്‍ ചോറ് എളുപ്പം വെന്തുകിട്ടാന്‍ സഹായിക്കും.

ഇനി ഫ്രൈഡ് റൈസ്‌ സൂപ്പറായി തന്നെ ഉണ്ടാക്കാം.