ദോഹ :ഇന്ത്യൻ പ്രവാസി സമൂഹം വിവിധ തലങ്ങളിൽ നേരിടുന്ന പ്രശ്നങ്ങൾക്ക് പരിഹാരം കാണുന്നതിനും, പ്രവാസികളുടെ ക്ഷേമ പ്രവർത്തനങ്ങൾക്കും വേണ്ടി പ്രവർത്തിക്കുമെന്ന് മുസ്‌ലിം ലീഗ് ദേശീയ ഉപാധ്യക്ഷൻ സൈനുൽ ആബിദീൻ. ഇന്ത്യൻ യൂണിയൻ മുസ്ലിം ലീഗ് അഖിലേന്ത്യാ വൈസ് പ്രസിഡന്റ്‌ ആയി സ്ഥാനമേറ്റെടുത്ത ശേഷം ആദ്യമായി ഖത്തറിൽ എത്തിയ അദ്ദേഹത്തിന് ഖത്തർ കെ എം സി സി ഒരുക്കിയ സ്വീകരണ യോഗത്തിലാണ് ഈ പ്രസ്താവന നടത്തിയത്.

ഖത്തറിലെ പ്രമുഖ വ്യവസായിയും,സുപ്രഭാതം വൈസ് ചെയർമാനും ഖത്തർ ഇസ്ലാമിക്‌ സെന്റർ ചെയർമാൻ കൂടിയായ സഫാരി സൈനുൽ ആബിദീനെ കഴിഞ്ഞ ദിവസമാണ് മുസ്ലിം ലീഗ് ദേശീയ നേതൃത്വത്തിലേക്കു തെരെഞ്ഞെടുത്തത്. പ്രവാസികളുടെ പ്രതിനിധിയായാണ് എന്നെ ദേശീയ നേതൃത്വത്തിലേക്ക് പരിഗണിച്ചതെന്നും ഇന്ത്യൻ പ്രവാസി സമൂഹം നേരിടുന്ന വിമാന യാത്രക്കൂലി വർദ്ധനവ്, നിയമ പ്രശ്നങ്ങൾ തുടങ്ങിയ വിഷയങ്ങളിൽ കൂടുതൽ ശ്രദ്ധ ചെലുത്തുമെന്നും പ്രവാസി വോട്ടവകാശത്തിനായുള്ള പോരാട്ടം തുടരുമെന്നും അദ്ദേഹം പറഞ്ഞു.

കാലത്തിൻറെ വെല്ലുവിളികളെ മറികടക്കാൻ മുസ്‌ലിം ലീഗ് ലക്ഷ്യമിടുന്നുണ്ട് അതിനു മുസ്‌ലിം ലീഗിന് വ്യക്തമായ പദ്ധതികളുമുണ്ട്. സമൂഹത്തിന്റെ വിവിധ തലങ്ങളിൽ നിന്നുമുള്ളവരെ പരിഗണിച്ചു നിലവിൽ വന്ന പുതിയ മുസ്ലിം ലീഗ് നേതൃത്വം സാമൂഹിക അവകാശങ്ങൾക്കും ക്ഷേമങ്ങൾക്കും വേണ്ടി പ്രവർത്തിക്കാൻ കഴിവുള്ള നേതൃത്വമാണെന്ന് അദ്ദേഹം കൂട്ടിച്ചേർത്തു. നാലര പതിറ്റാണ്ടിന്റെ ഖത്തർ പ്രവാസ കാലം കെ എം സി സി യുടെ വിവിധ തലങ്ങളിലുള്ള പ്രവർത്തനത്തിന്റെ അംഗീകരമാണ് തനിക്ക് ലഭിച്ചതെന്നും, തന്റെ കർമ മണ്ഡലമായ ഖത്തറിൽ ഒരുക്കിയ സ്വീകരണം ഏറെ സന്തോഷമുണ്ടക്കുന്നതാണെന്നും ചെറുപ്പം മുതൽ പ്രവർത്തനങ്ങളിൽ തന്നോടൊപ്പമുണ്ടായിരുന്ന സഹപ്രവർത്തകരെയും നേതാക്കളെയും ഒരിക്കലും മറക്കാൻ കഴിയില്ലെന്നും അദ്ദേഹം മറുപടി പ്രസംഗത്തിൽ പങ്കു വെച്ചു.