കരിപ്പൂർ: സംസ്ഥാന ഹജ്ജ് കമ്മിറ്റിയുടെ കരിപ്പൂരിലെ ഈ വർഷത്തെ ഹജ്ജ് ക്യാംപ് ഇന്ന് സമാപിക്കും. അവസാന വിമാനത്തിലെ തീർഥാടകർ ഇന്ന് രാവിലെ പത്ത് മണിയോടെ ക്യാംപിലെത്തും. ഉച്ചക്ക് രണ്ട് മണിക്ക് ഇവർക്കുള്ള രേഖകൾ കൈമാറും. രാത്രി എട്ട് മണിയോടെ  യാത്രയയപ്പ് ചടങ്ങ് ആരംഭിക്കും. ഒമ്പത് മണിയോടെ തീർഥാടകർ  എയർപോർട്ടിലേക്ക് തിരിക്കും. 

നാളെ പുലർച്ചെ 1.10 നുള്ള ഐ.എക്‌സ് 3029 നമ്പർ വിമാനം 88  പുരുഷന്മാരും 81 സ്ത്രീകളും ഉൾപ്പടെ 169 തീർഥാടകരുമായി ജിദ്ദയിലേക്ക് പറക്കും. ഇതോടെ കരിപ്പൂർ വഴിയുള്ള ഈ വർഷത്തെ ഹജ്ജ് തീർഥാടന യാത്രക്കു പരിസമാപ്തിയാവും. അവസാന സംഘത്തോടൊപ്പം സ്റ്റേറ്റ് ഹജ്ജ് ഇൻസ്‌പെക്ടറായി(എസ്.എച്ച്.ഐ) കൊണ്ടോട്ടി പൊലിസ് സ്റ്റേഷനിലെ അസിസ്റ്റന്റ് സബ് ഇൻസ്‌പെക്ടർ എം.അബ്ദുൽ ജബ്ബാർ അനുഗമിക്കും.   

കോഴിക്കോട് നിന്നുള്ള തീഥാടകരുടെ സേവനത്തിനായി ഇതുവരെ 32 എസ്.എച്ച്.ഐ മാരാണ് യാത്രതിരിച്ചിട്ടുള്ളത്. ഇക്കഴിഞ്ഞ ഒമ്പതിന് വെള്ളിയാഴ്ചയാണ് കരിപ്പൂരിൽ ക്യാംപ് ആരംഭിച്ചത്. പത്തിന് പുലർച്ചെ 1.10 നായിരുന്നു ആദ്യ വിമാനം. 31 വിമാനങ്ങളിലായി 5340 തീർഥാടകരാണ് കരിപ്പൂർ വഴി യാത്രയാവുന്നത്. കണ്ണൂരിൽ നിന്നും മെയ് 29 നും കൊച്ചിയിൽ നിന്നും മെയ് 30 നുമാണ് അവസാന വിമാനങ്ങൾ. ഇന്ന് കരിപ്പൂരിൽ നിന്ന് മൂന്ന് വിമാനങ്ങളാണ് സർവിസ് നടത്തുക. പുലർച്ചെ  ഒരു മണിക്ക് പുറപ്പെടുന്ന വിമാനത്തിൽ  94 പുരുഷന്മാരും 79 സ്ത്രീകളും യാത്രതിരിക്കും.  

രാവിലെ 9.20 ന് പുറപ്പെടുന്ന വിമാനത്തിൽ 85 പുരുഷന്മാനും 88 സ്ത്രീകളും  വൈകുന്നേരം 5.55 നുള്ള വിമാനത്തിൽ 95 പുരുഷന്മാരും 77 സ്ത്രീ തീർഥാടകരുമാണ് യാത്രയാവുക. സംസ്ഥാനത്ത്  ഇതു വരെയായി 16,064 തീർഥാടകർക്കാണ് അവസരം ലഭിച്ചിട്ടുള്ളത്. ഇതിൽ 5340 പേർ കോഴിക്കോടു നിന്നും  6039 പേർ  കൊച്ചി വഴിയും  4663 തീർഥാടകർ  കണ്ണൂരിൽ നിന്നുമാണ്  യാത്രതിരിക്കുന്നത്.

വിമാനങ്ങളെല്ലാം സമയക്രമം പാലിച്ച് 

കരിപ്പൂരിൽ നിന്ന് ഇതു വരെയുള്ള എല്ലാ ഹജ്ജ് വിമാന സർവിസുകൾക്കും ഷെഡ്യൂൾ ചെയ്ത സമയത്ത് തന്നെ പുറപ്പെടാനായത് തീർഥാടകർക്കും ഹജ്ജ് കമ്മിറ്റിക്കും ആശ്വാസകരമായി. ക്യാംപ് തുടക്ക സമയത്തെ ഇന്ത്യ – പാകിസ്ഥാൻ സംഘർഷ സാഹചര്യം രാജ്യത്തെ വിമാനത്താവളങ്ങളുടെ പ്രവർത്തനങ്ങളെയും സർവിസുകളെയും പ്രതികൂലമായി ബാധിക്കുമോയെന്ന് ആശങ്കയുണ്ടായിരുന്നു. എന്നാൽ സ്ഥിതിഗതികൾ ഉടനെ ശാന്തമായത് തീർഥാടകർക്ക് തുണയായി.