മുട്ടിൽ: വയനാട് മുസ്‌ലിം ഓർഫനേജിന്റെ 17ാമത് സ്ത്രീധനരഹിത വിവാഹസംഗമം ഇന്ന് നടക്കും. 2005ൽ ഡബ്ല്യു.എം.ഒ ബഹറൈൻ ചാപ്റ്ററിന്റെ ആഭിമുഖ്യത്തിൽ തുടക്കം കുറിച്ച ഈ സാമൂഹിക ദൗത്യത്തിൽ വൈവാഹിക ജീവിതത്തിലേക്ക് ഡബ്ല്യു.എം.ഒ കൈപ്പിടിച്ച് നടത്തിയവരുടെ എണ്ണം 2000 കടക്കുകയാണ്. രാവിലെ 11ന് നിക്കാഹ് കർമത്തിന് പാണക്കാട് സയ്യിദ് സ്വാദിഖലി ശിഹാബ് തങ്ങൾ നേതൃത്വം നൽകും. 

പാണക്കാട് നാസിർ അബ്ദുൽ ഹയ്യ് ശിഹാബ് തങ്ങൾ, സമസ്ത ട്രഷറർ കൊയ്യോട് ഉമർ മുസ്‌ലിയാർ, കേന്ദ്ര മുശാവറ അംഗങ്ങളായ കെ.ടി ഹംസ മുസ്‌ലിയാർ, വി. മൂസക്കോയ മുസ്‌ലിയാർ, മുസ്തഫ ഹുദവി ആക്കോട്,  ജില്ലാ കലക്ടർ ഡി.ആർ മേഘശ്രീ ഐ.എ.എസ്, അഡ്വ. ടി. സിദ്ദീഖ് എം.എൽ.എ, ഐ.സി ബാലകൃഷ്ണൻ എം.എൽ.എ തുടങ്ങിയവരും പണ്ഡിതന്മാരും രാഷ്ട്രീയ നേതാക്കളും  സാമൂഹിക സാംസ്‌കാരിക മേഖലകളിലെ പ്രമുഖരും ചടങ്ങിൽ സംബന്ധിക്കും. കഴിഞ്ഞ വർഷങ്ങളിൽ സംഘടിപ്പിച്ച വിവാഹസംഗമങ്ങളിലൂടെ പ്രതീക്ഷാനിർഭരമായ പ്രതിഫലനങ്ങൾ സമൂഹത്തിൽ ഉണ്ടാക്കാൻ ഡബ്ല്യു.എം.ഒക്ക് കഴിഞ്ഞിട്ടുണ്ട്. 

വിവാഹത്തിന്റെ പേരിൽ സാധാരണക്കാർ വേദനയുടെ കൈപ്പുനീർ അനുഭവിക്കേണ്ടി വന്ന സാമൂഹിക സാഹചര്യത്തെ മാറ്റിയെടുക്കാൻ ഡബ്ല്യു.എം.ഒക്ക് ഒരുപരിധിവരെ ഇതിലൂടെ സാധിച്ചിട്ടുണ്ട്. സ്ത്രീധനരഹിത വിവാഹസംഗമങ്ങളിലൂടെ കഴിഞ്ഞ വർഷങ്ങളിലായി 1986 യുവതീ യുവാക്കളാണ് വൈവാഹിക ജീവിതത്തിലേക്ക് പ്രവേശിച്ചത്. വിവാഹസംഗമങ്ങളിലല്ലാതെ ഓർഫനേജിൽ പഠിച്ചുവളർന്ന പെൺകുട്ടികളുൾപ്പെടെ നിരവധി വിവാഹങ്ങൾക്കും ഡബ്ല്യു.എം.ഒ വേദിയായിട്ടുണ്ട്.