തിരുവനന്തപുരം: കെ.എസ്.ഇ.ബിയുടെ വൈദ്യുതി വാഹന ചാർ‍ജിങ് സ്റ്റേഷനുകളിലെ പുതുക്കിയ നിരക്ക് പ്രാബല്യത്തിൽ വന്നു. ഇതോടെ രാത്രിയിൽ വാഹനം ചാർജ് ചെയ്യുന്നവർക്ക് അധിക നിരക്ക് നൽകേണ്ടിവരും.  രാവിലെ ഒമ്പതു മുതൽ‍ വൈകീട്ട് നാലുവരെ സൗര മണിക്കൂറും ബാക്കി സമയം സൗരേതര മണിക്കൂറുമായി തരം തിരിച്ചുള്ള ടൈം ഓഫ് ഡേ (ടി.ഒ.ഡി) രീതിയിലാണ് പുതിയ നിരക്കുകൾ‍. സൗര മണിക്കൂറിൽ 30 ശതമാനം വരെ കുറഞ്ഞ നിരക്കിൽ വാഹനങ്ങൾ ചാർ‍ജ് ചെയ്യാം. വൈകിട്ട് നാലു മുതൽ‍ അടുത്ത ദിവസം രാവിലെ ഒമ്പതു വരെ 30 ശതമാനം കൂടിയ നിരക്കായിരിക്കും ഈടാക്കുക.  

ചാർജിങ്ങിന് പൊതു നിരക്ക് യൂനിറ്റിന് 7.15 രൂപയാണ്.  സൗര മണിക്കൂറിൽ‍‍‍ 30 ശതമാനം കുറഞ്ഞ് അഞ്ച് രൂപയും സൗരേതര മണിക്കൂറുകളിൽ 9.30 രൂപയുമാകും  (30 ശതമാനം കൂടുതൽ) ഈടാക്കുക.  ഇതിനോടൊപ്പം ഡ്യൂട്ടിയും കേന്ദ്ര വൈദ്യുതി മന്ത്രാലയം നിർ‍ദ്ദേശിച്ച സർ‍വിസ് ചാർ‍ജും 18 ശതമാനം ജി.എസ്.ടി യും നൽകേണ്ടി വരും.  

ഇരുചക്ര, മുച്ചക്ര ഇലക്ട്രിക് വാഹനങ്ങൾ ഉപയോഗിക്കുന്ന സാധാരണക്കാർ‍ക്ക് പകൽ‍ സമയം ലാഭകരമാകുന്ന രതിയിലാണ്  പുതിയ പരിഷ്കാരമെന്ന് കെ.എസ്.ഇ.ബി അറിയിച്ചു. രാത്രിയിൽ‍ കൂടുതൽ‍ വാഹനങ്ങൾ‍ ചാർ‍ജ് ചെയ്താൽ‍ സൗരോർ‍ജം പോലുള്ള ഹരിത സ്രോതസുകൾ‍ ഉപയോഗപ്പെടുത്താനാകില്ല.  

ഇത് കാർബൺ‍ ബഹിർ‍ഗമനം വർധിപ്പിക്കും.  ഇത് ഒഴിവാക്കി ഹരിത ഗതാഗതം അതിൻ്റെ യഥാർ‍ഥ ലക്ഷ്യം നേടുന്ന രീതിയിൽ നടപ്പാക്കുകയാണ് പുതിയ രീതിയിലൂടെ ഉദ്ദേശിക്കുന്നതെന്നും കെ.എസ്.ഇ.ബി അറിയിച്ചു.

യൂനിറ്റ് നിരക്ക്

രാവിലെ ഒമ്പതു മുതൽ‍ : വൈകീട്ട് നാലുവരെ -   5 രൂപ

വൈകിട്ട് നാലു മുതൽ‍ അടുത്ത ദിവസം രാവിലെ ഒമ്പതു വരെ -  9.30 രൂപ
(ജി.എസ്.ടിയും മറ്റു നിരക്കുകളും പുറമെ)