തെഹ്‌റാന്‍: 2015നു ശേഷം ഇതാദ്യമായി ഇറാനില്‍ നിന്നുള്ള ഹാജിമാരെയും വഹിച്ചുള്ള വിമാനം സഊദിയിലെത്തി. മേഖലയിലെ കരുത്തരായ രണ്ട് രാജ്യങ്ങളും തമ്മിലെ ശത്രുത കുറഞ്ഞുവരുന്ന സാഹചര്യത്തിലാണിത്. 35,000 തീര്‍ത്ഥാടകരാണ് ഈ വര്‍ഷം ഹജ്ജ് കര്‍മത്തിനായി നേരിട്ടുള്ള വിമാനത്തില്‍ സഊദിയിലെത്തുന്നത്. 2023ല്‍ ചൈനയുടെ മധ്യസ്ഥതയില്‍ നടന്ന നയതന്ത്ര കരാറിനെ തുടര്‍ന്നാണ് ഇറാനും സഊദിയും തമ്മിലെ ബന്ധം മെച്ചപ്പെട്ടത്. തെഹ്‌റാനിലെ ഇമാം ഖുമൈനി വിമാനത്താവളത്തില്‍ നിന്നാണ് സഊദി എയര്‍ലൈന്‍സ് വിമാനത്തില്‍ ഹജ്ജ് യാത്രികര്‍ പുറപ്പെട്ടത്. കഴിഞ്ഞ ഡിസംബറില്‍ ഇറാന്‍ എയര്‍ ദമ്മാമിലേക്ക് സര്‍വിസ് പുനരാരംഭിച്ചിരുന്നു.

അതേസമയം, ഇസ്‌റാഈലുമായുള്ള സംഘര്‍ഷത്തില്‍ കുടുംബാംഗങ്ങളെ നഷ്ടപ്പെട്ട ആയിരം പലസ്തീനികളെ ഹജ്ജ് കര്‍മം ചെയ്യാന്‍ സഊദി അറേബ്യ ക്ഷണിച്ചു. ഇവരുടെ എല്ലാ ചെലവുകളും സഊദി രാജാവ് സല്‍മാന്‍ ബിന്‍ അബ്ദുല്‍ അസീസ് വഹിക്കും. ഇസ്‌റാഈലിന്റെ ആക്രമണങ്ങളില്‍ തടവിലാക്കപ്പെട്ടവരോ പരുക്കേറ്റവരോ ആയ ഫലസ്തീനികളുടെ ബന്ധുക്കളെയും വിശുദ്ധ ഹജ്ജ് കര്‍മം നിര്‍വഹിക്കാനായി ക്ഷണിച്ചിട്ടുണ്ട്. 

ഫലസ്തീന്‍ തീര്‍ത്ഥാടകര്‍ക്ക് അവരുടെ ജന്മദേശം വിടുന്ന നിമിഷം മുതല്‍ രാജ്യത്ത് എത്തിച്ചേരുന്നതുവരെ ആവശ്യമായ എല്ലാ സേവനങ്ങളും സൗകര്യങ്ങളും നല്‍കുന്നതിനായി ഒരു സമഗ്ര എക്‌സിക്യൂട്ടീവ് പ്ലാന്‍ നടപ്പിലാക്കിയതായി സഊദി വാര്‍ത്താ ഏജന്‍സി അറിയിച്ചു. സഊദി ഇസ്‌ലാമിക കാര്യ മന്ത്രാലയമാകും ഇത് നടപ്പിലാക്കുക. 

ഹജ്ജ് സീസണ്‍ അറഫാദിനത്തില്‍ അവസാനിക്കും. മാസപ്പിറവിയെ അടിസ്ഥാനമാക്കി ഈ വര്‍ഷം ജൂണ്‍ 5 നോ 6 നോ ആയിരിക്കും അറഫാദിനം.

A Saudi airline has resumed flights for Iranian hajj pilgrims to the Kingdom of Saudi Arabia (KSA) for the first time in a decade, the latest sign of the warming ties between the countries.