മനാമ: ഈ വര്‍ഷം ലോകത്തെ ഏറ്റവും വൃത്തിയും ശുദ്ധിയുമുള്ള വിമാനത്താവളമായി ബഹ്‌റൈന്‍ ഇന്റര്‍നാഷനല്‍ എയര്‍പോര്‍ട്ട്. ബ്രിട്ടണ്‍ ആസ്ഥാനമായഎയര്‍ ട്രാന്‍സ്‌പോര്‍ട്ട് റേറ്റിംഗ് ഓര്‍ഗനൈസേഷനായ സ്‌കൈട്രാക്‌സാണ് (Skytrax) റിപ്പോര്‍ട്ട് പുറത്തുവിട്ടത്. സ്‌കൈട്രാക്‌സ് പുറത്തിറക്കിയ ഏറ്റവും പുതിയ റാങ്കിംഗ് പ്രകാരം 25 ദശലക്ഷം യാത്രക്കാരെ വരെ കൈകാര്യം ചെയ്യുന്ന വിമാനത്താവളങ്ങളുടെ വിഭാഗത്തില്‍ 2025 ലെ ലോകത്തിലെ ഏറ്റവും വൃത്തിയുള്ള വിമാനത്താവളമായാണ് ബഹ്‌റൈന്‍ എയര്‍ പോര്‍ട്ട് തെരഞ്ഞെടുക്കപ്പെട്ടത്. 25 ദശലക്ഷം യാത്രക്കാരെ വരെ കൈകാര്യം ചെയ്യുന്ന വിമാനത്താവളങ്ങളുടെ വിഭാഗത്തിലാണ് ബഹ്‌റൈന്‍ എയര്‍പോര്‍ട്ട് നേട്ടം കരസ്ഥമാക്കിയത്.

1.1 ബില്യണ്‍ ഡോളറിന്റെ വിശാലമായ വിമാനത്താവള നവീകരണ പദ്ധതിയുടെ ഭാഗമായ പുതിയ പാസഞ്ചര്‍ ടെര്‍മിനല്‍ ആരംഭിച്ച് നാല് വര്‍ഷത്തിന് ശേഷമാണ് ബഹ്‌റൈന് ഒന്നാം സ്ഥാനം ലഭിച്ചത്. യാത്രക്കാരുടെ ഫീഡ്ബാക്കിന്റെയും വിലയിരുത്തലുകളുടെയും അടിസ്ഥാനത്തിലാണ് സ്‌കൈട്രാക്‌സ് അവാര്‍ഡ് നല്‍കുന്നത്. ബഹ്‌റൈന്റെ അതിവേഗം വളരുന്ന വ്യോമയാന മേഖലയ്ക്ക് ഈ നേട്ടം സുപ്രധാന നാഴികക്കല്ലാണെന്ന് എയര്‍പോര്‍ട്ട് അധികൃതര്‍ പറഞ്ഞു. ശുചിത്വം, യാത്രക്കാരുടെ അനുഭവം, ആധുനിക അടിസ്ഥാനങ്ങള്‍ എന്നിവയില്‍ വിമാനത്താവളം നല്‍കിയ ഊന്നല്‍ ആണ് നേട്ടത്തിന് കാരണമെന്നും അധികൃതര്‍ പറഞ്ഞു.

ന്യൂ ചിറ്റോസ് വിമാനത്താവളം (ജപ്പാന്‍), സെന്‍ട്രെയര്‍ നഗോയ (ജപ്പാന്‍), ഒസാക്ക ഇറ്റാമി വിമാനത്താവളം (ജപ്പാന്‍), ഹെല്‍സിങ്കിവാന്റ (ഫിന്‍ലാന്‍ഡ്), അഡലെയ്ഡ് വിമാനത്താവളം (ഓസ്‌ട്രേലിയ), കാം റാന്‍ അന്താരാഷ്ട്ര വിമാനത്താവളം (വിയറ്റ്‌നാം), ക്വിറ്റോ അന്താരാഷ്ട്ര വിമാനത്താവളം (ഇക്വഡോര്‍), ഹ്യൂസ്റ്റണ്‍ ഹോബി വിമാനത്താവളം (യുഎസ്എ), ബ്രിസ്‌ബേന്‍ വിമാനത്താവളം (ഓസ്‌ട്രേലിയ) എന്നീ വിമാനത്താവളങ്ങള്‍ ആണ് ആദ്യ 10 സ്ഥാനങ്ങളില്‍ ഇടം നേടിയത്.

ടോക്കിയോ (ജപ്പാന്‍) ഹനേഡ വിമാനത്താവളം ലോകത്തെ ഏറ്റവും വൃത്തിയുള്ള മേജര്‍ ഇന്റര്‍നാഷണല്‍ എയര്‍പോര്‍ട്ട് എന്ന പദവിയും സ്വന്തമാക്കി. 

The recognition places the Gulf gateway ahead of airports in Japan, Finland, and Australia, and also earns it the title of Cleanest Airport in the Middle East