റിയാദ്: മദീനയിലെ താമസസ്ഥലത്തെ കുളിമുറിയില്‍ വീണതിനെ തുടര്‍ന്ന് പരുക്കേറ്റ് ചികിത്സയിലായിരുന്ന പ്രവാസി മലയാളി അധ്യാപിക മരിച്ചു. കോട്ടയം തൃക്കൊടിത്താനം സ്വദേശി പുതുപ്പറമ്പില്‍ റെജീന ഷരീഫ് (58) ആണ് മരിച്ചത്. തബൂക്കിലെ സ്വകാര്യ സ്‌കൂളില്‍ അധ്യാപികയായിരുന്നു.

20 ദിവസം മുമ്പാണ് റെജീന രക്തസമ്മര്‍ദ്ദം മൂലം കുളിമുറിയില്‍ തലചുറ്റി വീണത്. തലയ്ക്കുള്ളില്‍ രക്തസ്രാവം ഉണ്ടായതിനാല്‍ വിദഗ്ദ്ധ ചികിത്സക്കായി മദീന കിങ് സല്‍മാന്‍ ആശുപത്രിയിലേക്ക് മാറ്റി. മൂന്നാഴ്ചയോളം ചികിത്സയില്‍ കഴിഞ്ഞെങ്കിലും ജീവന്‍ രക്ഷിക്കാനായില്ല.

കുടുംബസമ്മേതം വര്‍ഷങ്ങളായി തബൂക്കില്‍ താമസിക്കുകയായിരുന്നു റജീന. ഷരീഫ് മീരാസാഹിബ് ആണ് ഭര്‍ത്താവ്. തബൂക്കില്‍ സ്വകാര്യസ്ഥാപനത്തില്‍ ജോലി ചെയ്യുകയാണ് ഷരീഫ്. മക്കള്‍: ബ്യൂലാ ഷരീഫ് (നഴ്‌സ്, അബഹ), യാസിന്‍ ഷരീ (ഹൈദരാബാദ്), സഫ്‌ന ഷരീഫ് (നഴ്‌സിങ് വിദ്യാര്‍ഥി, കേരളം).

നിയമപരമായ നടപടികള്‍ പൂര്‍ത്തിയാക്കുന്നതിനും മൃതദേഹം സംസ്‌കരിക്കുന്നതിനുമുള്ള ക്രമീകരണങ്ങള്‍ മദീന കെഎംസിസി വെല്‍ഫെയര്‍ വിങ് ഭാരവാഹി മുഹമ്മദ് ഷഫീഖ് മൂവാറ്റുപുഴയുടെ നേതൃത്വത്തില്‍ ആണ് നടക്കുന്നത്. നടപടികള്‍ പൂര്‍ത്തിയാക്കി മയ്യിത്ത് മദീനയില്‍ തന്നെ മറവുചെയ്യും.

expatriate Malayali teacher who was undergoing treatment after sustaining injuries in a fall has passed away in saudi