ഹയര്‍ സെക്കന്‍ഡറിയിലെയും വൊക്കേഷനല്‍ ഹയര്‍ സെക്കന്‍ഡറിയിലെ നോണ്‍വൊക്കേഷനല്‍ അധ്യാപകരുടെയും നിയമനത്തിനുള്ള യോഗ്യതാ നിര്‍ണയ പരീക്ഷയായ സെറ്റ് (SET  സ്റ്റേറ്റ് എലിജിബിലിറ്റി ടെസ്റ്റ്)   ജൂലൈ 2025ന് അപേക്ഷ ക്ഷണിച്ചു. 31 വിഷയങ്ങളിലാണ് ഇത്തവണ പരീക്ഷയുള്ളത്. സര്‍ക്കാര്‍ സ്വയംഭരണ സ്ഥാപനമായ എല്‍.ബി.എസ് സെന്റര്‍ ഫോര്‍ സയന്‍സ് & ടെക്‌നോളജിക്കാണ് പരീക്ഷാ ചുമതല.

അപേക്ഷാ യോഗ്യത
ബിരുദാനന്തര ബിരുദ പരീക്ഷയില്‍ 50 ശതമാനത്തില്‍ കുറയാതെ മാര്‍ക്ക് അല്ലെങ്കില്‍ തത്തുല്യ ഗ്രേഡും (പട്ടിക/ ഭിന്നശേഷി വിഭാഗക്കാര്‍ക്ക്  അഞ്ച് ശതമാനം ഇളവുണ്ട്) ബി.എഡുമാണ് അടിസ്ഥാന യോഗ്യത. മാത്തമാറ്റിക്‌സ്, ഫിസിക്‌സ്, കെമിസ്ട്രി, ബോട്ടണി, സുവോളജി വിഷയങ്ങളില്‍ റീജിണല്‍ ഇന്‍സ്റ്റിറ്റ്യൂട്ട് ഓഫ് എജ്യുക്കേഷനിലെ (RIE) എം.എസ്.സിഎഡ് പ്രോഗ്രാം 50 ശതമാനം മാര്‍ക്കോടെ ജയിച്ചവര്‍ക്കും അപേക്ഷിക്കാം. ഏതെങ്കിലും ആര്‍.ഐ.ഇയില്‍നിന്ന് 50 ശതമാനം മാര്‍ക്കോടെ ലൈഫ് സയന്‍സില്‍ എം.എസ്.സി  എഡ് യോഗ്യത നേടിയവര്‍ക്കും ബോട്ടണി, സുവോളജി വിഷയങ്ങള്‍ക്ക് അപേക്ഷിക്കാം. 50 ശതമാനമെങ്കിലും മാര്‍ക്കോടെ കമ്മ്യൂണിക്കേറ്റീവ് ഇംഗ്ലിഷില്‍ എം. എയും ബി.എഡുമുള്ളവര്‍ക്ക് ഇംഗ്ലിഷില്‍ സെറ്റിന് അപേക്ഷിക്കാന്‍ അര്‍ഹതയുണ്ട്. എന്നാല്‍  ആന്ത്രപ്പോളജി, കൊമേഴ്‌സ്, ഗാന്ധിയന്‍സ്റ്റഡീസ്, ജിയോളജി, ഹോം സയന്‍സ്, ജേണലിസം, മ്യൂസിക്, ഫിലോസഫി, സൈക്കോളജി, സോഷ്യല്‍ വര്‍ക്ക്, സോഷ്യോളജി, സ്റ്റാറ്റിസ്റ്റിക്‌സ് വിഷയങ്ങളില്‍ ബിരുദാനന്തര ബിരുദംനേടിയ വിദ്യാര്‍ഥികള്‍ക്ക് ബി.എഡ് ബിരുദം നിര്‍ബന്ധമല്ല.

അറബിക്, ഉര്‍ദു, ഹിന്ദി വിഷയങ്ങളില്‍ DLED, LTTC തുടങ്ങിയ ട്രെയിനിങ് കോഴ്‌സുകള്‍ വിജയിച്ചവര്‍ക്കും ബി.എഡ് കൂടാതെ സെറ്റിന് അപേക്ഷിക്കാവുന്നതാണ്. നാച്വറല്‍ സയന്‍സില്‍ ബി.എഡും 50 ശതമാനം മാര്‍ക്കോടെ ബയോടെക്‌നോളജി എം.എസ്.സിയുമുള്ളവര്‍ക്ക് ബയോടെക്‌നോളജിയില്‍ സെറ്റ് എഴുതാം.

അടിസ്ഥാന യോഗ്യതയില്‍ ഒന്നുമാത്രം നേടിയവര്‍ക്ക് ചില  നിബന്ധനകള്‍ പ്രകാരം സെറ്റ് പരീക്ഷയെഴുതാം. ബിരുദാനന്തര ബിരുദം മാത്രം നേടിയവര്‍ ബി.എഡ് കോഴ്‌സിന്റെ അവസാന വര്‍ഷം പഠിക്കുന്നവരായിരിക്കണം. അവസാന വര്‍ഷ ബിരുദാനന്തര ബിരുദക്കാര്‍ക്ക് ബി.എഡ് ഉണ്ടെങ്കില്‍ മാത്രമേ സെറ്റിന് അപേക്ഷിക്കാന്‍ സാധിക്കുകയുള്ളൂ. ഇത്തരം നിബന്ധനകളോടെ  സെറ്റ് പരീക്ഷ എഴുതുന്നവര്‍ അവരുടെ ബിരുദാനന്തര  ബിരുദം/ബി.എഡ് പരീക്ഷയുടെ നിശ്ചിത യോഗ്യത, സെറ്റ് പരീക്ഷയുടെ ഫലം പ്രഖ്യാപിക്കുന്ന തീയതി മുതല്‍ ഒരു വര്‍ഷത്തിനകം നേടിയിരിക്കണം. അല്ലാത്തപക്ഷം അവരെ ഈ  ചാന്‍സില്‍ സെറ്റ് പരീക്ഷ ജയിച്ചതായി പരിഗണിക്കുന്നതല്ല. 

രണ്ട് പേപ്പറുകള്‍
ഒ.എം.ആര്‍ അധിഷ്ഠിത പരീക്ഷയില്‍ രണ്ട് മണിക്കൂര്‍ വീതം ദൈര്‍ഘ്യമുള്ള രണ്ട് പേപ്പറുകളാണുള്ളത്. ഒബ്ജക്റ്റീവ് രീതിയിലുള്ള  ചോദ്യങ്ങള്‍. പൊതുവായഒന്നാമത്തെ പേപ്പറില്‍ പൊതു വിജ്ഞാനം, അധ്യാപന അഭിരുചി എന്നിവ പരിശോധിക്കുന്ന ചോദ്യങ്ങള്‍. ഓരോ മാര്‍ക്ക് വീതമുള്ള 120 ചോദ്യങ്ങള്‍. രണ്ടാമത്തെ പേപ്പറില്‍ പി.ജി തലത്തില്‍ സ്‌പെഷലൈസ് ചെയ്ത വിഷയത്തെ ആസ്പദമാക്കിയുള്ള ചോദ്യങ്ങളുണ്ടാകും. ഒരു മാര്‍ക്ക് വീതമുള്ള 120 ചോദ്യങ്ങള്‍. എന്നാല്‍ മാത്തമാറ്റിക്‌സ്, സ്റ്റാറ്റിസ്റ്റിക്‌സ് വിഷയങ്ങള്‍ക്ക് 1.5 മാര്‍ക്ക് വീതമുള്ള 80 ചോദ്യങ്ങളുണ്ടാകും. തെറ്റുത്തരത്തിന് നെഗറ്റീവ് മാര്‍ക്കില്ല. എല്ലാ ജില്ലകളിലും പരീക്ഷാകേന്ദ്രങ്ങളുണ്ടാകും.

48% മാര്‍ക്ക്
സെറ്റ് യോഗ്യത ലഭിക്കാന്‍ ജനറല്‍ വിഭാഗത്തിന്  ഓരോ പേപ്പറിലും 40 ശതമാനം വീതവും രണ്ട് പേപ്പറിലും  ചേര്‍ത്ത് 48 ശതമാനവും മാര്‍ക്ക് ലഭിച്ചിരിക്കണം. പിന്നോക്ക വിഭാഗക്കാര്‍ക്ക് ഇത് യഥാക്രമം 35 , 45 ശതമാനവും പട്ടിക /ഭിന്നശേഷി  വിഭാഗങ്ങള്‍ക്ക് യഥാക്രമം  35, 40 ശതമാനവും ലഭിച്ചാല്‍ മതി.

set exam 2025 apply till may 28 know these things before exam

കൂടുതല്‍ education വാര്‍ത്തകള്‍ക്ക് ഗ്രൂപ്പില്‍ ജോയിന്‍ ചെയ്യുക