ന്യൂഡല്‍ഹി: ആകാശച്ചുഴിയില്‍പെട്ട് ഇന്ത്യന്‍ വിമാനം. ഡല്‍ഹി-ശ്രീനഗര്‍ വിമാനമാണ് അപകടത്തില്‍ പെട്ടത്. തുടര്‍ന്ന് പാക്  വ്യോമപാത ഉപയോഗിക്കാന്‍ പൈലറ്റ് അനുവാദം തേടി. എന്നാല്‍ പാകിസ്താന്‍ പൈലറ്റിന്റെ അഭ്യര്‍ഥന  നിരസിച്ചു. 
തൃണമൂല്‍ കോണ്‍ഗ്രസ് എംപിമാര്‍ ഉള്‍പ്പെടെ 220-ലധികം യാത്രക്കാരുമായി പറന്നയുര്‍ന്ന വിമാനമാണ് ആകാശച്ചുഴിയില്‍ പെട്ടത്. കടുത്ത ആലിപ്പഴ വര്‍ഷവും ഉണ്ടായെന്ന് റിപ്പോര്‍ട്ടില്‍ പറയുന്നു. ബുധനാഴ്ച അമൃത്സറിന് മുകളിലൂടെ പറക്കുമ്പോഴായിരുന്നു സംഭവം. ആകാശച്ചുഴിയില്‍ പെട്ട് വിമാനം ആടിയുലയുന്നതും യാത്രക്കാര്‍ ഭയന്ന് നിലവിളിക്കുകയും കരയുകയും പ്രാര്‍ത്ഥിക്കുകയും ചെയ്യുന്ന ദൃശ്യങ്ങള്‍ പുറത്തുവന്നിട്ടുണ്ട്. 

ശ്രീനഗറിലേക്ക് പറന്ന ഇന്‍ഡിഗോയുടെ 6E 2142 വിമാനത്തിലായിരുന്നു സംഭവം. വ്യോമപാത ഉപയോഗിക്കാന്‍ ലാഹോര്‍ എയര്‍ ട്രാഫിക് കണ്‍ട്രോളിനോട് അനുമതി തേടിയെങ്കിലും നിരസിച്ചുവെന്നാ് പി.ടി.ഐ റിപ്പോര്‍ട്ട് ചെയ്യുന്നത്. പിന്നീട് വിമാനം സുരക്ഷിതമായി ലാന്‍ഡ് ചെയ്തു. ഏറെ ആശങ്കള്‍ക്കൊടുവില്‍ പൈലറ്റിന്റെ മനസാന്നിധ്യം കൊണ്ട് മാത്രമാണ് വിമാനം ശ്രീനഗറില്‍ സുരക്ഷിതമായി ഇറക്കിയതെന്ന് യാത്രക്കാര്‍ പറയുന്നു. 

ഇന്ത്യ-പാക് സംഘര്‍ഷങ്ങളുടെ പശ്ചാത്തലത്തില്‍ ഇരു രാജ്യങ്ങളും വ്യോമാതിര്‍ത്തി അടച്ചിരുന്നു.

എന്താണ് ആകാശച്ചുഴി അഥവാ എയര്‍ ടര്‍ബുലന്‍സ് 
അന്തരീക്ഷ വായുവിന്റെ പ്രവാഹത്തിലുണ്ടാകുന്ന ശക്തമായ വ്യതിയാനമാണ് ആകാശച്ചുഴി (എയര്‍പോക്കറ്റ് അല്ലെങ്കില്‍ എയര്‍ഗട്ടര്‍) അഥവാ ക്ലിയര്‍ എയര്‍ ടര്‍ബുലന്‍സ് (Clear-air turbulence). അന്തരീക്ഷത്തിലെ വായു സുഗമമായി നീങ്ങാത്തപ്പോഴാണ് എയര്‍ ടര്‍ബുലന്‍സ് സംഭവിക്കുന്നത്. നേര്‍രേഖയില്‍ പോകേണ്ട കാറ്റിന്റെ ഗതി പെട്ടെന്ന് താഴേക്കാകുന്ന ഈ അവസ്ഥയില്‍ വിമാനങ്ങളുടെ ഗതിയും നിയന്ത്രണവും നഷ്ടമാകാന്‍ സാധ്യതയുണ്ട്.

സാധാരണ നേര്‍രേഖയിലാണ് കാറ്റിന്റെ സഞ്ചാരം. ഇത് വിമാനയാത്രക്ക് അനുയോജ്യമാണ്. ഇതിനെ ലാമിനാര്‍ പ്രവാഹം എന്നാണ് വിളിക്കുന്നത്.

ഭാരവും വേഗവും ഊഷ്മാവും കൂടിയ വായു പിണ്ഡങ്ങളും ഭാരവും വേഗവും ഊഷ്മാവും കുറഞ്ഞ വായു പിണ്ഡങ്ങളും കൂടിച്ചേരുന്ന അന്തരീക്ഷ മേഖലകളിലാണ് ആകാശ ഗര്‍ത്തങ്ങള്‍ അഥവാ ആകാശച്ചുഴികള്‍ രൂപപ്പെടുന്നത്. സാധാരണയായി 20000 മുതല്‍ 40000 അടി ഉയരത്തിലാണ് ഈ പ്രതിഭാസമുണ്ടാകുന്നത്.

ആകാശച്ചുഴികള്‍ മിക്ക വിമാന യാത്രകളിലും ഉണ്ടാകാമെങ്കിലും യാത്രക്കാര്‍ക്ക് പരുക്കേല്‍ക്കുന്ന വിധത്തിലുള്ള അപകടങ്ങള്‍ ചുരുക്കമായി മാത്രമാണ് റിപ്പോര്‍ട്ട് ചെയ്തിട്ടുള്ളത്.