പട്ന: ആർജെഡി നേതാവ് ലാലു പ്രസാദ് യാദവിന്റെ മൂത്ത മകൻ തേജ് പ്രതാപ് യാദവിനെ പാർട്ടിയിൽ നിന്നും കുടുംബത്തിൽ നിന്നും പുറത്താക്കിയതിനെ തുടർന്ന് ബീഹാർ രാഷ്ട്രീയ രംഗം വീണ്ടും ചർച്ചയിൽ. തേജ് പ്രതാപിന്റെ "നിരുത്തരവാദപരമായ പെരുമാറ്റവും" കുടുംബ മൂല്യങ്ങൾക്ക് വിരുദ്ധമായ പ്രവർത്തനങ്ങളുമാണ് പുറത്താക്കലിന് കാരണമായതെന്ന് ലാലു യാദവ് വ്യക്തമാക്കി. ഇതിനോടകം, തേജ് പ്രതാപിന്റെ വേർപിരിഞ്ഞ ഭാര്യ ഐശ്വര്യ റായ് യാദവ് കുടുംബത്തിനെതിരെ ഗുരുതര ആരോപണങ്ങളുമായി രംഗത്തെത്തിയതോടെ വിവാദം കൂടുതൽ രൂക്ഷമായി.

2018-ൽ നടന്ന ആഡംബര വിവാഹത്തോടെ മുൻ മുഖ്യമന്ത്രി ദരോഗ പ്രസാദ് റായിയുടെ ചെറുമകൾ ഐശ്വര്യ റായിയെ തേജ് പ്രതാപ് വിവാഹം കഴിച്ചിരുന്നു. എന്നാൽ, വിവാഹം കഴിഞ്ഞ് മാസങ്ങൾക്കുള്ളിൽ തേജ് പ്രതാപിന്റെയും കുടുംബത്തിന്റെയും മോശം പെരുമാറ്റം ആരോപിച്ച് ഐശ്വര്യ വീട് വിട്ടിറങ്ങി. "ലാലു കുടുംബം എന്നെ ഒരിക്കലും മനുഷ്യനായി പരിഗണിച്ചില്ല. എന്റെ ജീവിതം അവർ ഒരു തമാശയാക്കി മാറ്റി. എന്നോട് ആവർത്തിച്ച് കള്ളം പറയുകയും സത്യം മറച്ചുവെക്കുകയും ചെയ്തു," ഐശ്വര്യ ഇന്ത്യ ടിവിക്ക് നൽകിയ അഭിമുഖത്തിൽ ആരോപിച്ചു. "ലാലു ജിയോട് ഞാൻ ചോദിക്കുന്നു, എനിക്ക് എന്ത് നീതിയാണ് അദ്ദേഹം നൽകുക? റാബ്രി ദേവിയും തേജ് പ്രതാപും എന്റെ അന്തസ്സ് നശിപ്പിച്ചു, ഇപ്പോൾ കുറ്റവിമുക്തരായി നടക്കാൻ ആഗ്രഹിക്കുന്നു," അവർ കൂട്ടിച്ചേർത്തു.

തേജ് പ്രതാപിന്റെ ഒരു ഫേസ്ബുക്ക് പോസ്റ്റാണ് വിവാദത്തിന് തിരികൊളുത്തിയത്. 'പങ്കാളി' എന്ന് പരാമർശിച്ച ഒരു സ്ത്രീയോടൊപ്പം നിൽക്കുന്ന ചിത്രം അദ്ദേഹം പോസ്റ്റ് ചെയ്തതിന് പിന്നാലെ, സോഷ്യൽ മീഡിയയിൽ വലിയ പ്രതിഷേധം ഉയർന്നു. ഐശ്വര്യയുമായുള്ള വിവാഹ തർക്കം വീണ്ടും ചർച്ചയായതോടെ, ലാലു യാദവ് മകനെ പാർട്ടിയിൽ നിന്നും കുടുംബത്തിൽ നിന്നും പുറത്താക്കുകയായിരുന്നു. എന്നാൽ, തന്റെ ഫേസ്ബുക്ക് അക്കൗണ്ട് ഹാക്ക് ചെയ്യപ്പെട്ടുവെന്നും ഫോട്ടോകൾ ദുരുദ്ദേശ്യത്തോടെ എഡിറ്റ് ചെയ്തതാണെന്നും തേജ് പ്രതാപ് ഒരു എക്സ് പോസ്റ്റിൽ അവകാശപ്പെട്ടു. തന്നെയും കുടുംബത്തെയും അപകീർത്തിപ്പെടുത്താനുള്ള മനഃപൂർവമായ ശ്രമമാണ് നടന്നതെന്നും അദ്ദേഹം ആരോപിച്ചു.

ബീഹാറിലെ ഭരണകക്ഷിയായ ജെഡിയു ഇതിനെതിരെ രൂക്ഷമായി പ്രതികരിച്ചു. "ഐശ്വര്യ റായിയെ വീട്ടിൽ നിന്ന് പുറത്താക്കിയപ്പോൾ ലാലു യാദവിന്റെ മനസ്സാക്ഷി എവിടെയായിരുന്നു? വിവാഹം കഴിഞ്ഞ് മാസങ്ങൾക്കുള്ളിൽ മരുമകൾ വീട് വിട്ടിറങ്ങേണ്ടി വന്നതിന്റെ ഉത്തരവാദിത്തം ആരാണ്?" ജെഡിയു വക്താവ് ചോദിച്ചു. ഐശ്വര്യയുടെ പിതാവും മുൻ മന്ത്രിയുമായ ചന്ദ്രിക റോയ് ആർജെഡി വിട്ട്, ഈ വിഷയം കോടതിയിലും രാഷ്ട്രീയ രംഗത്തും മുന്നോട്ട് കൊണ്ടുപോകുമെന്ന് പ്രഖ്യാപിച്ചു.

"വ്യക്തിജീവിതത്തിൽ ധാർമ്മിക മൂല്യങ്ങൾ അവഗണിക്കുന്നത് സാമൂഹിക നീതിക്കായുള്ള പോരാട്ടത്തെ ദുർബലപ്പെടുത്തും," ലാലു യാദവ് എക്സിൽ കുറിച്ചു. "തേജ് പ്രതാപിന്റെ പ്രവർത്തനങ്ങൾ കുടുംബത്തിന്റെയും പാർട്ടിയുടെയും മൂല്യങ്ങൾക്ക് വിരുദ്ധമാണ്. അതിനാൽ, അദ്ദേഹത്തെ ആർജെഡിയിൽ നിന്ന് 6 വർഷത്തേക്ക് പുറത്താക്കുന്നു. ഇനി മുതൽ അദ്ദേഹത്തിന് പാർട്ടിയിലോ കുടുംബത്തിലോ യാതൊരു പങ്കും ഉണ്ടായിരിക്കില്ല," അദ്ദേഹം വ്യക്തമാക്കി.