അബൂദബി: വിശുദ്ധമാക്കപ്പെട്ട അല്‍ അഖ്‌സ മസ്ജിദിലെ ജൂത കടന്നുകയറ്റത്തില്‍ ഇസ്‌റാഈല്‍ അംബാസഡറെ വിളിപ്പിച്ച് പ്രതിഷേധമറിയിച്ച് യുഎഇ ഭരണകൂടം. പഴയ നഗരത്തിലെ വിശുദ്ധഗേഹത്തിന്റെ മുറ്റത്തെ അതിക്രമവും ഫലസ്തീനികള്‍ക്ക് നേരെ നടത്തിവരുന്ന ആക്രമണവും ലജ്ജാകരവും നിന്ദ്യവുമാണെന്ന് യുഎഇ വിദേശകാര്യമന്ത്രാലയം വിശേഷിപ്പിച്ചു. 
ഏകപക്ഷീയമായ നടപടികള്‍ മുസ്ലികള്‍ക്കെതിരായ ഗുരുതരമായ പ്രകോപനമാണെന്ന് യുഎഇ വിദേശകാര്യമന്ത്രാലയം ഇറക്കിയ പ്രസ്താവനയില്‍ വിശേഷിപ്പിച്ചു. ഇത് വിശുദ്ധ നഗരത്തിന്റെ പവിത്രതയുടെ നഗ്‌നമായ ലംഘനമാണ്. മതപരമായ ഐക്യത്തിനും അന്താരാഷ്ട്ര സമാധാനത്തിനും ഭീഷണിയാകുന്ന നടപടികള്‍ക്കെതിരായ ഉറച്ച നിലപാട് യുഎഇ ആവര്‍ത്തിച്ചു.

വിദ്വേഷത്തിനും അക്രമത്തിനും പ്രേരിപ്പിക്കുന്നതിനൊപ്പം ഇസ്രായേലി തീവ്രവാദികളുടെ ആവര്‍ത്തിച്ചുള്ള ആക്രമണങ്ങളെ ശക്തമായി അപലപിക്കുന്നു. ഈ പ്രവര്‍ത്തനങ്ങള്‍ ഫലസ്തീന്‍ ജനതയ്‌ക്കെതിരെ മാത്രമല്ല, വിശാലമായ അന്താരാഷ്ട്ര സമൂഹത്തിനെതിരെയുമുള്ള നീക്കമാണ്. ഗസ്സ മുനമ്പിലെ മാനുഷിക പ്രതിസന്ധി അവസാനിപ്പിക്കുന്നതിന് മുന്‍ഗണന നല്‍കേണ്ട സമയത്ത് ഇത്തരം പ്രകോപനങ്ങള്‍ സംഘര്‍ഷം വര്‍ദ്ധിപ്പിക്കുമെന്ന് മന്ത്രാലയം മുന്നറിയിപ്പ് നല്‍കി.

സംഭവങ്ങളുടെ പൂര്‍ണ ഉത്തരവാദിത്തം ഏറ്റെടുക്കാനും ഉദ്യോഗസ്ഥര്‍ ഉള്‍പ്പെടെയുള്ള കുറ്റവാളികളെ ശിക്ഷിക്കാനും അക്രമത്തിലും തീവ്രവാദത്തിലും അധിഷ്ഠിതമായ അജണ്ടകള്‍ക്കായി ജറുസലേമിനെ ചൂഷണം ചെയ്യുന്നത് അടിയന്തിരമായി തടയാനും ഇസ്രായേല്‍ സര്‍ക്കാരിനോട് യുഎഇ ആവശ്യപ്പെട്ടു. നടപടിയെടുക്കുന്നതില്‍ പരാജയപ്പെടുന്നത് എല്ലാ ആക്രമണങ്ങള്‍ക്കുമുള്ള മൗനാനുവാദമായി കാണപ്പെടുമെന്നും കൂടുതല്‍ വിദ്വേഷം, വംശീയത, പ്രാദേശിക അസ്ഥിരത എന്നിവയ്ക്ക് കാരണമാകുമെന്നും മന്ത്രാലയം മുന്നറിയിപ്പ് നല്‍കി.

കഴിഞ്ഞദിവസമാണ് തീവ്രജൂതവിശ്വാസികളും നിയമവിരുദ്ധ കുടിയേറ്റക്കാരും മസ്ജിദുല്‍ അഖ്‌സയില്‍ കടന്നുകയറിയതും അവിടെയുണ്ടായിരുന്ന ഫലസ്തീനികള്‍ക്ക് നേരെ ആക്രമണമഴിച്ചുവിട്ടതും. 

അതേസമയം, തെക്കന്‍ ഗസ്സയില്‍ ഭക്ഷണ വിതരണ കേന്ദ്രത്തില്‍ തിരക്കുകൂട്ടിയ ആറു പേരെ ഇസ്‌റാഈല്‍ സൈന്യം വെടിവച്ചു കൊന്നു. കഴിഞ്ഞ ദിവസവും ഗസ്സ ഹ്യുമാനിറ്റേറിയന്‍ ഫൗണ്ടേഷന്‍ എന്ന പേരില്‍ ഇസ്‌റാഈല്‍, യു.എസ് പിന്തുണയുള്ള സംഘടന നടത്തുന്ന ഭക്ഷണ വിതരണ കേന്ദ്രത്തില്‍ ഇസ്‌റാഈല്‍ സൈന്യം വെടിയുതിര്‍ത്തിരുന്നു. അന്ന് മൂന്ന് പേര്‍ കൊല്ലപ്പെട്ടിരുന്നു. ഇതിനു പിന്നാലെയാണ് ഇന്നലെ തിക്കുംതിരക്കുമുണ്ടാക്കിയതിന് ആറു പേരെ കൂടി വെടിവച്ചു കൊന്നത്.

സായുധ ഭക്ഷണ വിതരണ സംഘമാണ് ഗസ്സ ഹ്യുമാനിറ്റേറിയന്‍ ഫൗണ്ടേഷന്‍. യു.എന്നിന്റെ ഫലസ്തീന്‍ അഭയാര്‍ഥി ഏജന്‍സിയെ മറികടക്കാനാണ് ഇവര്‍ സായുധരായി സഹായ വിതരണം നടത്തുന്നത്.
തെക്കന്‍ ഗസ്സയിലെ റഫയിലായിരുന്നു വെടിവയ്പ്. പടിഞ്ഞാറന്‍ റഫയിലെ സഹായ വിതരണ കേന്ദ്രത്തിലേക്ക് എത്താന്‍ ശ്രമിച്ചവരാണ് സൈന്യത്തിന്റെ വെടിയേറ്റ് കൊല്ലപ്പെട്ടതെന്ന് ഗസ്സ ഗവ. മീഡിയ ഓഫിസ് ഡയരക്ടര്‍ ഇസ്മാഈല്‍ അല്‍ തവാബ്ത പറഞ്ഞു. കൊല്ലപ്പെട്ടവരെല്ലാം യുവാക്കളാണ്. ഇവരെ തിരിച്ചറിഞ്ഞിട്ടുണ്ട്. പേരുവിവരങ്ങളും മീഡിയ ഓഫിസ് പുറത്തുവിട്ടു.

ഇന്നലെ മാത്രം ഗസ്സയില്‍ 43 പേരെ ഇസ്‌റാഈല്‍ സൈന്യം കൊലപ്പെടുത്തിയതായാണ് കണക്ക്. ഗസ്സയിലേക്ക് സഹായ ട്രക്കുകള്‍ കടത്തിവിടണമെന്നും സഹായം എത്തിക്കണമെന്നും പോള്‍ ലിയോ പതിനാറമന്‍ മാര്‍പാപ്പ ഓര്‍മിപ്പിച്ചു. ഗസ്സയ്ക്കു വേണ്ടി സമൂഹമാധ്യമത്തിലാണ് അദ്ദേഹം കുറിപ്പ് പങ്കുവച്ചത്.

UAE condemns violations against Palestinians at Al Aqsa Mosque and summons Israeli ambassador