പെരുന്നാളിന് എല്ലാ വീട്ടിലും കോഴിയും ബീഫും മട്ടനും ഒക്കെ കറികളായും ഫ്രൈ ആയുമൊക്കെ ഇഷ്ടം പോലെയുണ്ടാവും. എന്നാല്‍ ഈ പെരുന്നാളിന് കോഴി ഒന്നു നിറച്ചു പൊരിച്ചു നോക്കൂ... സൂപ്പര്‍ ടേസ്റ്റായിരിക്കും. നെയ്‌ചോറിനും ബിരിയാണിക്കുമൊക്കെ സൂപ്പര്‍. 

കഴുകി വൃത്തിയാക്കിയ കോഴി മുഴുവനായുമുള്ളത് 
മുളകുപൊടി - രണ്ടു  ടേബിള്‍  സ്പൂണ്‍
മഞ്ഞപ്പൊടി - ഒരു ടീസ് പൂണ്‍

മല്ലിപ്പൊടി - ഒരു സ്പൂണ്‍
കുരുമുളകു പൊടി - ഒരു സ്പൂണ്‍
ഉപ്പ് - ആവശ്യത്തിന്
ഗരം മസാല പൊടി - ഒരു സ്പൂണ്‍

നന്നായി വൃത്തിയാക്കി കഴുകി എടുത്ത കോഴിയുടെ കാലിന്റെ ഭാഗത്തും നെഞ്ചിന്റെ ഭാഗത്തും കത്തികൊണ്ട് വരയുക. ശേഷം മസാലകള്‍ യോജിപ്പിച്ചു കോഴിയില്‍ പുരട്ടി അര മണിക്കൂര്‍ വയ്ക്കുക. 

ഫില്ലിങ്

മുട്ട പുഴുങ്ങിയത് ഒരു കോഴിക്ക് ഒന്ന്
സവാള - 1
വെളുത്തുള്ളി, ഇഞ്ചി ചതച്ചത് - ഒരു ടേബിള്‍ സ്പൂണ്‍
പച്ചമുളക് -എരിവ് അനുസരിച്ച്
മഞ്ഞപ്പൊടി - ഒരു ടീസ്പൂണ്‍
മുളകു പൊടി - ഒരു സ്പൂണ്‍
തക്കാളി-1
ഉപ്പ് -
മല്ലിയില, കറിവേപ്പില - നാലു തണ്ട്
നെയ്യ് - കുറച്ച്

ഉണ്ടാക്കുന്ന വിധം
 
ചുവട് കട്ടിയുള്ള നോണ്‍സ്റ്റിക് തവയില്‍ നെയ്യൊഴിച്ച് ചൂടാകുമ്പോള്‍ അതിലേക്ക് മഞ്ഞപ്പൊടി മുളകുപൊടി, ഇഞ്ചിവെളുത്തുള്ളി, പച്ചമുളക് കറിവേപ്പില സവാളയരിഞ്ഞത് എന്നിവ ചേര്‍ത്ത് നന്നായി വഴറ്റിയെടുക്കുക. ഇതിലേക്ക് തക്കാളി ചേര്‍ത്തു വഴന്നുവന്നാല്‍ ഉപ്പ് ചേര്‍ത്തു കൊടുക്കുക. ശേഷം പുഴുങ്ങിയ മുട്ടയും മല്ലിയിലയും ചേര്‍ക്കുക. 

മസാല പുരട്ടിവച്ച ചിക്കനെടുത്ത് അതിലേക്ക് തയാറാക്കി വച്ച മസാല നിറയ്ക്കുക. ശേഷം നൂല്‍ കൊണ്ട് തുന്നിപ്പിടിപ്പിക്കുക. 
ഒരു വലിയ പാത്രത്തിലേക്ക് ചൂടുള്ള വെള്ളമൊഴിച്ച് അതിലേക്ക് കോഴിയിട്ട് വേവിക്കുക. മൂടിവയ്ക്കണം. വെള്ളം വറ്റുന്ന വരെ. ഇനി ചീനച്ചട്ടിയിലോ ഫ്രൈപാനിലോ എണ്ണ ഒഴിച്ച് ചൂടാകുമ്പോള്‍ വേവിച്ചു വച്ച ചിക്കന്‍ ഒന്ന് വറുത്ത് കോരിയെടുക്കുക. അടിപൊളി രുചിയുള്ള ചിക്കന്‍ ഫുള്‍ ഫ്രൈ റെഡി.