മലയാളിക്ക് പ്രിയപ്പെട്ടവയാണ് ബീഫ്. ബീഫ് ഫ്രൈ, ബീഫ് ബിരിയാണി, ബീഫ് കപ്പ, ഇങ്ങനെ പലതരത്തിലുള്ള കോമ്പിനേഷനുകളും ഇഷ്ടമുള്ളവരാണ് മലയാളികള്‍. അവധിദിവസങ്ങളില്‍ ആസ്വദിച്ചു കഴിക്കാന്‍ വേണ്ടി ബീഫ് വാങ്ങുന്നവരാണ് പലരും. എന്നാല്‍ വാങ്ങിയ ബീഫ് നല്ലതാണോ ചീത്തയാണോ എന്ന് എങ്ങനെ മനസിലാവും. ഇതിനായി ചെറിയൊരു ട്രിക്കുണ്ട്.

നമ്മള്‍ വാങ്ങിയ ബീഫിന്റെ നിറവും മണവും ഗുണവും അത് പാക്ക് ചെയ്തിരിക്കുന്നതു വരെ ശ്രദ്ധിക്കണം. നല്ല ബീഫാണോ എന്ന് നിറം കണ്ടാല്‍ തന്നെ മനസിലാക്കാം. നിറം കാണുമ്പോള്‍ ഫ്രഷ് ബീഫ് ആണോ എന്നു മനസിലാക്കാവുന്നതാണ്. ഫ്രഷായ ബീഫിന് എപ്പോഴും നല്ല ചുവപ്പ് നിറമായിരിക്കും ഉണ്ടാവുക.

പുതിയ ഇറച്ചിയാണെന്നതിന്റെ പ്രധാനസൂചന  തന്നെയാണിത്. അതേ സമയം ഗ്രൗണ്ട് ബീഫ് ആണെങ്കില്‍ പുറത്ത് നല്ല ബ്രൈറ്റ് റെഡും അകത്ത് ചെറിയ ബ്രൗണ്‍ നിറവുമായിരിക്കും. ഇത് ഓക്‌സിഡേഷന്‍ മൂലവും സംഭവിക്കാം. അതേസമയം പഴയ ഇറച്ചിയാണെങ്കില്‍ ഇറച്ചിക്ക് ഇരുണ്ട നിറമായിരിക്കും. പേശികളുടെ നാരുകള്‍ ദുര്‍ബലമാവുന്നത് കൊണ്ടാണ് ഇത്തരത്തില്‍ നിറം മാറുന്നത്. 

മണം 

നല്ല ഫ്രഷ് ബീഫാണെങ്കില്‍ വൃത്തിയുള്ള നല്ല മണമായിരിക്കും. അതിനു വേറെ മണമൊന്നും ഉണ്ടാവാനുള്ള സാധ്യതയില്ല. എന്തെങ്കിലും രൂക്ഷഗന്ധമോ മറ്റോ ഉണ്ടെങ്കില്‍ മാംസം കേടായതാണെന്ന് ഉറപ്പിക്കാം. ചിലപ്പോള്‍ കണ്ടാല്‍ മനസിലാവണമെന്നും ഇല്ല.  വേവിക്കുമ്പോള്‍ ചീത്തമണം വരുന്നതാണ്. അങ്ങനെ മണമുണ്ടായാല്‍ കേടുവന്ന ബീഫാണെന്നു മനസിലാക്കാം. അത് കഴിക്കാതിരിക്കുന്നതാണ് നല്ലത്. 

മാര്‍ബ്ലിങ്

മാംസത്തിലടങ്ങിയ കൊഴുപ്പിന്റെ അടയാളത്തിനെയാണ് മാര്‍ബ്ലിങ് എന്ന് പറയുന്നത്. ഇതാണ് ബീഫിന്റെ ഗുണനിലവാരം അളക്കുന്നതിലെ ഘടകം. ബീഫിന്റെ രുചിയും സ്മൂത്ത്‌നെസും വര്‍ധിപ്പിക്കാന്‍ മാര്‍ബ്ലിങ് നല്ലതായിരിക്കണം. മാര്‍ബ്ലിങ് കുറവാണെങ്കില്‍ അതിനു രുചിയും കുറവായിരിക്കും. 

കൊഴുപ്പ്

കൊഴുപ്പ് നോക്കിയും നമുക്ക് ബീഫ് മികച്ചതാണോ എന്നു മനസിലാക്കാം. വെള്ള നിറത്തിലോ ചെറിയ രീതിയില്‍ മഞ്ഞ കലര്‍ന്ന നിറത്തിലോ ആയിരിക്കും കൊഴുപ്പുള്ള ഭാഗം. ഇവ കഴിക്കുന്ന ഭക്ഷണത്തിനനുസരിച്ചായിരിക്കും കൊഴുപ്പിന്റെ നിറവ്യത്യാസവും.

പുല്ല് കഴിക്കുന്ന മൃഗമാണെങ്കില്‍ അതിന്റെ കൊഴുപ്പ് മഞ്ഞ നിറമായിരിക്കും. ഉയര്‍ന്ന ഗുണനിലവാരമുള്ള ബീഫായിരിക്കും ഇത്തരത്തിലുള്ളത്. ധാന്യങ്ങള്‍ കഴിക്കുന്നവയാണെങ്കില്‍ കൊഴുപ്പിന്റെ നിറം വെള്ളയും ആയിരിക്കും. 

Beef is a favorite delicacy for many Malayalis, enjoyed in dishes like beef fry, beef biryani, and beef with tapioca. While many buy beef to enjoy on weekends or special occasions, it’s important to ensure that the meat is fresh and safe before cooking. Here's how to identify good-quality beef using a few simple checks