കോട്ടയം: ഗവേഷണ വിദ്യാര്‍ഥികളുടെ ഫെലോഷിപ് വിതരണം മുടങ്ങിയതില്‍ എംജി സര്‍വകലാശാലയില്‍ പ്രതിഷേധം ശക്തമായി. സര്‍വകലാശാലയുടെ ആസ്ഥാനത്തേക്ക് എഐഎസ്എഫ് മാര്‍ച്ചും നടത്തി. 200ല്‍ അധികം വിദ്യാര്‍ഥികള്‍ക്ക് മാസങ്ങളായി സര്‍വകലാശാല കാംപസിലും വിവിധ കോളജുകളിലുമായി ഫെലോഷിപ് ലഭിക്കുന്നില്ല.

 എംജിയിലും ഗവേഷക വിദ്യാര്‍ഥികളുടെ ഫെലോഷിപ് വിതരണത്തില്‍ പ്രതിസന്ധി തുടരുകയാണ്. 2022ല്‍ പ്രവേശനം നേടിയ വിദ്യാര്‍ഥികള്‍ക്ക് രണ്ടു വര്‍ഷത്തിലധികമായി ഫെലോഷിപ് കിട്ടിയിട്ടില്ല. 2023 അഡ്മിഷന്‍കാര്‍ക്ക് ഫെലോഷിപ് മുടങ്ങിയിട്ടാണെങ്കില്‍ 15 മാസവും കഴിഞ്ഞു. കടുത്ത സാമ്പത്തിക പ്രതിസന്ധിയാണ് ഗവേഷക വിദ്യാര്‍ഥികള്‍ നേരിടുന്നത്. പ്രശ്‌നത്തിന് പരിഹാരമാവശ്യപ്പെട്ട് എഐഎസ്എഫ് സവര്‍വകലാശാല ആസ്ഥാനത്ത് പ്രതിഷേധിച്ചു. പരിഹാരമുണ്ടായില്ലെങ്കില്‍ അനിശ്ചിതകാല സമരത്തെക്കുറിച്ച് ആലോചിക്കുമെന്നും നേതൃത്വം വ്യക്തമാക്കി.

നേരത്തേ എസ്എഫ്‌ഐയുടെ നേതൃത്വത്തിലും സര്‍വകലാശാലയിലെ ഗവേഷക വിദ്യാര്‍ഥികള്‍ പ്രതിഷേധിച്ചിരുന്നു. ഇതേ വിഷയത്തില്‍ കാലടി സംസ്‌കൃത സര്‍വകലാശാലയിലെ ഗവേഷക വിദ്യാര്‍ഥി നല്‍കിയ പരാതിയില്‍ ഹൈകോടതി നിര്‍ണായക ഉത്തരവും പുറപ്പെടുവിച്ചിരുന്നു. ഫെലോഷിപ് കുടിശ്ശിക കൊടുത്തു തീര്‍ത്തില്ലെങ്കില്‍ വൈസ് ചാന്‍സലര്‍ക്കും രജിസ്ട്രാര്‍ക്കും ശമ്പളം കൊടുക്കേണ്ടെന്നായിരുന്നു കോടതി ഉത്തരവ്.