തിരുവനന്തപുരം: ഗവര്‍ണര്‍ രാജേന്ദ്ര വിശ്വനാഥ് ആര്‍ലേക്കര്‍ പങ്കെടുക്കുന്ന കേരള സര്‍വകലാശാലയുടെ സെനറ്റ് യോഗം ഇന്ന്. ഭാരതാംബ ചിത്രവും ആര്‍എസ്എസ് സൈദ്ധാന്തികരുടെ ചിത്രവും രാജ്ഭവനില്‍ സ്ഥാപിച്ചതിനെതിരേയുള്ള എസ്എഫ്‌ഐയുടെ പ്രതിഷേധം ഇന്നും തുടരും. മഹാത്മാ ഗാന്ധിയുടെയും അംബേദ്കറുടെയും ചിത്രം ഉയര്‍ത്തിക്കൊണ്ടായിരിക്കും പ്രതിഷേധം എസ്എഫ്‌ഐ നടത്തുക.

സിന്‍ഡിക്കേറ്റിലേക്കുള്ള വിദ്യാര്‍ഥി പ്രതിനിധി തെരഞ്ഞെടുപ്പും ഇന്ന് നടക്കുന്നതാണ്. പ്രതിഷേധങ്ങള്‍ കണക്കിലെടുത്ത് കനത്ത സുരക്ഷയാകും പൊലിസ് ഒരുക്കുക. ഗവര്‍ണര്‍ വിളിച്ച വൈസ് ചാന്‍സലര്‍മാരുടെ യോഗവും ഇന്ന്. രാജ്ഭവനിലാണ് യോഗം നടക്കുക. സര്‍വകലാശാല ഭേദഗതി ബില്‍, സ്വകാര്യ സര്‍വകലാശാല ബില്‍ എന്നിവയില്‍ ഗവര്‍ണര്‍ ഇതുവരെയും ഒപ്പു വച്ചിട്ടില്ല.

ബില്‍ രാഷ്ട്രപതിക്ക് അയക്കുമോ എന്ന കാര്യത്തിലും ഗവര്‍ണര്‍ ഇതുവരെ തീരുമാനവും എടുത്തിട്ടില്ല. സര്‍വകലാശാലകളുമായി ബന്ധപ്പെട്ട വിവിധ കേസുകളില്‍ ചാന്‍സലര്‍ക്കെതിരായ ഹൈക്കോടതി വിധി നിലനില്‍ക്കെ ഇന്നു നടക്കുന്ന യോഗത്തിലെ ഗവര്‍ണറുടെ നിലപാട് നിര്‍ണായകമായിരിക്കും.