നിലമ്പൂര്‍: നിലമ്പൂരിലെ വിജയം ജനങ്ങള്‍ക്ക് സര്‍ക്കാറിനോടുള്ള വെറുപ്പെന്ന് പ്രതിപക്ഷ നേതാവ് വി.ഡി സതീശന്‍. ഉജ്വലമായ വിജയം സമ്മാനിച്ച നിലമ്പൂരിലെ ജനതയോട് നന്ദി പറയുന്നതായി അദ്ദേഹം അറിയിച്ചു. 

നിലമ്പൂരിലെ ജനങ്ങള്‍ കേരളത്തെ മുഴുവന്‍ പ്രതിനിധാനം ചെയ്താണ് വോട്ട് രേഖപ്പെടുത്തിയത്. ഒമ്പത് വര്‍ഷമായി അധികാരത്തിലിരിക്കുന്ന പിണറായി സര്‍ക്കാറിനെ ജനങ്ങളുടെ മനഃസാക്ഷിയുടെ കോടതിയില്‍ വിചാരണ ചെയ്യുന്ന തെരഞ്ഞെടുപ്പാണിതെന്നാണ് യു.ഡി.എഫ് നേരത്തെ പ്രഖ്യാപിച്ചത്' വാര്‍ത്താസമ്മേളനത്തില്‍ അദ്ദേഹം പറഞ്ഞു. ജനങ്ങള്‍ അവരെ വിചാരണ ചെയ്‌തെന്നും ശേഷം വമ്പന്‍ ഭൂരിപക്ഷത്തില്‍ യു.ഡി.എഫിനെ വിജയിപ്പിച്ചെന്നും അദ്ദേഹം ചൂണ്ടിക്കാട്ടി. 

ടീം യു.ഡി.എഫിന്റെ വിജയമാണിതെന്നും അദ്ദേഹം കൂട്ടിച്ചേര്‍ത്തു. കഴിഞ്ഞ തെരഞ്ഞെടുപ്പില്‍ 2700 വോട്ടിന് നഷ്ടമായ സീറ്റ് ഇത്തവണ അഞ്ചിരട്ടി വോട്ടിനാണ് ഞങ്ങള്‍ നിലമ്പൂരില്‍ തിരിച്ചുപിടിച്ചത്-സതീശന്‍ വാര്‍ത്താ സമ്മേളനത്തില്‍ ചൂണ്ടിക്കാട്ടി

.' പാലക്കാടും പുതുപ്പള്ളിയിലും തൃക്കാക്കരയിലും ഇതുപോലെ വലിയ വിജയം കാഴ്ചവെച്ചു. എല്‍.ഡി.എഫിന്റെ 16,000ത്തോളം വോട്ടാണ് നിലമ്പൂരില്‍ നഷ്ടപ്പെട്ടത്. ടീം യു.ഡി.എഫിന്റെ വിജയമാണിത്. എല്ലാ തെരഞ്ഞെടുപ്പിലും ഒരു പാര്‍ട്ടിയായാണ് യു.ഡി.എഫ് പ്രവര്‍ത്തിച്ചിട്ടുള്ളത്' - അദ്ദേഹം പറഞ്ഞു.  ജനങ്ങള്‍ എത്രമാത്രം വെറുപ്പോടെയാണ് ഈ സര്‍ക്കാറിനെ കാണുന്നത് എന്നതിന്റെ തെളിവാണ് ഈ വിജയം'.-സതീശന്‍ പറഞ്ഞു.

ചങ്ക് കൊടുത്തും മുന്നണിയെ സ്‌നേഹിക്കുന്ന പ്രവര്‍ത്തകരും നേതാക്കളുമുള്ളപ്പോള്‍ യു.ഡി.എഫ് ജനഹൃദയം കവരുമെന്നും പ്രതിപക്ഷ നേതാവ് കൂട്ടിച്ചേര്‍ത്തു. ഇത് യുഡിഎഫാണ്. ഒറ്റ പാര്‍ട്ടിയെ പോലെ പ്രവര്‍ത്തിക്കുന്ന ഐക്യ ജനാധിപത്യ മുന്നണിയാണ്. 2026-ല്‍ യുഡിഎഫ് കൊടുങ്കാറ്റ് പോലെ തിരിച്ച് വരുമെന്നും സതീശന്‍ ഫേസ്ബുക്കില്‍ പങ്കുവെച്ച കുറിപ്പില്‍ പറഞ്ഞു.

'എല്ലാവര്‍ക്കും അവകാശപ്പെട്ടതാണ് ഈ വിജയം.നിലമ്പൂരിലെ ജനങ്ങള്‍ക്ക് ഞങ്ങളൊരു വാക്ക് നല്‍കിയിരുന്നു. നിങ്ങള്‍ ആര്യാടന്‍ ഷൗക്കത്തിന് ഉജ്ജ്വല വിജയം നല്‍കിയാല്‍ 100ലധികം സീറ്റുമായി കൊടുങ്കാറ്റ് പോലെ യു.ഡി.എഫ് അധികാരത്തില്‍ വരുമെന്നായിരുന്നു അത്.ആ വാക്ക് പാലിക്കാന്‍ യു.ഡി.എഫ് നേതൃത്വം പ്രതിജ്ഞാബദ്ധമാണ്.അതിന് വേണ്ടി കഠിനാധ്വാനം ചെയ്യും'-സതീശന്‍ വ്യക്തമാക്കി.

തകര്‍ന്നു പോയ കേരളത്തെ തിരിച്ചു കൊണ്ടുവരാന്‍ യു.ഡി.എഫ് കൂടെയുണ്ടാവുമെന്ന വാക്കാണ് ജനങ്ങള്‍ക്ക് നല്‍കിയത്. ആ വാക്ക് പാലിക്കുമെന്നും അദ്ദേഹം വ്യക്തമാക്കി. നിലമ്പൂരിലെ ജനങ്ങളോട് ഏത് വാക്കുകൊണ്ടാണ് നന്ദി പറയേണ്ടതെന്ന് അറിയില്ലെന്നും അദ്ദേഹം പ്രതികരിച്ചു.