ഷാര്‍ജ: പൊതു ഹൈസ്‌കൂളുകളിലെ മികച്ച 10 വിദ്യാര്‍ഥികള്‍ക്ക് സൗജന്യ ഡ്രൈവിങ് ലൈസന്‍സ് നല്‍കുമെന്ന് ഷാര്‍ജ പൊലിസ് അറിയിച്ചു. 'ലൈസന്‍സ് ഓഫ് എക്‌സലന്‍സ്' എന്ന പേരിലുള്ള ഈ സംരംഭത്തിലൂടെ യുവ വിദ്യാര്‍ഥികളെ ശാക്തീകരിക്കുക, കോളജിലേക്ക് പോകാനുള്ള തയാറെടുപ്പില്‍ അവരെ പിന്തുണക്കുക എന്നിവയാണ് ഇതുകൊണ്ട് ലക്ഷ്യമിടുന്നത്. ഷാര്‍ജ പൊലിസിന്റെ വാഹന ഡ്രൈവര്‍ ലൈസന്‍സിങ് വകുപ്പ്, വിദ്യാഭ്യാസ മന്ത്രാലയം, ഷാര്‍ജ സ്വകാര്യ വിദ്യാഭ്യാസ അതോറിറ്റി, ഷാര്‍ജ ഡ്രൈവിങ് ഇന്‍സ്റ്റിറ്റ്യൂട്ട്, ബെല്‍ഹാസ ഡ്രൈവിങ് ഇന്‍സ്റ്റിറ്റ്യൂട്ട് എന്നിവ തമ്മിലുള്ള സഹകരണത്തിന്റെ അടിസ്ഥാനത്തിലാണ് പദ്ധതി നടപ്പാക്കുന്നത്.

ഇത് പ്രകാരം, നേത്ര പരിശോധന, പരിശീലന കോഴ്‌സ്, തിയറിപ്രാക്ടിക്കല്‍ പരിശോധനകള്‍, ലൈസന്‍സ് ഇഷ്യു ഫീസ് എന്നിവ സൗജന്യമായിരിക്കും. 'സമര്‍പ്പണത്തിന്റെ മക്കള്‍ക്കുള്ള ലൈസന്‍സ്' എന്ന പേരില്‍ മറ്റൊരു പദ്ധതിയും ഷാര്‍ജ പൊലിസ് പ്രഖ്യാപിച്ചു. പൊലിസ് ഉദ്യോഗസ്ഥരുടെ മക്കള്‍ക്ക് പരിശീലന ഫീസില്‍ 50 ശതമാനം കുറവ് നല്‍കുന്ന ഈ സംരംഭം വേനലവധിക്കാലത്ത് പ്രാബല്യത്തില്‍ ഉണ്ടാകും.

ചെറുപ്പം മുതലേ സുരക്ഷിത ഡ്രൈവിങ് സംസ്‌കാരം പ്രോത്സാഹിപ്പിക്കാനായി സര്‍ക്കാര്‍വിദ്യാഭ്യാസ സ്ഥാപനങ്ങള്‍ തമ്മില്‍ രൂപപ്പെടുത്തിയ ഫലപ്രദമായ പങ്കാളിത്തത്തിന്റെ ഭാഗമാണ് രണ്ട് സംരംഭങ്ങളുമെന്ന് ഷാര്‍ജ പൊലിസിലെ വാഹന, ഡ്രൈവര്‍ ലൈസന്‍സിങ് വകുപ്പ് ഡയരക്ടര്‍ ബ്രിഗേഡിയര്‍ ഖാലിദ് മുഹമ്മദ് അല്‍ കായ് പറഞ്ഞു.

മാര്‍ച്ച് 29 മുതല്‍ പ്രാബല്യത്തില്‍ വന്ന യു.എ.ഇയുടെ പുതിയ ട്രാഫിക് നിയമമനുസരിച്ച് 17 വയസ് തികഞ്ഞവര്‍ക്ക് ഡ്രൈവിംഗ് ലൈസന്‍സ് നേടാന്‍ അനുവാദമുണ്ട്. നേരത്തെ, കാറുകളും ലൈറ്റ് വാഹനങ്ങളും ഓടിക്കാനുള്ള ലൈസന്‍സ് ലഭിക്കണമെങ്കില്‍ 18 വയസ് തികഞ്ഞിരിക്കണമെന്നായിരുന്നു നിയമം.

In recognition of their academic excellence, Sharjah Police have announced offering free driving licences to the top ten high-performing high school graduates from public schools in the emirate.