ദോഹ: ഖത്തറിലെ അമേരിക്കന്‍ വ്യോമ താവളമായ അല്‍ ഉദൈദില്‍ തിങ്കളാഴ്ച വൈകിട്ട് ഇറാന്‍ നടത്തിയ മിസൈല്‍ ആക്രമണത്തില്‍ പ്രതിഷേധിച്ചു ലോക രാജ്യങ്ങള്‍. സഊദി അറേബ്യ, യു.എ.ഇ, കുവൈത്ത്, ബഹ്‌റൈന്‍ തുടങ്ങിയ ഗള്‍ഫ് രാജ്യങ്ങളെ കൂടാതെ ഫ്രാന്‍സ്, ഇറ്റലി, നെതര്‍ലാന്‍ഡ്‌സ്, സ്‌പെയിന്‍ തുടങ്ങിയ രാജ്യങ്ങളും രംഗത്ത് വന്നു. മേഖലയില്‍ സംഘര്‍ഷങ്ങളുണ്ടാകുന്നതില്‍ ശക്തമായ പ്രതിഷേധവും ഖത്തറിനു ഐക്യദാര്‍ഢ്യവും അറിയിച്ച ഐക്യ രാഷ്ട്ര സഭയുടെയും അറബ് ലീഗിന്റെയും നേതാക്കള്‍, രാജ്യങ്ങള്‍ സംയമനം പാലിക്കണമെന്നും ഖത്തറിലെ പൗരന്മാരുടെയും താമസക്കാരുടെയും സുരക്ഷ ഉറപ്പ് വരുത്തണമെന്നും പറഞ്ഞു.

ഇറാന്‍ ആക്രമണം ഖത്തറിന്റെ പരമാധികാരത്തിലുള്ള കടന്നു കയറ്റവും ഇത് ഗള്‍ഫ് രാജ്യങ്ങളുടെ മുഴുവന്‍ സുരക്ഷയെ ബാധിക്കുന്നതുമാണെന്നും, അംഗ രാജ്യമായ ഖത്തറിനു ജി.സി.സി കൗണ്‍സില്‍ ശക്തമായ പിന്തുണ നല്‍കുന്നുവെന്നും ഗള്‍ഫ് കോഓപറേറ്റിവ് കൗണ്‍സില്‍ സെക്രട്ടറി ജനറല്‍ ജാസിം മുഹമ്മദ് അല്‍ ബുദൈവി അറിയിച്ചു.
ഇത് അന്താരാഷ്ട്ര നിയമങ്ങളുടെ ലംഘനമാണെന്നും നല്ല അയല്പക്ക സൗഹൃദത്തെ ബാധിക്കുന്നതാണെന്നും ഒരിക്കലും അംഗീകരിക്കാന്‍ കഴിയില്ലെന്നും സഊദി വിദേശ കാര്യ മന്ത്രാലയത്തിന്റെ പ്രസ്താവനയില്‍ പറഞ്ഞു. ഇറാന്‍ ആക്രമണത്തെ ശക്തമായി അപലപിക്കുകയും ഖത്തറിനു പൂര്‍ണ്ണ പിന്തുണയുണ്ടാകുമെന്നും പ്രഖ്യാപിച്ചു.

ഇറാന്‍ ആക്രമണം ഖത്തറിന്റെ സുരക്ഷക്ക് ഭീഷണിയും മേഖലയിലെ സംഘര്‍ഷങ്ങള്‍ വ്യാപിപ്പിക്കുന്നതിനും വഴി വെക്കുന്നതാണെന്നും, നല്ല സൗഹൃദം നിലനിര്‍ത്തുന്നതിനു ദോഷം ചെയ്യുന്ന പ്രവൃത്തികള്‍ അനുകൂലിക്കാന്‍ പറ്റുന്നതല്ലെന്നും സമാധാന ചര്‍ച്ചയിലൂടെ പ്രശ്‌നങ്ങള്‍ പരിഹരിക്കണമെന്നും ഇറാന്‍ അക്രമം പ്രതിഷേധാര്‍ഹമെന്നും കുവൈത്ത്, ഒമാന്‍, ബഹ്‌റൈന്‍ തുടങ്ങിയ രാജ്യങ്ങള്‍ അറിയിക്കുകയും ഖത്തറിനു പൂര്‍ണ്ണ പിന്തുണ പ്രഖ്യാപിക്കുകയും ചെയ്തു.
'ഞാന്‍ ഖത്താറുമായി വലിയ സൗഹൃദത്തില്‍ പ്രവര്‍ത്തിക്കുന്നയാളാണ്. സംഘര്‍ഷങ്ങള്‍ ഇല്ലാതാക്കി ചര്‍ച്ചയിലൂടെ പ്രശ്‌നങ്ങള്‍ പരിഹരിക്കണം' ഫ്രാന്‍സ് പ്രസിഡന്റ് ഇമ്മാനുവല്‍ മാക്രോണ്‍ പറഞ്ഞു. മേഖലയില്‍ സമാധാനം നിലനിര്‍ത്തണമെന്നും ചര്‍ച്ചകള്‍ പുനരാരംഭിക്കണമെന്നും ഇറ്റാലിയന്‍ പ്രധാന മന്ത്രി ജോര്‍ജിയോ മെലാനിയും സോഷ്യല്‍ മീഡിയയില്‍ കുറിച്ചു.

മധ്യ പൂര്‍വ്വേഷ്യയിലെ സംഘര്‍ഷങ്ങള്‍ രൂക്ഷമാകുന്നതില്‍ ദു:ഖവും ആശങ്കയും രേഖപ്പെടുത്തിയ ഐക്യ രാഷ്ട്ര സഭ സെക്രട്ടറി ജനറല്‍ അന്റോണിയോ ഗുട്ടറസ്, സംഘര്‍ഷത്തില്‍ ഏര്‍പ്പെട്ട മുഴുവന്‍ രാജ്യങ്ങളും ആക്രമണങ്ങള്‍ അവസാനിപ്പിച്ചു അന്താരാഷ്ട്ര നിയമങ്ങള്‍ പാലിക്കണമെന്നും ആവശ്യപ്പെട്ടു.
ഖത്തറിനു എതിരെയുള്ള ഇറാന്‍ ആക്രമണത്തെ അംഗീകരിക്കാനാവില്ലെന്നും ഇത് അന്താരാഷ്ട്ര നിയമ ലംഘനമാണെന്നും അറബ് പാര്‍ലമെന്റ് വിലയിരുത്തി.

ഖത്തറിലെ അല്‍ ഉദൈദ് വ്യോമ താവളത്തിനു നേരെ ഇറാന്‍ നടത്തിയ ആക്രമണം കടുത്ത പ്രതിഷേധാര്‍ഹവും ഖത്തറിന്റെ പരമാധികാരത്തിലുള്ള കടന്നു കയറ്റമാണെന്നും സംഘര്‍ഷങ്ങള്‍ ഇല്ലാതാക്കണമെന്നും ഖത്തറിനു പൂര്‍ണ്ണ പിന്തുണ പ്രഖ്യാപിക്കുന്നതായും അറബ് ലീഗ് സെക്രട്ടറി ജനറല്‍ അഹമ്മദ് അബൂല്‍ ഗെയ്ത് അറിയിച്ചു.
മേഖലയില്‍ സംഘര്‍ഷം ഇല്ലാതാക്കണമെന്നും ഉഭയ കക്ഷി ചര്‍ച്ചകളിലൂടെ പ്രശ്‌നങ്ങള്‍ പരിഹരിച്ചു സമാധാനം നില നിര്‍ത്തണമെന്നും ഖത്തറിനു ഐക്യദാര്‍ഢ്യം അറിയിക്കുന്നുവെന്നും ഹങ്കറി, അയര്‍ലന്‍ഡ്, മൊറോക്കോ, സുഡാന്‍, ഈജിപ്ത്, ഇറാഖ്, ജോര്‍ദാന്‍, ലബനാന്‍, ഫലസ്തീന്‍, സോമാലിയ, ലിബിയ, യെമന്‍, സിറിയ തുടങ്ങിയ രാജ്യങ്ങളും, അതോടൊപ്പം മുസ്ലിം വേള്‍ഡ് ലീഗ്, അറബ് ഇന്റീരിയര്‍ മിനിസ്റ്റേഴ്‌സ് കൗണ്‍സില്‍ പോലുള്ള നിരവധി പ്രസ്ഥാനങ്ങളും അഭിപ്രായപ്പെട്ടു.