ഇന്ത്യൻ ടെസ്റ്റ് നായകൻ ശുഭ്മൻ ഗിൽ തങ്ങളെ വളരെയധികം പ്രചോദിപ്പിച്ചുവെന്ന് തുറന്നു പറഞ്ഞിരിക്കുകയാണ് യുവതാരം വൈഭവ് സൂര്യവംശി. ഗില്ലിന്റെ മത്സരം കണ്ടപ്പോൾ വളരെ പ്രചോദനമായെന്നും ഗിൽ രാജ്യത്തിന് മാതൃകയാണെന്നും സൂര്യവംശി പറഞ്ഞു. 

''എനിക്ക് കാര്യങ്ങൾ വളരെ നന്നായി തോന്നുന്നു. ഇംഗ്ലണ്ടിലെ എന്റെ ആദ്യ ടെസ്റ്റ് മത്സരമാണിത്. മത്സരം എങ്ങനെ പോകുന്നുവെന്ന് ഞാൻ കാണുന്നുണ്ട്. ഞങ്ങൾ എല്ലാവരും മത്സരം കാണാൻ എത്തി. ഞങ്ങൾക്ക് ധാരാളം പ്രചോദനം ലഭിച്ചു. ശുഭ്മാൻ ഗിൽ ഞങ്ങൾക്ക് ഒരു മാതൃകയാണ്. എല്ലാവരുടെയും സ്വപ്നം രാജ്യത്തിനായി ടെസ്റ്റിൽ കളിക്കുക എന്നതാണ്," സൂര്യവംശി പറഞ്ഞു.

ഇംഗ്ലണ്ടിനെതിരായ രണ്ടാം ടെസ്റ്റിൽ ഡബിൾ സെഞ്ച്വറി നേടിയാണ് ഗിൽ തിളങ്ങിയത്. ടെസ്റ്റ് ക്രിക്കറ്റിലെ ഗില്ലിന്റെ ആദ്യ ഡബിൾ സെഞ്ച്വറിയാണിത്. 387 പന്തിൽ നിന്നും 269 റൺസാണ് ഗില്ലിന്റെ ബാറ്റിൽ നിന്നും പിറന്നത്. 30 ഫോറുകളും മൂന്ന് സിക്സുകളും അടങ്ങുന്നതാണ് ക്യാപ്റ്റന്റെ ഇന്നിംഗ്സ്. 

അതേസമയം 2025 ഐപിഎല്ലിൽ  രാജസ്ഥാൻ റോയൽസിനായി നടത്തിയ മിന്നും പ്രകടനങ്ങൾക്ക് പിന്നാലെയാണ്  വൈഭവ് എന്ന പേര് ക്രിക്കറ്റ് ലോകത്തിൽ ചർച്ചയായത്. 2025 ഐപിഎല്ലിലെ സൂപ്പർ സ്ട്രൈക്കർ അവാർഡ് സ്വന്തമാക്കിയത് വൈഭവ് സൂര്യവംശിയായിരുന്നു. രാജസ്ഥനായി ഏഴ് മത്സരങ്ങളിൽ നിന്നും ഒരു സെഞ്ച്വറിയും ഒരു അർദ്ധ സെഞ്ച്വറിയും ഉൾപ്പെടെ 252 റൺസാണ് നേടിയത്.

ഗുജറാത്ത് ടൈറ്റൻസിനെതിരെയുള്ള മത്സരത്തിൽ ആയിരുന്നു വൈഭവ് സെഞ്ച്വറി നേടിയത്. മത്സരത്തിൽ 35 പന്തിൽ സെഞ്ച്വറി നേടിയാണ് താരം രാജസ്ഥാന്റെ വിജയ ശില്പിയായത്. ചെന്നൈക്കെതിരെ 33 പന്തിൽ നാല് വീതം ഫോറുകളും സിക്സുകളും ഉൾപ്പെടെ 57 റൺസും നേടി വൈഭവ് തിളങ്ങി. 

ലഖ്‌നൗ സൂപ്പർ ജയന്റസിനെതിരെയുള്ള മത്സരത്തിലാണ് വൈഭവ് ഈ സീസണിൽ അരങ്ങേറ്റം കുറിച്ചത്. ഐപിഎല്ലിൽ അരങ്ങേറ്റം കുറിക്കുന്ന ഏറ്റവും പ്രായം കുറഞ്ഞ താരമായും വൈഭവ് മാറിയിരുന്നു. തന്റെ 14ാം വയസിലാണ് താരം ഈ ചരിത്രനേട്ടം തന്റെ പേരിലാക്കി മാറ്റിയത്.2025 താരലേലത്തിൽ രാജസ്ഥാൻ റോയൽസ് ആയിരുന്നു വൈഭവിനെ സ്വന്തമാക്കിയിരുന്നത്. ലേലത്തിൽ 1.10 കോടി രൂപക്കായിരുന്നു ഈ 14കാരനെ രാജസ്ഥാൻ തങ്ങളുടെ തട്ടകത്തിലെത്തിച്ചത്. ഇതോടെ ഐപിഎൽ ലേലത്തിൽ ടീമിൽ ഇടം നേടുന്ന ഏറ്റവും പ്രായം കുറഞ്ഞ താരമായും വൈഭവ് മാറിയിരുന്നു. 

Youngster Vaibhav Suryavanshi has openly said that Indian Test captain Shubman Gill has inspired them a lot Suryavanshi said that watching Gills match was very inspiring and that Gill is a role model for the country