തിരുവനന്തപുരം: ഭാരതാംബ വിവാദത്തെ തുടർന്ന് പോര് രൂക്ഷമായ കേരള സർവകലാശാലയിൽ രജിസ്ട്രാർ ഡോ.കെ.എസ് അനിൽകുമാറിനോട് സർവകലാശാലാ ആസ്ഥാനത്തെ ഓഫിസിൽ പ്രവേശിക്കരുതെന്ന് താൽകാലിക വൈസ് ചാൻസിലർ ഡോ.സിസ തോമസ്. രജിസ്ട്രാറുടെ അവധി അപേക്ഷയും വി.സി നിരസിച്ചു. ഔദ്യോഗിക ചുമതലകൾ നിർവഹിക്കരുതെന്നും ലംഘിച്ചാൽ കർശന നടപടിയുണ്ടാകുമെന്നും മുന്നറിയിപ്പുണ്ട്.

ALSO READ: രജിസ്ട്രാർ കെ.എസ് അനിൽകുമാർ സർവകലാശാലയിൽ കയറരുത്; നോട്ടിസ് നൽകി വിസി ഡോ. സിസ തോമസ്

വി.സിയുടെ നോട്ടിസ് ലഭിച്ചതിനു പിന്നാലെയാണ് ഡോ.കെ.എസ് അനിൽകുമാർ അവധി അപേക്ഷ നൽകിയത്. എന്നാൽ സസ്‌പെൻഷനിലുള്ളയാളുടെ അപേക്ഷയ്ക്ക് പ്രസക്തിയില്ലെന്നാണ് വി.സിയുടെ നിലപാട്.

താൽകാലിക വി.സിയുടെ ചുമതലയിൽനിന്ന് ഡോ.സിസ തോമസ് ഇന്നലെ ഒഴിഞ്ഞു. അവധിക്കു ശേഷം വൈസ് ചാൻസിലർ ഡോ.മോഹനൻ കുന്നുമ്മൽ ഇന്നു മടങ്ങിയെത്തും. ഇന്ന് പഠിപ്പുമുടക്ക് പ്രഖ്യാപിച്ച എസ്.എഫ്.ഐ രാജ്ഭവനിലേക്കും സർവകലാശാലാ ആസ്ഥാനത്തേക്കും മാർച്ച് നടത്തുമെന്ന് അറിയിച്ചു. വൈസ് ചാൻസിലറെ സർവകലാശാലാ ആസ്ഥാനത്ത് പ്രവേശിക്കാൻ അനുവദിക്കില്ലെന്നും എസ്.എഫ്.ഐ അറിയിച്ചിട്ടുണ്ട്.

കേരള സർവകലാശാലാ സെനറ്റ് ഹാളിൽ സംഘടിപ്പിച്ച ഗവർണർ പങ്കെടുത്ത പരിപാടിയിൽ കാവിക്കൊടിയേന്തിയ ഭാരതാംബയുടെ ചിത്രം സ്ഥാപിച്ചതിനു പിന്നാലെയാണ് പോർവിളി തുടങ്ങിയത്.

ALSO READ: സര്‍വകലാശാലകള്‍ ഗവര്‍ണര്‍ കാവിവല്‍കരിക്കുന്നു; എസ്എഫ്‌ഐ പ്രതിഷേധ മാര്‍ച്ചില്‍ സംഘര്‍ഷം

രജിസ്ട്രാർ കെ.എസ് അനിൽകുമാറിനെ സർവകലാശാലാ നിയമം 7 പ്രകാരം സ്ഥാനത്തുനിന്ന് ഗവർണർ നീക്കുമെന്ന് സൂചനയുണ്ട്. സസ്പെൻഷൻ റദ്ദാക്കിയ സിൻഡിക്കേറ്റ് തീരുമാനത്തിന് നിയമസാധുത ഇല്ലെന്ന വി.സിയുടെ റിപ്പോർട്ട് പരിഗണിച്ചാണ് നടപടിക്കൊരുങ്ങുന്നത്. ഗവർണർ തുടർനടപടിയിലേക്ക് കടന്നാൽ കോടതിയെ സമീപിക്കാനാണ് സിൻഡിക്കേറ്റ് തീരുമാനം.