മുംബൈ: മഹാരാഷ്ട്രയില്‍ ക്രൈസ്തവ വിഭാഗങ്ങളെ ലക്ഷ്യംവച്ചുള്ള നീക്കങ്ങള്‍ തുടര്‍ന്ന് സംസ്ഥാനത്തെ ബിജെപി സര്‍ക്കാര്‍. നൂറുകണക്കിന് അനധികൃത ക്രിസ്ത്യന്‍ പള്ളികളുണ്ടെന്നും അത് ആറുമാസത്തിനുള്ളില്‍ പൊളിച്ചുനീക്കുമെന്നും സംസ്ഥാന റവന്യൂ മന്ത്രി ചന്ദ്രശേഖര്‍ ബവന്‍കുലെ പറഞ്ഞു. സംസ്ഥാനത്ത് തര്‍ക്കത്തിലള്ള അനധികൃത പള്ളികളെ സംബന്ധിച്ച് സുപ്രിംകോടതി ഉത്തരവ് നിലവിലുണ്ടെന്നും ഇതുപ്രകാരം ആറുമാസത്തിനുള്ളില്‍ 199 പഞ്ചായത്തുകളിലെ ക്രിസ്ത്യന്‍ പള്ളികള്‍ പൊളിച്ചുനീക്കുമെന്നും ബി.ജെ.പി നേതാവ് കൂടിയായ മന്ത്രി നിയമസഭയെ അറിയിച്ചു.

ആദിവാസി മേഖലകള്‍ കേന്ദ്രീകരിച്ച് നിര്‍ബന്ധിത മതപരിവര്‍ത്തനം നടക്കുന്നതായി സര്‍ക്കാരിന്റെ ശ്രദ്ധയില്‍ പെട്ടിട്ടുണ്ട്. ഇത് തടയാന്‍ കര്‍ശനമായി നിയമം നടപ്പിലാക്കും. പല സ്ഥലങ്ങളിലും ഭീഷണിയിലൂടെയും പ്രലോഭനങ്ങള്‍ നല്‍കിയുമാണ് മതപരിവര്‍ത്തനം നടത്തിയിട്ടുള്ളത്. മതപരിവര്‍ത്തനം തടയുന്ന നിയമം നിലവിലുണ്ടെങ്കിലും അത് ഫലപ്രദമല്ല. കൂടുതല്‍ കര്‍ശനമായ വ്യവസ്ഥകള്‍ ഉള്‍പ്പെടുത്തിയുള്ള നിയമനിര്‍മാണം പരിഗണനയിലാണെന്നും മന്ത്രി അറിയിച്ചു.

ALSO READ: അസമില്‍ ബംഗ്ലാദേശികളെന്നാരോപിച്ച് നാടുകടത്തലും ബുള്‍ഡോസര്‍ രാജും തകൃതി; ബി.ജെ.പി സര്‍ക്കാര്‍ പൊളിച്ചുനീക്കിയത് പതിനായിരത്തിലധികം വീടുകള്‍

വിദേശ ഫണ്ട് ഉപയോഗിച്ച് ആദിവാസി വിഭാഗത്തില്‍പെട്ടവരെ കൂട്ടത്തോടെ ക്രിസ്ത്യന്‍ പള്ളികളുടെ നേതൃത്വത്തില്‍ മതം മാറ്റുന്നതായി ആരോപിച്ച് ബി.ജെ.പി എം.എല്‍.എമാര്‍ ഉന്നയിച്ച ചോദ്യത്തിനുള്ള മറുപടിയിലാണ് മന്ത്രി ഇക്കാര്യം വ്യക്തമാക്കിയത്.

അന്വേഷണം നടത്തി ആറ് മാസത്തിനുള്ളില്‍ പള്ളി നിര്‍മിതികള്‍ പൊളിച്ചുമാറ്റുമെന്നും അദ്ദേഹം പറഞ്ഞു. അനധികൃത നിര്‍മാണങ്ങള്‍ പൊളിക്കുന്നതിലെ കാലതാമസം അതുല്‍ ഭട്ഖല്‍ക്കര്‍ എംഎല്‍എ ആണ് സഭയില്‍ ഉന്നയിച്ചത്. മഹാരാഷ്ട്രയില്‍ നടക്കുന്ന മതപരിവര്‍ത്തനങ്ങളില്‍ ഭൂരിഭാഗവും നിര്‍ബന്ധിതമോ ലവ് ജിഹാദോ എന്ന പേരിലോ ആണെന്നും അദ്ദേഹം ആരോപിച്ചു. മറ്റ് സംസ്ഥാനങ്ങളില്‍ നടപ്പിലാക്കിയതുപോലുള്ള കര്‍ശനമായ മതപരിവര്‍ത്തന വിരുദ്ധ നിയമം സംസ്ഥാനം എപ്പോഴാണ് കൊണ്ടുവരുന്നതെന്ന് ഭട്ഖല്‍ക്കര്‍ ചോദിച്ചു.

Maharashtra Revenue Minister Chandrashekhar Bawankule informed the State Assembly that the government is set to demolish unauthorized churches in the state and is considering introducing a stringent law to curb religious conversions.