വാഷിങ്ടണ്‍: അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ ആരോഗ്യനില അസാധാരണവും മികച്ചതുമാണെന്ന് ഡോക്ടര്‍മാര്‍. ട്രംപിന്റെ ഹൃദയത്തിന് അദ്ദേഹത്തിന്റെ യഥാര്‍ഥ പ്രായമായ 79 വയസിനേക്കാള്‍ 14 വയസ്സ് കുറവാണെന്ന് കണ്ടെത്തിയതായി അദ്ദേഹത്തിന്റെ ഡോക്ടര്‍ ഷോണ്‍ ബാര്‍ബബെല്ല അറിയിച്ചു. 

ജനുവരിയില്‍ യു.എസ് പ്രസിഡന്റായി സ്ഥാനമേല്‍ക്കുമ്പോള്‍ അമേരിക്കന്‍ പ്രസിഡന്റാകുന്ന ഏറ്റവും പ്രായം കൂടിയ വ്യക്തിയായിരുന്നു ട്രംപ്. രാജ്യത്തിന്റെ പ്രസിഡന്റായി സേവനമനുഷ്ഠിക്കുന്ന ഏറ്റവും പ്രായം കൂടിയ രണ്ടാമത്തെ വ്യക്തിയുമാണ് ട്രംപ്.

ട്രംപ് അസാധാരണമായ ആരോഗ്യത്തോടെ തുടരുന്നു. ട്രംപിന്റെ ഹൃദയം, ശ്വാസകോശം, നാഡീവ്യൂഹം, മൊത്തത്തിലുള്ള ശരീരികാരോഗ്യംഎന്നിവയെല്ലാം മികച്ചതാണെന്നും ഡോക്ടര്‍മാര്‍ പറയുന്നു. 

ALSO READ: 'എനിക്ക് തരൂ എന്ന് പറഞ്ഞിട്ടില്ല, അവരെന്നെ വിളിച്ചു'; സമാധാന നൊബേലില്‍ പ്രതികരണവുമായി ട്രംപ്

വരാനിരിക്കുന്ന അന്താരാഷ്ട്ര യാത്രയ്ക്കുള്ള തയ്യാറെടുപ്പിനായി, ട്രംപ് പ്രതിരോധ ആരോഗ്യ പരിശോധനകളും പ്രതിരോധ കുത്തിവയ്പ്പുകളും സ്വീകരിച്ചു. വാര്‍ഷിക ഇന്‍ഫ്‌ലൂവന്‍സയും പുതുക്കിയ കോവിഡ് 19 ബൂസ്റ്റര്‍ വാക്‌സിനുകളും അദ്ദേഹം സ്വീകരിച്ചിട്ടുണ്ട്. 

ട്രംപിന് 6 അടി, 3 ഇഞ്ച് (190 സെന്റീമീറ്റര്‍) ഉയരവും 224 പൗണ്ട് (102 കിലോഗ്രാം) ഭാരവുമുണ്ടെന്ന് മേരിലാന്‍ഡിലെ വാള്‍ട്ടര്‍ റീഡ് നാഷണല്‍ മിലിട്ടറി മെഡിക്കല്‍ സെന്ററില്‍ നടത്തിയ പരിശോധനകളില്‍ പറയുന്നു. റെഡ് മീറ്റിനോട് പൊതുവേ കൂടുതല്‍ താല്‍പര്യമുള്ള അമേരിക്കന്‍ പ്രസിഡന്റിന്റെ കൊളസ്‌ട്രോള്‍ അളവും നിയന്ത്രണവിധേയമാണ്. 

നേരത്തേ ജൂലൈയില്‍, ട്രംപിന്റെ കാലുകളിലെ വീക്കവും വലതുകൈയ്യിലെ ചതവും ചര്‍ച്ചയായിരുന്നു. കാലിലെ പ്രശ്നം 'ക്രോണിക് വീനസ് ഇന്‍സഫിഷ്യന്‍സി' മൂലമാണെന്ന് അന്ന് പരിശോധനകളില്‍ സ്ഥിരീകരിച്ചിരുന്നു. ആസ്പിരിന്‍ ഉപയോഗമാണ് കൈയിലെ ചതവിന് കാരണമെന്നും ഡോക്ടര്‍മാര്‍ വിശദീകരിച്ചിരുന്നു. 

നേരത്തെ, തെരഞ്ഞെടുപ്പ് പ്രചാരണ വേളയില്‍ മുന്‍ അമേരിക്കന്‍ പ്രസിഡന്റ് ജോ ബൈഡനുമായി തന്നെ താരതമ്യം ചെയ്ത ട്രംപ് താന്‍ കൂടുതല്‍ 'ഫിറ്റ്' ആണെന്ന് അവകാശപ്പെട്ടിരുന്നു. 2020 ല്‍, അദ്ദേഹത്തിന് കോവിഡ്-19 ബാധിച്ചിരുന്നു. അന്ന് ട്രംപിന്റെ ആരോഗ്യസ്ഥിതിയെക്കുറിച്ച് പരസ്പരവിരുദ്ധവും അവ്യക്തവുമായ പ്രസ്താവനകളാണ് വൈറ്റ് ഹൗസ് പുറത്തിറക്കിയിരുന്നത്.

English Summary:  President Donald Trump’s medical team has declared that his health is “exceptional,” even suggesting that his heart is biologically closer to that of a 65‑year‑old rather than his chronological age of 79. According to White House physician Sean Barbabella, his cardiovascular, pulmonary, neurological, and overall physical parameters are excellent. A recent exam included advanced imaging, lab tests, and preventive checkups, along with updated vaccinations for influenza and COVID‑19.