തൊടുപുഴ: പാമ്പുകടി മരണം കൂടുമ്പോഴും 'നോട്ടിഫയബിൾ ഡിസീസ്' ആയി പ്രഖ്യാപിക്കണമെന്ന കേന്ദ്ര നിർദേശം നടപ്പാക്കാതെ കേരളം. ആലപ്പുഴയിൽ വെള്ളിയാഴ്ച പാമ്പുകടിയേറ്റ് വീട്ടമ്മ മരിച്ചതാണ് ഒടുവിലത്തെ സംഭവം. 2030 ഓടെ പാമ്പ് കടി മരണങ്ങൾ പകുതിയാക്കി കുറയ്ക്കാൻ ലക്ഷ്യമിട്ട് കേന്ദ്ര സർക്കാർ പ്രഖ്യാപിച്ച പദ്ധതിയാണ് എൻ.എ.പി.എസ്.ഇ. പദ്ധതിയുടെ ആനുകൂല്യങ്ങൾ സംസ്ഥാനങ്ങൾക്ക് ലഭിക്കാൻ പാമ്പുകടി നോട്ടിഫയബിൾ ഡിസീസ് ആയി പ്രഖ്യാപിക്കണമെന്ന് കാണിച്ച് 2024 നവംബർ 27 ന് കേന്ദ്ര ആരോഗ്യകുടുംബക്ഷേമ മന്ത്രാലയം സെക്രട്ടറി പുണ്യ സലില ശ്രീവാസ്തവ എല്ലാ സംസ്ഥാനങ്ങൾക്കും കത്തയച്ചിരുന്നു. 

എന്നാൽ കത്തിനോട് പുറം തിരിഞ്ഞുനിൽക്കുന്ന സമീപനമാണ് കേരളം സ്വീകരിച്ചത്. കേന്ദ്ര നിർദേശപ്രകാരം കർണാടകം, തമിഴ്‌നാട് അടക്കമുള്ള സംസ്ഥാനങ്ങൾ പാമ്പുകടി നോട്ടിഫയബിൾ ഡിസീസ് ആയി വിജ്ഞാപനം ചെയ്‌തെങ്കിലും കേരളം ഇനിയും ചെയ്തിട്ടില്ല.

13 വർഷത്തിൽ 1118 പേരാണ് സംസ്ഥാനത്ത് പാമ്പുകടിയേറ്റ് മരിച്ചത്. 2024 (34), 2023 (48), 2022 (65), 2021 (52), 2020 (71), 2019 (123), 2018 (92), 2017 (119), 2016 (88), 2015 (119), 2014 (110), 2013 (113), 2012 (84) എന്നിങ്ങനെയാണ് കണക്ക്. ഈ വർഷം ഇതുവരെ ഏഴുപേർ മരണപ്പെട്ടിട്ടുണ്ട്. 

വിവിധ കേസുകളിൽ കഴിഞ്ഞ ജൂൺ 5ന് ഹൈക്കോടതി പുറപ്പെടുവിച്ച ഉത്തരവിൽ പാമ്പുകടി ഒരു നോട്ടിഫയബിൾ ഡിസീസ് ആയി പ്രഖ്യാപിക്കുന്നതിന്റെ ആവശ്യം സംബന്ധിച്ച് പരാമർശിച്ചിട്ടുണ്ട്. ചീഫ് ജസ്റ്റിസ് നിതിൻ മധുകർ ജാംദർ, ജസ്റ്റിസ് ശോഭ അന്നമ്മ ഈപ്പൻ എന്നിവരടങ്ങിയ ഡിവിഷൻ ബെഞ്ചിന്റേതാണ് പരാമർശം. ഏതാനും മാസങ്ങൾക്ക് മുമ്പ് സുപ്രിംകോടതിയും, പാമ്പുകടി മരണങ്ങൾ ഒഴിവാക്കുന്നതിനായി കേന്ദ്രസർക്കാരും സംസ്ഥാന സർക്കാരുകളും സജീവ നടപടികൾ സ്വീകരിക്കേണ്ടത് സംബന്ധിച്ച് നിർദേശം മുന്നോട്ടുവെച്ചിട്ടുണ്ട്.

നാല് വർഷത്തിനിടെ വിവിധ മേഖലകളിൽ നിന്നും 49436 പാമ്പുകളെ പിടികൂടി വാനപാലകർ കാട്ടിൽ തുറന്നുവിട്ടിട്ടുണ്ട്. 2021 ജനുവരി ഒന്നു മുതൽ 2025 മെയ് 18 വരെയുള്ള കണക്കാണിത്. സർപ്പ മൊബൈൽ ആപ്പ് വഴിയും സ്വകാര്യവ്യക്തികളിൽ നിന്ന് ലഭ്യമാകുന്ന അറിയിപ്പിന്റെ അടിസ്ഥാനത്തിൽ ജനവാസമേഖലകളിൽ എത്തുന്ന അപകടകാരികളായ വിഷപ്പാമ്പുകളെയടക്കം പിടികൂടി വനപ്രദേശങ്ങളിലേക്കാണ് മാറ്റുന്നത്. 

കണ്ണൂർ ജില്ലയിൽ നിന്നാണ് കൂടുതൽ പാമ്പുകള പിടികൂടിയത്, 10350. കുറവ് ഇടുക്കിയിൽ നിന്നും, 268. മറ്റ് ജില്ലകളിൽ നിന്നും പിടികൂടി കാട്ടിൽ തുറന്നുവിട്ട പാമ്പുകളുടെ കണക്ക്. തിരുവനന്തപുരം (5025), കൊല്ലം (1883), പത്തനംതിട്ട (1377), ആലപ്പുഴ (2901), കോട്ടയം (3762), എറണാകുളം (6822), തൃശൂർ (3244), പാലക്കാട് (956), മലപ്പുറം (3245), കോഴിക്കോട് (4143), വയനാട് (3420), കാസർകോട് (2040).