ഇന്ത്യൻ പരിശീലകൻ ഗൗതം ഗംഭീറിൽ നിന്നും ലഭിച്ച വലിയ പിന്തുണയെക്കുറിച്ച് സംസാരിച്ചിരിക്കുകയാണ് ഇന്ത്യൻ താരം സഞ്ജു സാംസൺ. ശ്രീലങ്കൻ പര്യടനത്തിൽ രണ്ട് തവണ പൂജ്യത്തിന് പുറത്തായപ്പോൾ ഗംഭീറിൽ നിന്നും ലഭിച്ച പിന്തുണയെകുറിച്ചാണ് സഞ്ജു പറഞ്ഞത്. ഇന്ത്യൻ മുൻ ഇന്ത്യൻ സ്പിന്നർ ആർ. അശ്വിന്റെ യൂട്യൂബ് ചാനലിലെ ‘കുട്ടി സ്റ്റോറീസ് വിത്ത് ആഷ്’ എന്ന പരിപാടിയിൽ സംസാരിക്കുകയായിരുന്നു സഞ്ജു. 

''ശ്രീലങ്കയിൽ ഞാൻ രണ്ട് മത്സരങ്ങളിൽ കളിച്ചിരുന്നു. ഈ രണ്ട് മത്സരങ്ങളിൽ ഞാൻ പൂജ്യത്തിനാണ് മടങ്ങിയത്. ഇതിൽ ഞാൻ നന്നായി വിഷമിച്ചു.  അപ്പോഴാണ് ഗൗതി ഭായ് എന്നെ കണ്ടത്. എന്റെ അടുത്തേക്ക് വന്ന് എന്താണ് സംഭവിച്ചതെന്ന് അദ്ദേഹം ചോദിച്ചു. എനിക്ക് ലഭിച്ച അവസരങ്ങൾ ഞാൻ കൃത്യമായി ഉപയോഗിച്ചില്ലെന്ന് ഞാൻ അദ്ദേഹത്തോട് പറഞ്ഞു. അപ്പോൾ 'നീ  21 ഡക്കുകൾ നേടിയാൽ മാത്രമേ ഞാൻ നിന്നെ ടീമിൽ നിന്ന് പുറത്താക്കൂ' എന്ന് അദ്ദേഹം എന്നോട് പറഞ്ഞു. അദ്ദേഹത്തിന്റെ ആ വലിയ ആത്മവിശ്വാസമാണ് എനിക്ക് മികച്ച പ്രകടനം നടത്താൻ സഹായിച്ചത്'' സഞ്ജു സാംസൺ പറഞ്ഞു. 

2015ൽ അന്താരാഷ്ട്ര ക്രിക്കറ്റിൽ അരങ്ങേറിയ സഞ്ജു ടി20യിൽ ഇതുവരെ 42 മത്സരങ്ങളിൽ നിന്നും മൂന്ന് സെഞ്ച്വറികൾ ഉൾപ്പെടെ 681 റൺസ് നേടിയിട്ടുണ്ട്. ടി20യിൽ അരങ്ങേറി പിന്നെയും 6 വർഷം കഴിഞ്ഞാണ് താരം ഏകദിനത്തിൽ അരങ്ങേറ്റം കുറിച്ചത്. 2021 ജൂലൈ 23നാണ് താരം ഏകദിന ക്രിക്കറ്റിൽ അരങ്ങേറിയത്. ഏകദിനത്തിൽ 16 മത്സരങ്ങളിൽ നിന്നായി ഒരു സെഞ്ച്വറിയടക്കം 510 റൺസും താരത്തിന്റെ പേരിലുണ്ട്. 

നിലവിൽ കേരള ക്രിക്കറ്റ് ലീഗ് രണ്ടാം സീസണിനായുള്ള തയ്യാറെടുപ്പിലാണ് സഞ്ജു. താരലേലത്തിൽ സഞ്ജുവിനെ 26.80 ലക്ഷം രൂപയാണ് സഞ്ജുവിന് ലഭിച്ചത്. കൊച്ചി ബ്ലൂ ടൈഗേഴ്‌സ് ആണ് സഞ്ജുവിനെ സ്വന്തമാക്കിയത്. ടൂർണമെന്റിന്റെ ചരിത്രത്തിൽ ഒരു താരത്തിന് ലഭിക്കുന്ന ഏറ്റവും ഉയർന്ന തുകയാണിത്. 

ഓഗസ്റ്റ് 21നാണ് കേരള ക്രിക്കറ്റ് ലീഗിന് തുടക്കമാവുന്നത്. നിലവിലെ ചാംപ്യൻമാരായ കൊല്ലം സെയ്‌ലേഴ്‌സും രണ്ടാം സ്ഥാനക്കാരായ കാലിക്കറ്റ് ഗ്ലോബ്സ്റ്റാർസും തമ്മിൽ  ഉദ്ഘാടന മത്സരം. രണ്ടാം മത്സരത്തിൽ വൈകിട്ട് 7.45ന് അദാനി ട്രിവാൻഡ്രം റോയൽസ്, കൊച്ചി ബ്ലൂ ടൈഗേഴ്‌സുമായി ഏറ്റുമുട്ടും. ദിവസവും രണ്ട് മത്സരങ്ങൾ വീതമാണ് നടക്കുന്നത്.

ടൂർണമെന്റ്് സെപ്റ്റംബർ ആറിന് സമാപിക്കും. കൊച്ചി ബ്ലൂ ടൈഗേഴ്‌സ്, ഏരീസ് കൊല്ലം സെയിലേഴ്‌സ്, കാലിക്കറ്റ് ഗ്ലോബ്സ്റ്റാർസ്, അദാനി ട്രിവാൻഡ്രം റോയൽസ്, തൃശൂർ ടൈറ്റൻസ്, ആലപ്പി റിപ്പിൾസ് എന്നീ ടീമുകളാണ് മത്സരിക്കുന്നത്. എല്ലാ മത്സരങ്ങളും കാര്യവട്ടം ഗ്രീൻഫീൽഡ് സ്റ്റേഡിയത്തിലാണ് നടക്കുന്നത്.

Indian batsman Sanju Samson has spoken about the immense support he received from India coach Gautam Gambhir. Sanju spoke about the support he received from Gambhir when he was dismissed for duck twice during the Sri Lanka tour.