ദോഹ: അന്താരാഷ്ട്ര നിക്ഷേപകരെ ആകർഷിക്കാനും രാജ്യത്തെ റിയൽ എസ്റ്റേറ്റ് വിപണിയും ഉണർവും ലക്ഷ്യമിട്ട് പുതിയ പദ്ധതി പ്രഖ്യാപിച്ച് ഖത്തർ. ഏകദേശം 2 ലക്ഷം യുഎസ് ഡോളർ (ഏകദേശം 7 ലക്ഷം ഖത്തർ റിയാൽ) വിലമതിക്കുന്ന വസ്തുക്കൾ വാങ്ങുന്ന വിദേശികൾക്ക് ദിവസങ്ങൾക്കുള്ളിൽ ഉടമസ്ഥാവകാശ രേഖയും (Title Deed) റിയൽ എസ്റ്റേറ്റ് റെസിഡൻസി വിസയും ലഭിക്കും. അറബിക് ദിനപത്രമായ അൽ ഷാർക്കാണ് വാർത്ത റിപ്പോർട്ട് ചെയ്തത്.

റിയൽ എസ്റ്റേറ്റ് റെഗുലേറ്ററി അതോറിറ്റി (RERA) ചെയർമാൻ എഞ്ചിനീയർ ഖാലിദ് ബിൻ അഹമ്മദ് അൽ ഉബൈദലിയാണ് പുതിയ പദ്ധതി പ്രഖ്യാപിച്ചത്. ആഭ്യന്തരം, നീതിന്യായം, തൊഴിൽ മന്ത്രാലയങ്ങളുമായി സഹകരിച്ചാണ് പുതിയ സംവിധാനം നടപ്പാക്കുന്നത്.

ALSO READ: ഖത്തര്‍: പ്രൈവറ്റ് സ്‌കൂളുകള്‍ക്കും കിന്റര്‍ഗാര്‍ട്ടനുകള്‍ക്കും ഇനി ലൈസന്‍സ് ഒരു വര്‍ഷത്തേക്കല്ല, 5 വര്‍ഷത്തേക്ക് വരെ 

"നിക്ഷേപകർക്ക് കാര്യങ്ങൾ എളുപ്പവും സുതാര്യവുമാക്കാൻ എല്ലാ സർക്കാർ സ്ഥാപനങ്ങളും ഒരുമിച്ച് പ്രവർത്തിക്കും," അൽ ഉബൈദലി പറഞ്ഞു. 

2 ലക്ഷം ഡോളർ (ഏകദേശം QAR 730,000) വിലയുള്ള വസ്തു വാങ്ങുന്ന വിദേശികൾക്ക് ഉടനടി ഉടമസ്ഥാവകാശ രേഖയും താമസ വിസയും ലഭിക്കും.

1 മില്യൺ ഡോളറോ (ഏകദേശം QAR 3.65 മില്യൺ) അതിൽ കൂടുതലോ വിലയുള്ള വസ്തു വാങ്ങുന്നവർക്ക്, സ്ഥിര താമസത്തിനുള്ള (Permanent Residency) യോഗ്യത ലഭിക്കും. ഇതിലൂടെ ആരോഗ്യ സംരക്ഷണം, വിദ്യാഭ്യാസം, മറ്റ് നിക്ഷേപ ആനുകൂല്യങ്ങൾ എന്നിവ ലഭിക്കും.

വിപണിയിൽ വൻ വളർച്ച

2025-ലെ രണ്ടാം പാദത്തിൽ ഖത്തറിലെ റിയൽ എസ്റ്റേറ്റ് മേഖലയിൽ വലിയ വളർച്ചയാണ് രേഖപ്പെടുത്തിയത്. ഇക്കാലയളവിൽ 8.9 ബില്യൺ റിയാലിന്റെ ഇടപാടുകൾ നടന്നു. ഇത് മുൻവർഷത്തെ അപേക്ഷിച്ച് 29.8% കൂടുതലാണ്. താമസസ്ഥലങ്ങൾ (Residential properties) വാങ്ങിയതിലുള്ള 114% വർദ്ധനവാണ് ഈ കുതിപ്പിന് കാരണം.

ഖത്തറിലെ പൗരന്മാർക്കും വിദേശികൾക്കും മാളുകളിലെ കടകൾ, ഓഫീസുകൾ, റെസിഡൻഷ്യൽ കോംപ്ലക്സുകളിലെ ഫ്ലാറ്റുകൾ എന്നിവ വാങ്ങാൻ അവസരമുണ്ട്.

ALSO READ: യൂറോപ്യൻ യൂണിയന്റെ പുതിയ എൻട്രി-എക്സിറ്റ് സംവിധാനം; യാത്രക്കാർക്ക് മുന്നറിയിപ്പുമായി ഖത്തർ എയർവേയ്സ് 

ഓൺലൈൻ സംവിധാനം

നിക്ഷേപകർക്ക് അവരുടെ ഉടമസ്ഥാവകാശ, വിസ നടപടിക്രമങ്ങൾ എല്ലാം ഒരു ഡിജിറ്റൽ പ്ലാറ്റ്‌ഫോം വഴി എളുപ്പത്തിൽ പൂർത്തിയാക്കാൻ കഴിയും. റിയൽ എസ്റ്റേറ്റ് രജിസ്‌ട്രേഷൻ നടപടികൾ ഏറ്റവും എളുപ്പമുള്ള രാജ്യങ്ങളിൽ ആഗോളതലത്തിൽ തന്നെ ഒന്നാം സ്ഥാനത്താണ് ഖത്തറെന്ന് RERA ചൂണ്ടിക്കാട്ടി. 24 മണിക്കൂറിനുള്ളിൽ ഉടമസ്ഥാവകാശ രേഖകളും നിർമ്മാണ പ്ലാനുകളും നൽകാൻ ഖത്തറിന് കഴിയുന്നുണ്ട്. കൂടാതെ, ലോകത്തിലെ ഏറ്റവും കുറഞ്ഞ പ്രോപ്പർട്ടി രജിസ്ട്രേഷൻ ഫീസാണ് (നിർമ്മാണ ചെലവിന്റെ 0.01%) ഖത്തറിൽ ഈടാക്കുന്നത്.

qatar offers residency visa to foreign nationals who invest $200,000 in real estate, promoting economic growth and attracting foreign investment.