റിയാ​ദ്: സെപ്തംബർ 11 മുതൽ 17 വരെയുള്ള ഒരാഴ്ചക്കാലയളവില്‍ സഊദിയില്‍ 25,553 പേരെ അറസ്റ്റ് ചെയ്തതായി അധികൃതര്‍ അറിയിച്ചു. സുരക്ഷാസേനയുടെ വിവിധ യൂണിറ്റുകളും ജനറൽ ഡയറക്ടറേറ്റ് ഓഫ് പാസ്‌പോർട്ടും (ജവാസത്ത്) നടത്തിയ സംയുക്ത പരിശോധനകളില്‍ റെസിഡന്‍സി നിയമങ്ങള്‍ ലംഘിച്ചവരെയും, അനധികൃത തൊഴിലാളികളെയും, കുടിയേറ്റ നിയമങ്ങള്‍ ലംഘിച്ചവരെയും, അതിര്‍ത്തി സുരക്ഷാ ലംഘനം നടത്തിയവരെയുമാണ് പിടികൂടിയത്.

ALSO READ: ഇവി ചാർജിംഗ് സൗകര്യങ്ങൾ വികസിപ്പിക്കാനൊരുങ്ങി ഖത്തർ; നിലവിൽ രാജ്യത്ത് 200 ഓളം ചാർജിംഗ് സ്റ്റേഷനുകൾ ലഭ്യമെന്ന് അധികൃതർ

‌ആഭ്യന്തര മന്ത്രാലയം ഈ ആഴ്ചയിൽ ആകെ 21,638 നിയമലംഘനങ്ങളാണ് രേഖപ്പെടുത്തിയത്. റെസിഡന്‍സി നിയമലംഘനത്തിന് 12,958 പേരെയും, തൊഴില്‍ നിയമങ്ങള്‍ ലംഘിച്ചതിന് 4,140 പേരെയും, അതിര്‍ത്തി സുരക്ഷാ ലംഘനങ്ങള്‍ക്ക് 4,540 പേരെയും അറസ്റ്റ് ചെയ്തിട്ടുണ്ട്. സഊദി അറേബ്യയിലേക്ക് അനധികൃതമായി കടക്കാൻ ശ്രമിക്കുന്നതിനിടെ 1,391 പേരെ അറസ്റ്റ് ചെയ്തു. അതേസമയം, നിയമവിരുദ്ധമായി രാജ്യം വിടാൻ ശ്രമിക്കുന്നതിനിടെ 31 പേരെ അറസ്റ്റ് ചെയ്തു.

നിയമവിരുദ്ധമായി അതിർത്തി കടക്കാൻ ശ്രമിക്കുന്നവരിൽ 54 ശതമാനം യെമൻ പൗരന്മാരും, 45 ശതമാനം എത്യോപ്യക്കാരും, ഒരു ശതമാനം മറ്റ് രാജ്യങ്ങളിൽ നിന്നുള്ളവരുമാണെന്ന് അധികൃതർ വ്യക്തമാക്കി. എസ്‌പി‌എ റിപ്പോർട്ട് പ്രകാരം, 29,265 പുരുഷന്മാരും 2,884 സ്ത്രീകളും ഉൾപെടെ 32,149 പ്രവാസികൾ നിലവിൽ നിയമ നടപടികൾക്ക് വിധേയരാണ്.

അറസ്റ്റിലായവരോട് ശരിയായ യാത്രാ രേഖകൾ ലഭിക്കുന്നതിന് ബന്ധപ്പെട്ട എംബസികളുമായോ കോൺസുലേറ്റുകളുമായോ ബന്ധപ്പെടാൻ സഊദി അധികൃതർ നിർദ്ദേശിച്ചു. ഇതിനുപുറമെ, 1,610 പേരോട് യാത്രാ ക്രമീകരണങ്ങൾ നടത്താൻ നിർദ്ദേശിക്കുകയും 13,375 പേരെ സ്വദേശത്തേക്ക് തിരിച്ചയക്കുകയും ചെയ്തു.

ALSO READ: ഇന്ന് സൂര്യഗ്രഹണം; യുഎഇ സമയം രാത്രി 9:29-നാണ് ​ഗ്രഹണം ആരംഭിക്കും; കൂടുതൽ വിവരങ്ങൾ അറിയാം

നിയമവിരുദ്ധ പ്രവേശനം, ഗതാഗതം, അല്ലെങ്കിൽ താമസസൗകര്യം നൽകുന്നവർക്ക് 15 വർഷം വരെ തടവ്, 10 ലക്ഷം സഊദി റിയാൽ വരെ പിഴ, കുറ്റകൃത്യത്തിന് ഉപയോഗിച്ച വാഹനങ്ങളോ പ്രോപ്പർട്ടികളോ കണ്ടുകെട്ടൽ തുടങ്ങി കടുത്ത ശിക്ഷകൾ നേരിടേണ്ടിവരുമെന്ന് ആഭ്യന്തര മന്ത്രാലയം മുന്നറിയിപ്പ് നൽകി.

വിദേശികളുടെ താമസ, തൊഴില്‍ ലംഘനങ്ങള്‍ കണ്ടെത്തുന്നതിനായി സഊദി ആഭ്യന്തര മന്ത്രാലയം നിരന്തരം പ്രത്യേക പരിശോധനകള്‍ നടത്തുന്നുണ്ട്. ഇത്തരം കേസുകള്‍ റിപ്പോര്‍ട്ട് ചെയ്യാന്‍ പൊതുജനങ്ങള്‍ക്ക് നിര്‍ദേശം നല്‍കിയിട്ടുണ്ട്. മക്ക, റിയാദ് എന്നിവിടങ്ങളില്‍ നിന്നുള്ളവര്‍ 911 എന്ന നമ്പറിലും മറ്റ് പ്രദേശങ്ങളില്‍ നിന്നുള്ളവര്‍ 999 എന്ന നമ്പറിലും നിയമലംഘനങ്ങള്‍ റിപ്പോര്‍ട്ട് ചെയ്യണമെന്ന് അധികൃതര്‍ അറിയിച്ചു.

Saudi authorities have arrested over 22,000 individuals in a week-long nationwide campaign against illegal residency, border crossings, and labor violations.