ജയ്പൂര്‍: 15 ദിവസം മാത്രം പ്രായമായ കുഞ്ഞിനെ വനമേഖലയില്‍ ഉപേക്ഷിക്കപ്പെട്ട നിലയില്‍ കണ്ടെത്തി. രാജസ്ഥാനിലെ ഭില്‍വാര ജില്ലയിലാണ് സംഭവം നടന്നത്. വായില്‍ കല്ല് തിരുകി കുഞ്ഞിന്റെ ചുണ്ടുകള്‍ പശ ഉപയോഗിച്ച് ഒട്ടിച്ച നിലയിലായിരുന്നു. കുഞ്ഞ് കരയാതിരിക്കാനാവണം ഇങ്ങനെ ചെയ്തതെന്നാണ് നിഗമനം.  

കന്നുകാലികളെ മേയ്ക്കുന്നയാളാണ് മണ്ഡല്‍ഗ്രാഹില്‍ ക്ഷേത്രത്തിന് സമീപമുള്ള വനമേഖലയില്‍ കുട്ടിയെ കണ്ടെത്തിയത്. ഇദ്ദേഹം ഉടനെ കുഞ്ഞിന്റെ വായില്‍ നിന്ന് കല്ല് നീക്കം ചെയ്തു. ഉടന്‍ തന്നെ അടുത്തുള്ള സര്‍ക്കാര്‍ ആശുപത്രിയില്‍ എത്തിച്ചു. പാറക്കൂട്ടങ്ങള്‍ക്ക് നടുവിലാണ് കുഞ്ഞിനെ കണ്ടെത്തിയത്.  കുഞ്ഞ് നിലവില്‍ ആശുപത്രിയില്‍ ചികിത്സയിലാണ്. ആരോഗ്യനില തൃപ്തികരമാണെന്ന് അധികൃതര്‍ അറിയിച്ചു. 

ഭില്‍വാരയിലെ മണ്ഡല്‍ഗഡിലെ ബിജോളിയ പൊലിസ് സ്റ്റേഷന്‍ പരിധിയിലാണ് സംഭവം റിപ്പോര്‍ട്ട് ചെയ്തത്. കുഞ്ഞിന്റെ മാതാപിതാക്കളെ കണ്ടെത്താന്‍ പൊലിസ് ശ്രമം തുടങ്ങി. സമീപത്തെ ആശുപത്രികളില്‍ പരിശോധന നടത്തുന്നുണ്ട്. കുഞ്ഞിനെ കണ്ടെത്തിയ പ്രദേശത്തിനോട് ചേര്‍ന്നുള്ള ഗ്രാമങ്ങളിലെ ആളുകളെയും ചോദ്യം ചെയ്യുന്നുണ്ട്.